Stefania Sandrelli

Da Wikipedia.
C'l artìcul chè 'l è scrit in Miranduléś Emiliàn
La Sandrelli tòlta śò in dal 2008


La Stefania Sandrelli (Viaréǵ, 5 ad Śugn dal 1946), l'è n'atōra itagliàna.

In dla sò caréra l'è stada bòna 'd purtàr a cà tri Dàvid ad Dunatèl, siē Nàstar 'd Argìnt e 'n Lèòṅ 'd Òr a la caréra durànt al 62śum Fèstival ad Venèsia, laurànd c'n i regìsta itagliàṅ più impurtànt.

Da na sò relasiòṅ c'n al cantànt Gino Paoli l'è nada sò fiōla Amanda.

Biugrafìa

La Sandrelli la taca a far cìnema a quìnd'ś an faghénd-as nutàr prima in un film girâ insém a Ugo Tognazzi, Il federale, e pò in soquànti pelìculi 'd Pietro Germi cuma Divorzio all'italiana (1961) cun Marcello Mastroianni, Sedotta e abbandonata (1964) cun Lando Buzzanca e L'immorale (1967) giràda cun Ugo Tognazzi. Sèmp'r in di an Ssanta la tōś part a Io la conoscevo bene 'd Antonio Pietrangeli e a L'amante di Gramigna (1968) ad Carlo Lizzani, trata da na nuvèla 'd Giovanni Verga, insém a Gian Maria Volonté.

In dal 1970 la lavóra c'n al parmśàṅ Bernardo Bertolucci in Il conformista, òpra trata da 'n rumànś 'd Alberto Moravia. 'L an dòp l'è in dal cast dal śal La tarantola dal ventre nero pò l'è a fiànc ad Dustin Hoffman in Alfredo Alfredo ad Pietro Germi. In dal 1976 la gira prima na pelìcula par Claude Chabrol (Profezia di un delitto) e pò Novecento ad Bernardo Bertolucci, un lavōr ad sinc óri e pasa ch'al cònta la lòta 'd clas ad tri generasiòṅ in Emìglia.

In di an Utànta la gira 'l film spurcaciòṅ ad Tinto Brass La chiave e l'è prutagunìsta ad dū cumèdi ad Carlo Vanzina: Eccezzziunale... veramente (1982) e Vacanze di Natale (1983). Par Carlo Lizzani la gira 'l biugràfic Mamma Ebe e in chi an lè la lavóra anc cun Mario Monicelli (Speriamo che sia femmina), Giovanni Soldati (La sposa americana) e Ettore Scola (La famiglia).

In di an Nuànta la gira dū pelìculi par Bigas Luna, Prosciutto prosciutto cun la Penélope Cruz, Javier Bardem e Jordi Mollà, e Volavérunt cun la Penélope Cruz e Jorge Perugorría. In dal 2008 Ferzan Özpetek al gh dà la part dl’Olimpia in Un giorno perfetto, film cun l'Isabella Ferrari e Valerio Mastandrea.

Filmugrafìa

La Sandrelli insém a Giuliano Gemma in na figùra dal film Delitto d'amore
La Stefania in dal 2010
La Sandrelli in Sedotta e abbandonata
L'atōra tuscàna a Venèsia a i tèmp ad Parsùt parsùt
La Sandrelli in Il conformista (1970)
La Stefania in na figùra dal film Io la conoscevo bene
Na sò fóto dal 1992

Culegamènt estéran