Janet Leigh

Da Wikipedia.

C'l artìcul chè 'l è scrit in Miranduléś Emiliàn

La Janet Leigh tòlta śò in dal 1954


La Janet Leigh, nóm 'd art dla Jeannet Helen Morrison (Merced, 6 ad Luj dal 1927 - Beverly Hills, 3 'd Utóbar dal 2004) l'è stada n'atōra e scritōra americàna.

Màdar dgl'atōri Kelly e Jamie Lee Curtis, abùdi da 'l culéga Tony Curtis, l'è cgnusùda specialmènt p'r avēr fat la part dla Marion Crane in dal film Psyco (1960) 'd Alfred Hitchcock, rōl ch'al gh'à frutâ 'n Golden Globe e na nomination a i Prèmi Òscar.

Biugrafìa

Uriginària dla Califòrgna, la Leigh la s davśìna a 'l mónd dal cìnema a la fiṅ di an Quarànta quànd l'atōra Norma Shearer, védva dal prudutōr dla Metro-Goldwyn-Mayer Irving Thalberg, la gh buta gl'òć adòs vdénd-la in un sènt'r ad muntàggna durànt na vacànsa.

La Janet la mòla acsè i sò studi 'd mùśica e 'd psiculugìa p'r andàr a Hollywood a giràr al sò prim film, La cavalcata del terrore. In dal 1949 la fà la part dla Meg March in dal film Piccole donne ad Mervyn LeRoy, trat da 'l rumànś dla Louisa May Alcott. In dal 1953 la rècita in Il mago Houdini insém a Tony Curtis, spuśâ dū an prima, pò in dal 1958 la lavóra cun Orson Welles in dal noir L'infernale Quinlan e cun Blake Edwards in In licenza a Parigi.

In dal 1960 l'è prutagunìsta insém a Anthony Perkins e a la Vera Miles dla pelìcula Psyco 'd Alfred Hitchcock in du l'è fata fóra a mità film scurtlàda sóta la dócia. Dū an dòp l'è la vòlta ad Va' e uccidi, film dramàtic ad John Frankenheimer cun Frank Sinatra. In dal 1966 la fà la mujēr ad Paul Newman in dal pulisiésc Detective's Story.

In dal 1972 la gira 'l film ad scarésa La notte della lunga paura su di cunèṅ sasèṅ. La Leigh la tórna a recitàr in pelìculi dal terōr in dal 1980 cun The Fog ad John Carpenter e in dal 1998 cun Halloween - 20 anni ad Steve Miner.

Filmugrafìa

Insém a Hitchcock su 'l set ad Psyco
La Leigh da śōvna
Un sò surìś
Insém a la Vera Miles e a John Gavin
Insém a 'l sò fiōli Kelly e Jamie Lee

Culegamènt estéran

Àtar prugèt