Laura Boldrini

Da Wikipedia.

C'l artìcul chè 'l è scrit in Miranduléś Emiliàn

Prim piàṅ dla Laura Boldrini


La Laura Boldrini (Maceràta, 28 'd Avrìl dal 1961, a s lèś [ˈlaura bolˈdriːni] in itagliàṅ) l'è na giurnalìsta, funsiunària e pulìtica itagliàna, presidènta dla Cambra di deputâ in dla XVII legiśladùra.

Da 'l 1998 a 'l 2012 l'à fat la portavóś d'l Élt cumisariâ dal Nasiòṅ Unìdi p'r i rifugiâ par 'l Európa dal Sud.

L'è stada spuśàda c'n al giurnalìsta Luca Nicosia e da 'l matrimòni sèg l'è nada na fiōla.

Biugrafìa

Fiōla 'd 'n avucàt e dn'insgnànta 'd art, tut dū 'd Matélica in dal Marchi, da pìcula la crés in dla campàggna 'd Jéśi andànd a scōla a Ancóna insém a na surèla e a tri fradèi più cic. In séguit la spatìna c'n i suo a Jéśi in du la ciàpa anc al diplòma a 'l lìceo clàsic.

In dl'Istâ dal 1981, a vint an, la decìd 'd andàr a lauràr par tri méś in un camp ad riś in Venesuéla e pò la s fà un gir in dl'Amèrica Sentràla tucànd anc Mèsic e Stat Unî. La Laura la decìd ad cuntinuàr i sò studi a l'università miténd-'g in mèś di viàś in gir p'r al mónd. In dal 1985 la s làurea in Giurisprudénsa a La Sapienza 'd Róma.

In dal 1989, dòp avēr vins un cuncōrs, la taca a lauràr par 'l ONU faghénd al servìsi stampa par la FAO pò da 'l 1993 a 'l 1998 l'è impgnàda in dal Prugràma alimentàr mundiàł e la fà soquànti misióni a 'l èstar. Da 'l 1998 a 'l 2012 l'à fat invéci la portavóś d'l Élt cumisariâ dal Nasiòṅ Unìdi p'r i rifugiâ par 'l Európa dal Sud (UNHCR, Regional Representation Southern Europe).

In dgl'Elesiòṅ pulìtichi itagliàni dal 2013 la s càndida cuma indipendènta in dal listi 'd Sinìstra Eculugìa Libertà, vgnénd elèta a la cambra in dla circuscrisiòṅ Sicìglia 2. Al 16 ad Mars dal 2013, a surpréśa, la vîṅ elèta presidènta dla Cambra di deputâ cun 327 vōt su 618.

Atàc persunài

Da cal mumènt lè a la Boldrini i gh in dìś'n ad tut i culōr, cun la réda ch'la gh dà dla putàna buchinàra, dla bruta rója e dgénd ch'l'à tacâ la caréra faghénd di buchèṅ a Umberto Smaila[1]. 'L èx cunsilēr dla Léga Nòrd ad Caśalgrànd Luciano D'Arcio al 23 ad Luj dal 2013 al dà adòs a la Cécile Kyenge, a Nicky Vendola e a la Boldrini dgénd "La minìstra négra, uciàda cumpàgna a 'n parasìta. Vendola abituâ a star a 90 grâd, la Boldrini i dìśan ch'la s prustituìs e ch'a gh'è la fila par ciulàr-la e a gh'è 'l caś ch'a sia mè ch'a n gh la caṿ minga a mandàr śò chi fat chè véra! Ma a n capìs briśa parchè gh'ò-j-a da prustituìr-um mè p'r al perversiòṅ sesuàli ad lì lōr, cajùsi"[2].

