Camila Giorgi

Da Wikipedia.

C'l artìcul chè 'l è scrit in Miranduléś Emiliàn


La Giorgi tòlta śò a Wimbledon in dal 2011


La Camila Giorgi (Maceràta, 30 ad Dicémbar dal 1991, a s lèś ['kamila 'd͡ʒɔrd͡ʒi] in Itagliàn) l'è na tenìsta itagliàna, fiōla ad Sergio (argintèṅ) e Claudia (itagliàna). L'à tacâ a śugàr in dal sircùit ITF in dal 2006, vìnsénd-an sinc.

L'è élta 168 cm e la péśa 54 chilo. La dróa al bras dèstar e la tira 'l arvèrs a dū maṅ.

L'è rivàda a èsar la nùmar stanta-tri dal mónd (al 18 ad Favràr dal 2013) e l'è andàda a star in Frància.

I gh piàśan dimóndi i film ad Pedro Almodóvar, al culōr ròśa, al lìbar Al diàri 'd Anna Frank e tgnir a drē a 'l partìdi ad balòṅ e a 'l gari dla MotoGP.

Caréra

In dal 2011 la Camila la śōga a daśnóṿ an al qualificasiòṅ ad Wimbledon, pasànd-li. A 'l prim tùran la pésca la bùlgara Cvetana Pironkova, nùmar trénta-tri dal mónd, e la pèrd 2-6 1-6.

La Giorgi la tira 'n drit a Róma in dal 2008

In dal 2012 la riva a śugàr al turnèo WTA ad Memphis (Stat Unî) pasànd p'r al qualificasiòṅ e la bat a 'l prim tùran la rusa Nadia Petrova par 6-4 6-2 ma pò la céd a la francéśa Stéphanie Foretz Gacon par 5-7 4-6. In Mars la śōga 'l ITF ad Fort Walton Beach e lè la bat l'Annika Beck e l'Elena Bovina prima ad lasàr strada a la Madison Brengle in semifinàl. In Avrìl, da qualificàda, la śōga al turnèo ad Charleston e la pèrd subìt da la Barbora Záhlavová-Strýcová par 1-6 3-6 ma pò la vins 'l ITF ad Dothan. In Luj la pasa incóra al qualificasiòṅ ad Wimbledon e pò la manda a cà dū Top Vint cuma la Flavia Pennetta (6-4 6-3) e la Nadia Petrova (6-3 7-6) prima ad cédar a l'Agnieszka Radwańska 2-6 3-6. A Cincinnati la fà piànśan n'atra itagliàna, la Francesca Schiavone, mandànd-la fóra a 'l prim tùran 6-1 6-3. A 'l secónd tùran però la gh'à da pigàr-as a la Sloane Stephens 2-6 1-6. Dòp dū prim tùran a gl'US Open e a Seùl, la và a śugàr al qualificasiòṅ a Tokyo e la cata la Vandeweghe e la Voskoboeva in sla sò strada. La Camila la bat prima la Coco e pò anc la Galina e acsè la pōl andàr dènt'r a 'l tablòṅ prinsipàl ma chè però la pèrd subìt da la Tamira Paszek 4-6 3-6. A Pechîṅ la cata a 'l prim tùran la Sara Errani ch'l'è custréta a dar-'g a muć in dal prim sét su 'l 4-5. La Giorgi però la n s in prufìta minga parchè la n gh la cava briśa pò a pasàr 'l ustàcul Romina Oprandi.

