Maria Montessori

Da Wikipedia.
C'l artìcul chè 'l è scrit in Carpśàn Emiliàn
La Montessori a 'n tavlèin.

Maria Tecla Artemisia Montessori (Chiaravalle, 31 'd agòst dal 1870 - Noordwijk, 6 'd mâǵ 1952) l'è stèda na dutóra, pedagòga, filòśofa e siensièda itagliàna. Ala Montessori a s dēv l'ideasiòun dal métod 'd insgnamèint ch'al tōś al só nòm, cgnusû e druê in dimòndi ètri perti dal mònd.

La Montessori da cichìna.
La Montesóra da śóvna.

Biugrafìa

I inìsi

Fióla ùnica ed na famìja ed ginta istruìda, la Montesóri la và présti a stèr a Ròma, che 'l pèder 'l ìva catê post da laurèr là c'ma funsionàri in dal Ministēr dal Finànsi.
La Montesóri la frequentèva acsè dal scóli ed stùdi sientìfic, bèin che 'l pèder la l'ìs vluda mistra mo, a vèint an, la Marìa la stupìs incòsa a vlér dvintèr Dotorèsa. La gh'la chèva in dal 1896, specialiśènd-es in psichiatrìa, in bèrba ai pregiudìsi e ai ostàcol 'd èser da per lē da mêś a sōl di òm là a l'universitê.
I só interèsi i spasièven anca in dl'antrupulugìa e in dla pedagugìa. Ambasadóra pò dal muimèint feminìsta itagliàṅ ed cal tèimp lè, la Montesóra la gniva invièda a 'l cungrês ed Berlèin dal 1896 indû 's ciacarèva anca ed rifórmi socèli, e 'd mijorèr el cundisiòun ed lavōr e 'd stùdi p'r i òm e cal dòni, e la tachèva acsè a fèr-es cgnùser per la só determinasiòun e impègn socêl.

El só siélti profesionèli

Laurènd in chi tèimp lè in dl uśdêl San Śvàn e pò in dla clìnica psichiàtrica edl'universitê, la Montesóri la gh'à la manéra 'd capìr che i ragasō deficìnt - acsè i gniven ciamê di diśàbil sfurtunê, frenastènic - i n'gh'àn brìśa da stèr ind un stansòun vōd, lè da per lōr, sàinsa di èter stìmol, mo la cata che chilōr i gh'àpien biśògn ed śvilupèr dal só potensialitê cun dl'educasiòun, e cun dagli atensiòun adàti a lōr.
Là in di só stùdi a l'universitê la Montesóri l'ìva bèle tgnû drē a dal lesiòun ed Clìnica psichiàtrica e 'd Clìnica pediàtrica, mo la vōl però andèr-'gh incòra in fònda alśènd in sìm'ai esperiìnsi di Itard e Séguin ch'i éren gnû prìma 'd lē.

