Luksika Kumkhum

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn


La Luksika Kumkhum tòlta śò a Wimbledon in dal 2010


La Luksika Kumkhum (a sa scriv ลักษิกา คำขำ in Tailandéś, Chantaburi, 21 ad Luj dal 1993) l'è na tenìsta tailandéśa ch'l'è stada la nùmar utànta-sèt dal mónd al 25 ad Nuvémbar dal 2013.

L'è élta 167 cm, la péśa 67 chilo e la dróa al bras dèstar. La tira drit e arvèrs cun tut e dū al maṅ.

In dla sò caréra l'à mis in bisàca òt tìtui ITF in tut.

Caréra

La Kumkhum la taca a pistàr i camp dal sircùit WTA in dal 2010 e in Utóbar la s mét in bisàca un tìtul a Pattaya, al nùmar dū, e pò la śōga anc tri finàli. In dal 2011 la in vins àtar siē e la s pòrta a la fiṅ d'l an a la puśisiòṅ 320 dal mónd.

In dal 2012 la próa a qualificàr-as par la prima vòlta in un turnèo WTA a Kuala Lumpur ma la pèrd a 'l tèrs tùran cun la Kristýna Plíšková par 3-6 4-6. In Setémbar la gh la cava a pasàr-i invéci a Cantòn ma pò la pèrd subìt a 'l prim tùran. Al méś dòp la sćiànca par 6-1 6-2 l'Eugenie Bouchard in d'l ùltim tùran dal qualificasiòṅ a Uśàka e pò la fà sudàr la Mirjana Lučić-Baroni purtànd-la a 'l tèrs sét. In Nuvémbar a Pune la riva in di quàrt dal turnèo WTA indiàṅ pardénd par 7-6 1-4 bandòṅ cun l'Elina Svitolina.

In dal 2013 la bat la Madison Keys in dal qualificasiòṅ 'd Auckland e pò la riva a 'l secónd tùran a gl'Australian Open baténd la Sofia Arvidsson 7-6 6-4 prima ad cédar a la Jamie Hampton. In Śnar la riva in di utàṿ a Pattaya City (7-5 2-6 2-6 da la Marija Kirilenko) e pò al méś dòp in di quàrt a Kuala Lumpur (7-6 4-6 1-6 da l'Ayumi Morita). In Avrìl la pòrta a cà la finàl d'l ITF ad Phuket, turnèo da vintsìnc-mila dòlar. In Utóbar la s férma in di utàṿ a Uśàka par maṅ dl'Eugenie Bouchard dòp avér dâ la paga a l'Ayumi Morita par 6-2 6-1. Fra Utóbar e Nuvémbar la śōga par dū vòlti a Taipei. La prima vòlta 'l è 'n turnèo ITF e la gh và mâl cun la Gioia Barbieri ch'la la manda a cà subìt par 4-6 4-6. La secónda vòlta invéci 'l è 'n turnèo WTA e lè lē la riva in semifinàl miténd in fila dū vìnsiti cun la Jaroslava Švedova e la Petra Martić ma pò la gh'à da cédar a la Yanina Wickmayer par 3-6 1-6. La finìs 'l an vinsénd 'l ITF ad Toyota in Giapòṅ baténd lung la via anc na śóvna Belinda Bencic.

In dal 2014 la śōga 'l qualificasiòṅ a Shenzhen e a Sydney ma la n i pasa minga, batùda par l'Anna-Lena Friedsam e par la Bethanie Mattek-Sands. A Melbourne però l'è bòna ad bàtar in tri sét a 'l prim tùran la nùmar siē dal mónd, la Petra Kvitová, par 6-2 1-6 6-4.

Culegamènt estéran