Naster

Da Wikipedia.
C'l artìcul chè 'l è scrit in Carpśàn Emiliàn
Na parèda 'd naster ed rèś e 'd dòpi rèś
Na lavurasiòun 'd naster ch' i vinen calê in quàter in dal stes mèinter dal stès machinàri

Al naster 'l è na banda sutìla 'd soquànt materiē diferèint, cùma 'd stòfa, 'd plàstica o 'd cherta, ch'la pōl servìr per lighèr di quêl, fèr dal decorasiòun, o anca p'r un quèlc significhêt simbòlic, c'm'anca per fabrichèr dal cuchèrdi, dal porta-m'dàj, e incòr vgnîr tajê in dagli inavgurasiòun e ai traguêrd ed soquànti impréśi spurtìvi.

I naster ed stòfa

I naster ed stòfa, c'ma 'd cutòun, 'd lèin, 'd polièster o 'd poliamìde, i pólen vgnìr tisû in sìm'a di tlêr ch'i prepèren più pês in dal stès mumèint, cun dal cimóśi ai fiànc p'r ognùn, o piotòst, per qui 'd materiē sintètic, in na pèsa ùnica, ch'l'a gh'arà pò da gnìr tajèda p'r al lùng in tanti bandi sutìli (i naster) cun 'na tètnica a ultra-sòun, ch'la ferma i śbavamèint ed fîl dal polièster e di èter materiē sintètic.

Egli armadûri di naster i pólen èser a tela per quèla piò śèimpia, a canvâs, a dir piò sustgnùda, a gro grèin, a fórma 'd spighê o lisca 'd pès, a rêś o dòpi rêś p'r avér 'l efêt lìs, e vìa descurènd. I naster i càmbien anca in dl'altèsa, vìst ch'a s in càta da quī elt 3 mm, 5 mm, 8 mm, 10 mm, su su infìn ai 66 o anc'ai 100 mm.

I naster tisû i vinen druê in dal decorasiòun 'd pachèt ed preśèint, per blìr di vistî o per sustgnìr e der robustèsa a soquànti cuśdùri, c'm'a quìli dal fònda del brèghi e 'dl arvultamèint in dèinter dla stófa 'd soquànt giachèt o vistî.

El scrìti in sìm'ai naster

I naster, ch'i sìen ed stòfa, ed cherta o 'd plàstica, i pólen purtèr sēg dal scrìti, mesâǵ 'd areclâṁ o 'd avgùri o 'd na quelc ètra sorta: el scrìti in sìm'ai naster i gh'pólen gnìr stampèdi, sia in rotatìva, che in tampografìa, sérigrafìa, termotrasferimèint, impresiòun a chèld, sublimasiòun) o in dal chèś di naster tisû, gnìr calèdi in dal stès mèinter ch' a s è drē a tès'r-i.

Al naster stampê o intarsiê cun già 'l scrìti sēg, strulghèdi in dla giùsta manéra, 'l è la premèsa per cavèr-gh-en fòra, tajènd-el in pcunsèin cìc, el diferèinti etichèti 'd infurmasiòun da cuśìr pò atàc dèinter i gulèt del camìśi o dal màj o di vistî, etichèti ch'i staràn lè a dìr-es al nòm edla fàbrica 'd produsiòun, la tàja 'd vistibilitê, la cumpuśisiòun dal tisû e gli acortèsi p'r i lavàǵ.


Vóś lighèdi