Una Soap

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg En Soap
Una Soap
Soap.png
David Dencik in na figùra dal film
Na Soap
2006
Regia: Pernille Fischer Christensen
Scritùr: Kim Fupz Aakeson
Pernille Fischer Christensen
Atùr: Trine DyrholmDavid DencikFrank Thiel
Elsebeth SteentoftChristian TafdrupClaes Bang
Müsica: Magnus Jarlbo • Sebastian Öberg
Lengua: DanéśIngléś
Dürä dal film: 108 minüt
Nasiòṅ: DanimàrcaŚvèsia


«
Dal vòlti la vita l'è più strana dna “Soap Opera”.»
(Tagline dal film)


Una Soap (Na Soap) 'l è na cumèdia danéśa e śvedéśa dal 2006 dla Pernille Fischer Christensen che chè l'è a 'l sò debùt da regìsta.

Al film 'l à purtâ a cà 'l Órs 'd Argìnt, al gran prèmi dla giurìa, a 'l Fèstival ad Berlîṅ dal 2006.

Sunt

La Charlotte (Trine Dyrholm), pruprietària 'd un salòṅ ad belésa, l'à péna mulâ 'l sò muróś Kristian (Frank Thiel), dutōr ad mistēr, dòp avér visû sèg par quàt'r an. Adès l'à spatinâ andànd a star in 'n apartamènt da par lē, ad sōv'r ad qvél 'd Ulrik (David Dencik), un trans ch'al s fà ciamàr Veronica ch'al vōl cambiàr sès e ch'al scampa vindénd al sò còrp par bèsi. In dal méntar ch'la Veronica la dà śò la pólvra in salòt, la Charlotte la próa a tgnir impìsa na lampàda in dla sò cambra da lèt ch'la sa śmòrsa sèmpar da par lē e pò la s mét sù quèl da magnàr in dal micro-óndi.

La Veronica la gh'à na cagnìna ch'la s ciàma Miss Daisy. Dòp avér-ag ślungâ quèl da magnàr e bruśâ la fritàda, a gh sòna a 'l us la Charlotte parchè la gh'à biśógn 'd ajùt ch'la gh'à da spustàr na réda da lèt c'n al stramàs tacâ insìma ch'l è dimóndi péśa e lē da par lē la n gh la cava minga. Dòp avér-al fat malvluntéra, la Veronica la tórna śò a guardàr na telenuvéla in ingléś a la televiśiòṅ méntar la Charlotte la và a lèt cun 'n óm spuśâ (Jakob Ulrik Lohmann) spianànd-'l a la granda. Subìt dòp la và a purtàr un rigàl a la Veronica, un fónd-tinta, acsè la pōl quaciàr méj la sò pèla da óm. A riva anc sò màdar (Elsebeth Steentoft) ch'invéci la gh pòrta dal rivìsti da lèśar. Al trans l'è dimóndi śò e 'l decìd ad tōr-as la vita mandànd śò dal madśìni tuti insém. La Miss Daisy la taca a bajàr fòrt daśdànd in dla nòt la Charlotte ch'la và śò par dir ad dar-'g un taj parchè l'à fiacâ. Vrénd 'l us la cata la Veronica in còma in mèś a 'l gòmit. La dóna la ciàma subìt Kristian a 'l telèfun e chi lò al gh diś 'd insfilsàr-ag dū dida in góla par far-ag vgnir 'l urt dal gòmit e vudàr-'g al stómag ma a n funsióna minga dònca la ciàma subìt 'n ambulànsa.

Al dè dòp la Veronica la tórna a cà e sò màdar la gh pòrta di óṿ dōls ad quàja in rigàl ma lò al s arlìa sèg parchè la 'l ciàma sèmp'r Ulrik. Al trans al và in cuśìna a tōr na scatla 'd ciuculatèṅ da purtàr a sò pàdar p'r al sò cumpléan anc se lò al n 'l à minga invidâ a la fèsta.

In cambi d'l ajùt ch'la gh'à dâ salvànd-ag la vita, la Charlotte la dmanda a la Veronica ad mét'r-ag sù dal téndi a la fnèstra parchè a gh'è sèmp'r un purcùs 'd 'n àtar palàs ch'al la tîṅ 'd òć quànd la s cava śò. La Charlotte la li vōl biànchi e la Veronica la s śibìs ad cuśìr-li lē, pò la và a cambiàr al nàst'r adeśìṿ ch'al gh al tîṅ schis sóta 'l stanlèṅ. Méntar lē la s tira sù 'l mudàndi cl'atra là la s li cava parchè la s è purtàda a lèt 'n àt'r óm (Claes Bang), qvést chè divursiâ.

Cla sira lè la Veronica la gh mónta 'l téndi e la Charlotte la gh diś ch'al pōl armàgnar par séna. Dòp avér scaldâ dla pizza c'n al micro-óndi la gh admànda chi èṅ-i tut chi óm ch'i pàsan par cà sua (ag curàǵ ch'la gh'à, pròpria lē!). La Veronica la n è minga bòna ad dir ch'i èṅ di sò cliènt e dònca la gh rispónd ch'la fà di lavōr da sarta, giustàr dal sfési dal braghi, cuśìr di rudèi e via dascurénd, par métar-'s in bisàca quèl.

Culegamènt estéran