«
...Itard fu il primo che abbia tentato una metodica educazione del senso dell'udito, nell'Istituto dei sordomuti fondato da Pereire a Parigi, riuscendo a rendere udenti i sordastri; e in seguito, avendo avuto in cura un fanciullo idiota detto il selvaggio dell'Aveyron, estese a tutti i sensi quei metodi educativi che già avevano dato per l'udito eccellenti risultati. Allievo di Pinel, Itard fu il primo educatore a praticare l’osservazione dell'allievo, similmente a quanto si faceva negli ospedali per l'osservazione dei malati, specialmente per i malati del sistema nervoso. I lavori pedagocici dell'Itard sono interessantissime descrizioni minuziose di tentativi e di esperienze pedagogiche: e chi oggi le legge, deve convenire che quelle furono le prime prove della psicologia sperimentale...
...Il merito di aver completato un vero sistema educativo per fanciulli deficienti, spetta a Eduard Séguin, dapprima maestro, poi medico, il quale partendo dalle esperienze di Itard, le applicò modificandole e completando il metodo, durante dieci anni di esperienza su fanciulli che erano stati tolti dal manicomio e riuniti in una piccola scuola in via Pigalle a Parigi. Tale metodo fu esposto la prima volta in un volume di oltre 600 pagine, pubblicato a Parigi nel 1846 con il titolo "Traitement moral, higiène et education des idiots."»
(IT)(Montessori, 1909.)
«
...Itard 'l era stê 'l prìm ch'l ìs tintê, cun dal métod, n'educasiòun dal sèins dal sintìr cun gli urèci, in dl Istitût per sordmùt fundê da Pereire a Parì, cavènd-egh-la 'd fèr sintìr i lavōr ai surdàster; dôp 'd queschè, ènd-egh avû da tōr sù un ragasōl sèm ciamê "al salvàdegh dl Aveyron", 'l Itard al purtèva avànti anc a tùt chi èter sèins, chi sistéma lè ch'i ìven dê acsè di bòun riśultêt a 'l sintìr cun gli urèci. Studèint sòt'a 'l Pinel, 'l Itard 'l era stê 'l prìm educadōr ch'al pratichìs l’oservasiòun dal scolêr, acsè c'm'a s fèva in di uśdē p'r oservèr i malê, specialmèint quī malê in dal sistéma nervōś. I lavōr pedagògic edl Itard gl'ìn dal descrisiòun dimòndi interesànti e precìśi ed próvi e 'd esperièinsi pedagògichi: e quī ch'i i léśen, i déven cunvgnìr che quili là i éren el prìmi próvi dla psiculugìa sperimentêl...
...Quêl ch'a purtèva a bòun fìn un sistéma vēr 'd educasiòun per di ragasō deficìnt, 'l era 'l Eduard Séguin, prìma mister e pò dutōr che, tachènd dali esperiìnsi edl Itard, al li aplichèva canbiènd-i e finènd-en al métod, ed lung a dēś an 'd esperiìnsa in sìm'a di ragasō tolt vìa da 'l manicòmi e mìs insèm in na scóla cìca in via Pigalle a Parì. Cal métod chè al gniva mìs śò per la prìma volta ind un vlùm ed più 'd 600 paśni, publichê a Parì in dal 1846 col tìtol "Traitement moral, higiène et education des idiots."»
(MUD)

La dotorèsa col giurnalìsta americàṅ Samuel Sidney McClure in dal 1914.
'N èt'r artrât dla pedagugìsta.

In dal 1898 a nâs al fiōl Mario avû col Montesano, mo la stèsa mèder dla Montesóri, la Renìlda, la n'vōl minga che la dotorèsa la 'l tègna sēg perchè a in gnarèv pregiudichèda la só caréra profesionêl. La Montesóra la viàśa prìma a Parì e pò anc a Londra su incàreg dal Ministēr, per cgnùser el scóli e i métod 'd educasiòun druê fóra da l'Itàglia. Quand pò la torna indrē a Ròma, la dotorèsa la tìn dal Conferèinsi in sìm'ala psiculugìa e la pedagugìa di putèin deficìnt, pò al Minìster e anc só profesōr universitàri, al Baccelli al gh'dà la diresiòun, insèm col Montesano, edla Scóla Magistrêl Ortofrènica ch'la tachèva al 7 'd avrìl dal 1900.
Mìsa in pē, drē dmanda dal Diretōr generêl edl Istitût di Bèin Stàbil ed Ròma, na scóla per putèin cìc, ciamèda pò la Cà di putèin (Casa dei Bambini in itagliàṅ) ind al quartēr S. Lorèins ed Ròma, la Montesóra la gh'n à la diresiòun: la gh'mèt dàinter na sinquantèina 'd putèin un po' indrē in dl'educasiòun e in dal só śvilùp e però anca dl aredamèint cìc proporsionê ai muimèint e a 'l druamèint di putèin, cun di strumèint e materiē strulghê e custruî apòsta ch'i s prestìsen a fèr capìr e descuvrìr di lavōr istrutìv ai putèin.

