Pussy Riot

Da Wikipedia.

C'l artìcul chè 'l è scrit in Miranduléś Emiliàn


«
Virgin Mary, Mother of God, put Putin away, put Putin away, put Putin away. Black robe, golden epaulettes, all parishioners crawl to bow, the phantom of liberty is in heaven, gay-pride sent to Siberia in chains. The head of the KGB, their chief saint, leads protesters to prison under escort, in order not to offend His Holiness women must give birth and love.»
(EN)(Virgin Mary, Put Putin Away)
«
Vìrgin Marìa, Màdar ad Dio, para via Putin, para via Putin, para via Putin. Vistî négar, spalìni duràdi, tut quéi dla paròchia i s métan in śnòć, al fantàśma dla libertà 'l è in dal cēl, qvéi dal gay-pride mandâ in Sibèria in cadéni. Al cap dal KGB, al sò cap sant, al manda i manifestànt in parśòṅ sóta scòrta, p'r a n uféndar minga Sò Santità al dóni i gh'aṅ da parturìr e dar amōr.»
(MUD)


Manifestasiòṅ a favōr dal Pussy Riot in Germàgna

Al Pussy Riot (Pèpi arvèrsi) i èṅ un grup rus punk ad fémni rabìdi impgnàdi in pulìtica a Måssca, cgnusû p'r al sò manifestasiòṅ ad prutèsta fati cun di flash mob e eśibisiòṅ ad tant in tant. I dascóran dla situasiòṅ pulìtica in Rùsia e dla vita dal dóni là, dand anc còntra gl'elesiòṅ presidensiàli dal 2012, cun al pasàǵ a cap dal Stat ad Vladimir Putin che, in alóra, 'l éra prim minìstar.

Al grup dal Pussy Riot
Al Pussy Riot i sònan in dla Piàsa Rósa
La Catedràla ad Crist Salvadōr

In dal méś ad Mars dal 2012, tri dóni dal grup i èṅ stadi misi in arèst cun l'acùśa ad cumpurtamènt viulènt e ultragiōś p'r avér fat n'eśibisiòṅ còntra Putin sénsa parmés in dla Catedràla ad Crist Salvadōr. Che lōr, dòp ésar-'s fati al ségn dla cróś, i aṅ tacâ a sunàr na canta par dmandàr a la Madóna ad mandàr via Putin e puntànd al dî anc còntra Cirillo I parchè, a lōr giudìsi, lì lò al créd più a Putin che a Dio. Al guàrdi, in gnanc un minùt, i i aṅ paràdi fóra subìt.

A s trata ad:

  • Maria Alyokhina, studénta ad 24 an a 'l quàrt an ad Giurnalìśum, la s dà da far par Greenpeace e in dal vuluntariâ. La gh'à 'n putèṅ;
  • Yekaterina Samutsevich, prugramadōra ad computer ad 30 an, diplumàda in futugrafìa e in multimedia;
  • Nadezhda Tolokonnikova, studénta ad 22 an, la stùddia filuśufìa a l'università 'd Måssca. L'è spuśàda cun Pyotr Verzilov e la gh'à na fiōla ad quàt'r an.

Da la lōr banda i s èṅ dit: Kate Nash, Red Hot Chili Peppers, Sting, Cornershop, Faith No More, Peter Gabriel, Jarvis Cocker, Pete Townshend, The Joy Formidable, Madonna, Björk, Neil Tennant di Pet Shop Boys, Alex Kapranos di Franz Ferdinand, Beastie Boys, Patti Smith, Genesis, Corinne Bailey Rae, Courtney Love, Paul McCartney, Yōko Ono, Refused, Elio e le Storie Tese, Zola Jesus, Billie Joe Armstrong di Green Day, Die Antwoord, Genesis, Tegan and Sara, Johnny Marr e àt'r incóra. L'Ugnòṅ Europea, par bóca ad Catherine Ashton, la s è dita in pinsēr p'r al cundisiòṅ duri ad detensiòṅ e par la manéra ad purtàr avànti al prucès.

I gh daṅ invéci adòs al Patriàrca dla Cèsa Urtudòsa, Cirillo I, e al regìsta Nikita Mikhalkov ch'al s è dit prònt fiṅ da subìt a firmàr na létra avèrta cònt'r ad lōr.

Dòp che la cantànta Madonna l'iva dâ al sò apòǵ a 'l grup durànt un sò cuncèrt in Rùsia, faghénd védar la scrita "Pussy Riot" in sla sò schina, al premier in secónda rus Dmitrij Rogozin al gh rispónd acsè: «Tut qvéli ch'i èṅ stadi dal r... ad sòlit i téndan a far in gir dal lesiòṅ su cuma a s fà a star a 'l mónd, specialmènt quànd la s cata a 'l èstar in tournée»[1]. Di asuciasiòṅ dla sità ad San Pirèṅbùrg i aṅ pò fat càuśa a lē e a gl'urganiśadōr dal cuncèrt, dmandànd-ag déś migliòṅ 'd euro p'r avér dascórs in favōr di gay e dal "Pussy Riot", andànd acsè, a sò dita, còntra la léǵ dla sità e a i sentimènt dal pòpul[2].

Mandàdi a giudìsi, dòp ch'i éran stadi tgnùdi dèntar par dagnóra tri méś sénsa ch'a fus depuśitâ furmalmènt 'l at 'd acùśa, al 17 'd Agóst dal 2012 i giùdas rus i aṅ cundanâ al Pussy Riot a dū an ad parśòṅ par „TEPÌŚUM RELIGIŌŚ[3]. In cal méntar al vèć campiòṅ ad scac Garry Kasparov, mémbar dal fòrsi 'd upuśisiòṅ ch'l éra preśènt ad fóra da 'l tribunàl par prutestàr, 'l è stâ farmâ par la pulisìa[4].

Culegamènt estéran

Nòti