Cougar

Da Wikipedia.
C'l artìcul chè 'l è scrit in Miranduléś Emiliàn
L'Eva Grimandi ch'l'à fat part dal grup dal Cougar in dal prugràma Pechino Express


La Cougar (ch'a vōl dir “Puma” in Emigliàn, a s lèś /ˈkuːɡə/ in Ingléś) l'è na dóna madùra ch'in dal gèrg americàṅ e britànic la dà la casa a i masć śōvan e ch'la s cumpòrta cuma na magna-óm[1]. La paròla l'è stada druàda in cla manéra chè par la prima vòlta in Cànada. In Itàglia i li ciàm'n anc tardóni o panteróni.

In gènar l'è na paròla ch'la s riferìs a cal dóni fra i Quarànta e i Sinquànt' an[2][3] anc se però i n èṅ minga tut 'd acòrd: par 'l ABC News la paròla "cougar" la figùra dal dóni ch'i vàn'n a lèt cun di óm ch'i gh'àṅ almànc nóṿ an manc[2] mént'r al New York Times e Vogue i la dróan par descrìv'r al dóni ad sōvar di quarànta ch'i péscan rabìdi di masć fra i vint e i trénta da ciulàr-as[3][4]. Par qvéi 'd La Repubblica p'r a n èsar minga cumpatìdi da la gint, al cougar i gh'aṅ 'd avér interès sōl p'r i óm ch'i gh'aṅ almànc la mità di sò an più sèt[5], secónd la fórmula:

in dua eM i èṅ i an di masć e eF i èṅ i an dla fémna cougar. Par far 'n eśèmpi quànd l'atōra Jennifer Aniston la s éra misa a quarànt'an c'n al cantànt John Mayer ad trént'òṅ, l'iva fat un quèl che la società la psiva anc cumpatìr-as parchè 40 divìś 2 più 7 a fà vint-sèt ch'l è più bas di an dal sò óm.

Foravìa la paròla la pōl andàr bèṅ in gènar anc par tut cal dóni ch'i s métan c'n un ragàs dimóndi più śōv'n ad lē[6][7]: 'l è par qvést che soquànt star 'd Hollywood, cuma la Demi Moore durànt la sò stòria cun Ashton Kutcher, i èṅ stadi batśàdi cuma dal cougar. Àtri cougar famóśi in gir p'r al mónd i èṅ la Lory Del Santo, la Madonna, la Valeria Golino, la Corinne Clery, la Susan Sarandon, la Mariah Carey, la Jennifer Lopez, la Courteney Cox e la Giuliana De Sio[8].

Al Puma, la bèstia ch'la dà 'l nóm a 'l “Cougar”
Quàdar 'd Lucas Cranach al Vèć da 'l tìtul La còpia minga misćiàda bèṅ

Al presidènt francéś Emmanuel Macron al gh'à na mujér più vècia 'd lò 'd vint-quàt'r an, la sò èx mistra 'd létri a i tèmp dal lìceo Brigitte Trogneux, ch'i sò aversàri i aṅ batśâ cuma na “cougar ambisióśa”[9].

La psicòluga Chiara Simonelli l'à definî la cougar cuma la "cartìna ad turnasōl dla società ucidentàla e dla cundisiòṅ nóva dla fémna" in dua anc a cal dóni 'l è parmìs 'd avér di muróś dimóndi śōvan[10].

In tut al manéri un studi su vintadū-mila dóni ad quatórdas paéś fat da l'Università metrupulitàna ad Cardiff su la difarénsa in di an in dal còpi 'l à stabilî che quànd che lōr i vàn'n in sla réda internet a pascàr di incóntar, in gènar i vōlan catàr di óm più grand o grand cumpàgn a difarénsa di masć ch'i péscan dal dóni più śōvni[11].

Tgnénd adrē a na risérca dal 2017 'd un sit specialiśâ, in Itàglia al cougar più inśgórdi i èṅ al milanéśi ch'i gùs'n in mèdia duśènt vòlti 'l an méntar qvéli più malnéti ch'i n gh'aṅ vargóggna 'd gnint i èṅ qvéli dl'Emìglia-Rumàgna[12].

At pó dar 'n òć anc a...

Culegamènt estèran

Nòti