«
Era la fine del 1906. Tornavo da Milano, dove ero stata eletta a prender parte all'aggiudicazione dei Premi all'Esposizione internazionale, nella sezione di pedagogia scientifica e di psicologia sperimentale. Fui invitata dal direttore generale dell'Istituto dei Beni Stabili di Roma ad assumere l'organizzazione di scuole infantili da crearsi nelle case popolari. La magnifica idea era di riformare un quartiere pieno di rifugiati e di misera gente, come quello di San Lorenzo a Roma, dove una popolazone di circa 30.000 abitanti era stipata, in condizioni che sfuggivano ad ogni controllo civico... Questo tipo speciale di scuola fu battezzato con l'incantevole nome di «Casa dei Bambini». La prima di esse fu aperta, con questo nome, il 6 gennaio 1907, in via dei Marsi, 53, e a me fu affidata la responsabilità della direzione. L'importanza sociale e pedagogica di una simile istituzione mi apparve in tutta la sua grandezza ed io insistei su ciò che sembrava essere una visione, allora esagerata, del suo trionfale avvenire; ma oggi molti cominciano a comprendere ch'io previdi la verità.»
(IT)(Montessori, 1948/2009, pp. 36-37.)
«
A finìva 'l an 1906. A era drē ch'a turnèva indrē da Milàṅ, indû i 'm ìven elèta a tōr pèrt a la distribusiòun di Prémi a l'Espośisiòun internasionêl, in dla sesiòun 'd pedagugìa siàintìfica e 'd psiculugìa sperimentêl. Dòunca al diretōr generêl edl Istitût di Bèin Stàbil ed Ròma al 'm invidèva a ciapèr in màṅ l'organiśasiòun ed scōli p'r i putèin da fèr-es in del cà popolèri. L'idéa bèla, l'era 'd mèt'r in órdin un quartēr pìn ed rifugiê e 'd ginta puvrèta, c'ma quêl ed San Lurèins a Ròma, indû na popolasiòun 'd un 30.000 abitànt l'era strichèda lè, in cundisiòun ch'i n's pólen gnanc cuntèr... Cal tîp specêl ed scóla chè al gniva ciamê col nòm incantèvol ed «Cà di Putèin». La prìma ed quisti chè a l'avrìven, cun cal nòm chè, al 6 'd śnêr dal 1907, in via di Mêrs, 53, e a mè i 'm dèven la responsabilitê edla diresiòun. L'importànsa socèla e pedagògica ed na têl istitusiòun la 'm s parèva davànti in tùta la só grandèsa e mè a insistìva in sìm'a quêl ch'a parìva èser na viśiòun, a cal tèimp lè eśagerèda, dal só futùr trionfêl; mo incō dimòndi agìnt i tachen a capìr che mè a gh'evdìva giùst.»
(MUD)


Na scóla Montessori mìsa in pē in Olànda, tolta śò in dal 1915.
Na scóla Montessori dal dè 'd incō.

Soquànti só óvri

1896-1909

  • Sul significato dei cristalli del Leyden nell'asma bronchiale, in Bollettino della Società Lancisana degli Ospedali di Roma, an XVI, fascìcol I, 1896.
  • Ricerche batteriologiche sul liquido cefalo rachidiano dei dementi paralitici, in Rivista quindicinale di Psicologia, Psichiatria, Neuropatologia, fascìcol 15, prìm ed disèmber 1897, pp. 1–13.
  • Sulle cosiddette allucinazioni antagonistiche, in Policlinico, an IV, vlùm IV, fascìcol 2, fervèr 1897, pp. 68–71 e fascìcol 3, mêrs 1897, pp. 113–124.
  • Intervento al Congresso di Torino, in Atti del Primo Congresso Pedagogico Nazionale Italiano, Turèin 8-15 setèmber 1898, curê da G. C. Molineri e G. C Alesio, Stabilimèint Tipogràfic dirêt da F. Cadorna, Turèin 1899, pp. 122-123.
  • Miserie sociali e nuovi ritrovati della scienza, in Il Risveglio Educativo, an XV, n. 17, 10 dicèmber 1898, pp. 130–132 e n. 18, 17 dicèmber 1898, pp. 147–148.

Soquànti scóli intitolèdi ala "Montessori" in gìr p'r al mònd

La Montesóri in sìm'a 'l chèrt da mìl franc di an Nuànta.
La munéda da 200 franc di an Utànta cun la ghigna dla Montesóri in dal dedrē.

Vōś lighèdi

Èter progêt=

Referèinsi

Colegamèint estèren