A 'l inìsi dal 2014 Beppe Grillo su 'l sò blog al dmanda a i suo “Csa farési vò in màchina cun la Boldrini?” ch'i gh rispóndan «A la mét a nuànta e pò a gh mét in dal cûl la sò campanèla», «A la pòrt in un camp rom e a la fag trumbàr c'n al cap vilàǵ», «A bruśarév la màchina dòp avēr guardâ bèṅ ch'i spurtèi i sìan srâ bèṅ» e «Subìt a inciuldarév faghénd-ag śbatar la tèsta su 'l cruscót, pò a m farmarév in autostràda e c'n un guinsàj a la lasarév tacàda a 'n guard rail»[3]. Al grilèṅ Sebastiano Palmiero al taca a dir su la sò paśna facebook ch'la Boldrini l'iva fat la ragàsa coccodè ma a n è briśa véra[4].

In dal Luj dal 2016 al leader dla Léga Nòrd Matteo Salvini al diś ch'l'è cumpàgna a na bàmbula ch'la s infìa[5]. In Nuvémbar la Boldrini la fà védar su facebook un campiunàri dgl'uféśi ch'la ricév (cuma “Ma n sucéd-al mai ch'un qualchidòṅ al la cópa a 'sta terurìsta chè?”, “A cōlp ad béga in ghigna a t turév!!!! Milf”, “Boldrini at sē na buchinàra andicapàda, và mò a cà, fà 'n quèl giùst na vòlta”), dmandànd-as se qvéla lè la s pōl batśàr libertà 'd espresiòṅ[6].

In dal 2017 i tàc'n a giràr p'r internet dal nutìsi falsi su 'l cònt ad sò surèla Luciana in du a s diś ch'la gh l'à cavàda a 'ndàr in pensiòṅ a trénta-sinc an cun déś-mila euro a 'l méś o ch'la gh'à 340 cuperatìvi ch'i faṅ i bèsi tgnénd adrē a i migrànt e ch'a s capìs bèṅ che ninsòṅ a in dascór[7]. La Laura la rispónd ch'i èṅ tuti bali anc parchè sò surèla l'è mòrta da soquànt an[8]. In séguit al presidènt dal grùp dla Léga Nòrd a 'l senàt, Gian Marco Centinaio, al mét in gir su Twitter la fóto 'd òṅ ch'al diś al sia 'l fradèl dla Boldrini ch'la 'l arév fat numinàr diretōr generàł dal sènt'r ad coordinamènt dal regiòṅ par 47mila euro 'l méś e gnanc un TG a in dascór. Ma l'è na bala tuta invintàda, un schèrs a sò dita[9].

Al fraréś crìtic 'd art Vittorio Sgarbi al gh dà dla cavra e dla suca vōda parchè la vrév ch'in itagliàṅ i s druìsan dal paròli p'r al fémni ch'i fànan sèrt mistēr cuma l'inśgnēra e la minìstra [10], un quèl che fra 'l àt'r a gh'è bèla in emigliàṅ. In Luj 'l atōr Fabrizio Bracconeri al gh dà adòs su twitter dgénd «A gh'arévan da piciàr-uv tut esénd ch'a pinsâ sōl a i cas vòstar e di clandistèṅ!!! MALNÉT»[11]. In Agóst, dòp 'l atintâ su la rambla a Barcelóna, al giurnalìsta rus Nicolai Lilin al diś ch'l'è amìga di terurìsta[12] mént'r al giurnalìsta d' Il Giornale Paolo Giordano al scriv un tweet in du 'l diś che «La Boldrini i la spétan su la Rambla»[13]. Dū stmani dòp al segretàri sitadèṅ dal partî Nuàtar cun Salvini 'd San Śvan Rutónd Saverio Siorini al s admànda “Ma a la Boldrini e a 'l dóni dal PD, quànd a gh'arà da sucédar?” intendénd la viulénsa sesuàla[14]. Al méś dòp al sìndig ad Pontinvrèa, al leghìsta Matteo Camiciottoli, al gh àugura i strupradōr in cà (“A prém dar-ag gl'arèst a dumisìli a cà dla Boldrini, giusà, a gh'è 'l caś ch'a gh méta 'l surìś... csa dgî vò?”) e pò al gh dà dla buśiàrda[15]. Anc l'asesōra dal Muimènt Sinc Stéli dal cumùṅ piemuntéś ad Venària, la Claudia Nozzetti, la s àugura 'n quèl dal gènar dascurénd dla dmanda dla Pulògna 'd avēr lōr i quàtar stupradōr 'd Rìmin («I aṅ fat bèṅ a ciamàr-i indrē, a spēr ch'i i custrìnś'n a tajàr-'s-al via òṅ cun c'l àt'r e a far-'g-al magnàr... i puvrét scapâ via da 'l guèri e biśugnóś 'd acugliénsa e 'd afèt... O sinò dâ-i in cura a cà dla Boldracchia»)[16].

