John McCain

Da Wikipedia.
C'l artìcul chè 'l è scrit in Miranduléś Emiliàn
John McCain tòlt śò in dal 2009


John Sidney McCain III, cgnusû méj cuma John McCain (Colón, 29 'd Agóst dal 1936) 'l è 'n imprendidōr, 'n èx capitàṅ 'd marìna e 'n pulìtic americàṅ, senadōr d'l Ariśòna da 'l 1987 e candidâ presidènt in dal 2008 p'r al Partî Republicàṅ.

Cunservadōr in dal pinsēr, 'l à da spés tgnû a drē a la sò tèsta piutòst ch'a qvél ch'al gh dgiva 'l sò partî cuma in dal 2017 quànd 'l à vutâ cóntar la prupòsta ad scanślàr dal tut, ma anc sōl in part, la léǵ dla salùt ciamàda Obamacare[1].

In dal luj dal 2017 i mèdag i gh'aṅ catâ 'n brut cànc'r a 'l sarvèl.

Biugrafìa

Nâ in Pànama da na famìja 'd cunservadōr, da śōvan McCain al crés in dal nòrd dla Virgìgna in du al stùddia a la scōla episcupàla 'd Alexandria par pò iscrìv'r-as a l'acadèmia navàla 'd Annapolis (Maryland). Dòp ès'r-as laureâ in dal 1958 al s trasferìs a Corpus Christi par tacàr 'n adestramènt ad dū an cuma pilòta.

In dal 1965 al sa spóśa cun la mudèla dla Pennsylvania Carol Shepp, pò dū an dòp al partìs par la guèra in Vietnam. Chè al pasa siē an parśunēr di Vietcong dòp ch'al sò aparéć 'l è butâ śò mént'r al vulàva 'd sōv'r a Hanoi. Al la scampa anc s'l armàgn frî e uféś a i bras, pardénd anc vint-a-tri chilo. Turnâ a cà, 'l è custrét a uperàr-as par tri vòlti.

McCain e la Sarah Palin in dal 2008 a la Convention republicàna dal Minneśòta

In dal 1980 al divòrsia spuśànd n'insgnànta fiōla 'd 'n imprendidōr dla bira, la Cindy Lou Hensley. Druànd anc i bèsi 'd sò mujér al gh la cava a tacàr na caréra pulìtica p'r al Partî Republicàṅ vgnénd elèt in dal 1982 deputâ e pò in dal 1987 senadōr d'l Ariśòna.

In dal 2000 al s càndida a 'l primàri dal sò partî par dvintàr presidènt di Stat Unî ma al li pèrd cóntar George W. Bush. A gh và méj òt an dòp ma insém a la sò vice, la Sarah Palin, al patìs na scòpla a gl'elesiòṅ da 'l demucràtic Barack Obama ch'l è bòṅ ad vìns'r anc in Indiàna, in Nebràska (secónd distrét cungresuàł) e in dla Carulìna dal Nòrd.

Culegamènt estéran

Nòti