Zuzana Kučová
|
C'l artìcul chè 'l è scrit in
Miranduléś |
La Zuzana Kučová (Bratiślàva, 26 ad Śugn dal 1982, a s lèś [ˈzʊzana ˈkut͡ʃɔva:]) l'è na tenìsta śluvàca prufesiunìsta da 'l 2007. L'è élta 170 cm e la péśa 60 chilo.
La preferìs śugàr in sal dûr e la dróa al bras dèstar, tirànd 'l arvèrs a dū maṅ. I film ch'a gh piàś da piò i èṅ quéi ad Fantozzi e dla Pantéra Ròśa.
Al 7 ad Śugn dal 2010 l'è rivàda a èsar la nùmar sènt-òṅ dal mónd. In dla sò caréra l'à vins òt tìtui IFT.
Caréra
La s qualìfica par la prima vòlta in un turnèo WTA a Bùdapest in dal 2008. In dal 2010 la i pasa anc a gl'Australian Open ma la pèrd subìt p'r òpra dla Gisela Dulko ch'la gh'à la méj par 6-0 5-7 7-5. Al méś dòp la próa a 'ndàr dèntar a 'l tablòṅ prinsipàl ad Parì ma, dòp avér fat fóra la Camila Giorgi e l'Ekaterina Makarova, la pèrd da cl'atra rusa, l'Evgenija Rodina. In Luj la và fóra a 'l prim tùran a Wimbledon (6-2 7-5 par l'Alicia Molik), acsè cum a Bastad, Palèrum e Pòrtrōś. In Agóst la pasa al qualificasiòṅ a gl'US Open ma pò la cata subìt la nùmar òt dal mónd, la Vera Zvonarëva, ch'la la manda a cà.
In dal 2011 la pèrd subìt 1-6 4-6 a Dubai cun la Sara Errani. La fà méj in sla tèra rósa ad Stucàrda in dua la bat la Mandy Minella e la Tamira Paszek in dal qualificasiòṅ. A 'l prim tùran la s in prufìta dal bandòṅ in dal tèrs sét dl'Anna Čakvetadze p'r andàr avànti ma pò la céd a la nùmar òṅ dal mónd Caroline Wozniacki 1-6 2-6. A Cupenàghen la pèrd a 'l secónd tùran da l'Alberta Brianti. In Luj la riva par la prima vòlta in di quàrt 'd un turnèo WTA a Bùdapest pardénd in tut al manéri da l'itagliàna Roberta Vinci. La sèra 'l an pardénd subìt a Uśàka da la Jie Zheng par pò a n śugàr minga par tut al 2012 p'r un mâl a 'l gòmit.
In dal 2013 la tórna a śugàr in sal sircùit WTA a Stucàrda, par dir arvéd'r-as a 'l tènis, ma lè la vèṅ sćiancàda in dal prim tùran dal qualificasiòṅ da la Nastassja Burnett par 6-0 6-2. In Maǵ invéci la gh và méj in qvéli dal Roland Garros in dua l'è anc bòna ad bàtar in dū sét la Julia Görges a 'l prim tùran prima ad cédar a la Virginie Razzano cun al puntéǵ ad 6-4 2-6 0-6. In tut i caś finalmènt la pōl cuntàr 'd avér vins 'n incóntar in un turnèo dal Gran Slam[1].
Culegamènt estéran
Nòti
- ↑ Roland Garros: la fòla dla Zuzana Kucova Ubitennis.com, 27 ad Maǵ dal 2013