Par difénd'r-as da chi atàc chè ch'la patìs, l'à dit ch'la denunsiarà la gint ch'la scriv di mesàǵ viulènt su 'd lē[17].

Culegamènt estéran

Nòti

  1. ↑ Dla Boldrini a 'rcurdarém sōl gl'uféśi ch'l'à ciapâ Il Giornale, 26 ad Nuvémbar dal 2016
  2. ↑ Kyenge, sènt dè 'd insûlt L'Espresso, 19 'd Agóst dal 2013
  3. ↑ Grillo su 'l blog: “Csa farési vò in màchina cun la Boldrini?”. Fans scadnâ Oggi Notizie, 1 ad Favràr dal 2014
  4. ↑ La Laura Boldrini balarìna Coccodè, la bùfala di grilèṅ la fà 'l gir dal web Huffington Post, 10 ad Favràr dal 2014
  5. ↑ Salvini al séggna na bàmbula ch'la s infìa: "Ca-la chè la sòśia dla Boldrini" Adnkronos, 25 ad Luj dal 2016
  6. ↑ Al post choc dla Boldrini su Fb: «Ca-li chè gl'uféśi ch'a ricév» Il Mattino, 25 ad Nuvémbar dal 2016
  7. ↑ Felice Di Rocco: "A m pintìs di càncar tirâ a la Boldrini, cónt'r al bùfali a sém indiféś" La Repubblica, 15 'd Avrìl dal 2017
  8. ↑ L'arlìa dla Boldrini su 'l web: "I uféndan mè surèla ma l'è mòrta da di an" La Repubblica, 14 'd Avrìl dal 2017
  9. ↑ Al leghìsta Centinaio al stramna dal fake news su Facebook, in dal mirèṅ sèmpar la Laura Boldrini La Stampa, 13 'd Utóbar dal 2017
  10. ↑ Sgarbi al dà adòs a la Boldrini: "Basta paròli cambiàdi p'r al fémni, at sē na cavra" Il Giornale, 3 ad Śnar dal 2017
  11. ↑ Bracconeri cóntar la Laura Boldrini su Twitter: “A gh'arévan da piciàr-uv tut esénd ch'a pinsâ sōl a i cas vòstar!” Il Fatto Quotidiano, 29 ad Luj dal 2017
  12. ↑ Barcelóna, Nicolai Lilin al dà adòs a la Boldrini: "Terurìsta amìg suo" Il Giornale, 18 'd Agóst dal 2017
  13. ↑ E 'l giurnalìsta Paolo Giordano al vrév «La Boldrini su la Rambla» Giornalettismo, 18 'd Agóst dal 2017
  14. ↑ Stùpar, quànd è ch'a tóca a la Boldrini? Siorini casâ via da Nuàtar cun Salvini Il Secolo d'Italia, 28 'd Agóst dal 2017
  15. ↑ Dòp avēr-'g augurâ i stupradōr in cà, al sìndig al gh dà dla buśiàrda a la presidènta Boldrini La Repubblica, 5 ad Setémbar dal 2017
  16. ↑ Venària, l'asesōra grilìna su Facebook: "I stupradōr ad Rìmin? Ch'i i custrìnś'n a tajàr-'s-al via" La Repubblica, 7 ad Setémbar dal 2017
  17. ↑ Boldrini cóntar gl'haters: "Adès abàsta, a v denùnsi" Il Giornale, 14 'd Agóst dal 2017

Àtar prugèt

Estratto da "https://eml.wikipedia.org/w/index.php?title=Laura_Boldrini&oldid=134007"