In dal 2013 la cata sù subìt dū prim tùran (Australian Open 2-6 3-6 da la Stéphanie Foretz Gacon e Miami 2-6 6-4 3-6 da la Laura Robson). A Charleston la bat invéci la Mandy Minella ma pò la gh'à da cédar a la Serena Williams (pò vinsidōra dal turnèo) par 2-6 3-6. La tórna a śugàr al mèś dòp a Madrid; pasàdi al qualificasiòṅ la pèrd a 'l prim tùran da la Nadia Petrova par 3-6 6-4 4-6. A Straśbûrg la bat subìt la tèsta ad sèrie nùmar òṅ dal tablòṅ Marion Bartoli par 6-3 6-2 (faghénd sédas fai dópi in nóṿ tùran a 'l servìsi) ma pò la vèṅ asfaltàda 3-6 0-6 da la canadéśa Eugenie Bouchard. La stmana dòp la mùcia sù n'atra scunfìta a 'l Roland Garros par maṅ dla cinéśa Shuai Peng e pò la pèrd subìt anc a Birmingham (6-7 3-6 da la Donna Vekić). A Wimbledon, baténd la Sorana Cîrstea 7-6 7-6, la riva a 'l tèrs tùran ma pò la gh'à da cédar a la Marion Bartoli, pò vinsìdōra dal tìtul, par 4-6 5-7. Crudàda śò in clasìfica a 'l 136śum pòst, anc par via 'd un mâl a la spala, la tórna a śugàr dòp un méś a gl'US Open. Chè, pasànd p'r al qualificasiòṅ, la dà la paga via via a la Risa Ozaki par 6-3 6-2, a l'Angelique Van Der Meet par 4-6 6-3 6-4, a la Julia Cohen par 6-1 6-0, a la Jana Čepelová par 6-2 6-2 e a la Su-Wei Hsieh par 6-4 7-6. In di utàṿ la śóga in sal camp sentràl cóntrar la Caroline Wozniacki e la la bat par 4-6 6-4 6-3. In di quàrt però la ciàpa na lesiòṅ da la Roberta Vinci ch'la gh'à la méj par 6-4 6-2 dòp che la marchigiàna, ch'la gh'iva al pùblic da la sò banda, l'éra avànti 4-1 in dal prim sèt. Cun i punt mis in bisàca la tórna in dal primi utànta dal mónd ma da 'd lè a la fiṅ d'l an la pèrd subìt a Quebec City (7-6 3-6 2-6 da la Lauren Davis), a 'l secónd tùran a Linz (2-6 1-6 da la Kirsten Flipkens) e la n pasa minga al qualificasiòṅ in Lussembûrgh.

La Giorgi tòlta śò in dal Setémbar dal 2014

Dòp soquànt méś ad férum, la taca la stagiòṅ 2014 a Sydney ma la n pasa minga 'l qualificasiòṅ pardénd a 'l prim tùran da la Christina McHale par 7-5 5-7 3-6 anc s'l'à sarvî p'r al match in dal secónd sét. La stmana dòp la sa spòsta a Melbourne ma la và fóra a 'l secónd tùran c'n al puntéǵ ad 3-6 6-4 4-6 faghénd stanta-tri gratùit cun la francéśa Alizé Cornet e dòp èsar stada 4-1 par lē in dal tèrs sét. In Favràr la sćiànca 6-2 6-1 la Madison Keys in Fed Cup a Cleveland. In Mars, pasànd p'r al qualificasiòṅ, la tōś part a 'l turnèo 'd Indian Wells e chè la bat l'Andrea Petković 6-7 6-3 6-3, la Sorana Cîrstea 7-6 6-3 e la Marija Šarapova 6-3 4-6 7-5 prima 'd cédar a la Flavia Pennetta par 2-6 1-6. Al méś dòp la śōga la sò prima finàla WTA a Katowice in Pulògna mandànd a cà la Katarzyna Piter, la Roberta Vinci, la Shahar Peer e la Carla Suárez Navarro. Cóntar l'Alizé Cornet però la buta a gl'urtìghi un match point e la pèrd 6-7 7-5 5-7. A Róma la dà na lesiòṅ in dal Pietrangeli a la Dominika Cibulková ma pò la sa śmòrsa cun la Christina McHale dòp avér duminâ 'l prim sét. In sl'èrba ingléśa 'd Eastbourne la dà 'n àtar daspiaśēr a na top 10 cuma la Viktoryja Azaranka prima ad cédar in tri sét a la Caroline Wozniacki. La marchigiàna la s tōś l'arvìnsida sèg a New Haven, turnèo in dua la bat anc la Coco Vandeweghe e la Garbiñe Muguruza Blanco. In semifinàł la pèrd però cun la śluvàca Magdaléna Rybáriková par 2-6 4-6. Dòp tri prim tùr'n a gl'US Open, a Wuhan e a Pechîṅ, la tórna a far-as valēr a Linz in dua la riva in finàł cun la Karolína Plíšková. Dòp avér abû un match point la céd a la céca par 7-6 3-6 6-7. La Giorgi la finìs 'l an c'n i quàrt a Mósca e a 'l 35śum pòst dal ranking.

In dal 2015 la Giorgi la pasa dū tùr'n a gl'Australian Open in dua la và a 'l servìsi par mandàr a cà la Venus Williams ma in sal più bèl la sa śmòrsa lasànd strada a l'americàna ch'la la bat par 4-6 7-6 6-1. In Avrìl, baténd la padròna 'd cà Agnieszka Radwańska par 6-4 6-2, la riva incóra in finàł a Katowice ma la la pèrd par 4-6 3-6 cun l'Anna Karolína Schmiedlová.

Culegamènt estéran