Il senso di Smilla per la neve (film)

Da Wikipedia.

C'l artìcul chè 'l è scrit in Miranduléś Emiliàn

Smilla's Sense of Snow
Il senso di Smilla per la neve

Byrne e la Julia Ormond in na figùra dal film
Al sèns dla Smilla par la néṿ
1997
Regìa: Bille August
Scritōr: Peter Høeg • Ann Biderman
Atōr: Julia OrmondGabriel ByrneBob Peck
Richard HarrisJim BroadbentTom Wilkinson
Mario AdorfVanessa RedgraveEmma Croft
Matthew MarshRobert LoggiaPeter Capaldi
Peter GantzlerJürgen VogelClipper Miano
Müsica: Harry Gregson-Williams • Hans Zimmer
Léngua: IngléśInuktitut
Dürä dal film: 121 minüt
Nasiōṅ: DanimàrcaŚvèsiaGermàgna


«
La néṿ l'è bòna 'd quaciàr incòsa... a part la véra.»
(Tagline dal film)


Il senso di Smilla per la neve (Al sèns dla Smilla par la néṿ) 'l è thriller dramàtic danéś, śvedéś e tedésc dal 1997 ad Bille August trat da 'l rumànś umònim ad Peter Høeg (Frøken Smillas fornemmelse for sne in danéś).

La pelìcula, custàda trénta-sinc migliòṅ ad dòlar, l'è stada preśentàda a 'l 47śum Fèstival 'd Berlîṅ in dua 'l regìsta 'l è stâ numinâ par 'l “Ōrs 'd Òr”.

Sunt

Nada in Gruenlàndia, la śōvna Smilla Jaspersen (Julia Ormond), na puta indipendènta e piutòst arvèrsa a 'l règhli e incóra ligàda a la sò tèra, adès la viṿ e la lavóra a Cupenàghen in du la stùddia i cristài 'd giàs in un laburatòri universitàri. Un dè, turnàd a cà, la véd par tèra al còrp mòrt dal pìcul Isaiah (Clipper Miano), śliciâ śò da 'l téǵ pîṅ 'd néṿ dal sò palàs mént'r al śugàva da par lò là in élt. Al baghét 'l éra 'l fiōl dna sò vśina 'd cà imbariagòsa cun di urìgini gruenlandéśi anc lē, la Juliane (Agga Olsen), armàśa védva par cólpa dn'espluśiòṅ durànt un viàś espluratìṿ fat da sò marè in Gruenlàndia par cònt dna multi-nasiunàł in du a gh lavóra 'l dutōr Andreas Tork (Richard Harris).

Par la pulisìa a s trata dna daśgràsia ma la Smilla, ch'la sà ch'al baghét al gh'iva paùra dl'altésa e guardànd al pidàdi lasàdi da lò su 'l téǵ, la pénsa invéci che Isaiah al sia mòrt scapànd via da 'n qualchidòṅ. Cun 'l ajùt ad sò pàdar mèdag Moritz (Robert Loggia) e 'd un mecànig ch'al stà in dal sò palàs (Gabriel Byrne), la Smilla la próa a 'ndàr-'g a fónd.

Culegamènt estéran