Hornedjitef

Da Wikipedia.

C'l artìcol chè 'l è scrit in Carpśàn Emiliàn

Al cuêrć dal sarcòfeg 'd Hornedjitef, tgnû da cât in dal British Museum ed Londra.

Hornedjitef 'l era stê 'n prēt in dal tàimpli 'd Amon ed Karnak sòt'a 'l règn ed Tolomèo III ''Evergēt'' (246-222 prìma 'd Crìst).
I só rêst e 'l só sarcòfeg, dôp avér-i tolt fóra coi schêv archeològic, egl'ìn tgnû da cât a 'l British Museum ed Lòndra da quèśi du sécol.
Na divulgasiòun sieintìfica in sìm'a lò e ala só mùmia la tulìva 'l inìsi del traśmisiòun ala BBC che 'l diretōr dal Muśèo Neil MacGregor 'l ìva mìs sù in dal 2010[1].

La stòria dla só mùmia

In dal 1835, quand che la mùmia la 'rivèva a 'l British Museum, a nn'era mìa dimòndi an ch'l'era stèda decifrèda la scritùra egìsia, e dòunca i studiōś i gh'la cavèven 'd léśer subìt al só nòm scrìt atâc a 'l cuêrć dal sarcòfeg più intèren.

Difât la só bèra la cunprènd un sarcòfeg più grôs e scûr ded fóra, e 'n sarcòfeg intèren più sutîl e tùt decorê 'd scrìti, pitùri, e 'd ôr in dal disègn edla ghìgna piturèda lè in sìma. El pitùri cun anc la màpa dal strèli in cēl, el scrìti màgichi atâc a 'l sarcòfeg, insèm a dimòndi portafurtùna lughê in soquànt pôst stratègic 'd sòt'a 'l bendi, i duvìven cunpagnèr e protéger al prēt in dal só difìcil viâś dôp edla mort.

Tùta la cura e l'atensiòun per la cunservasiòun edl Hornedjitef môrt, i fàn capìr che cal prēt chè 'l era dimòndi rìc e considerê da chi gh'stèva śvèin.

I eśàṁ sieintìfic coi machinàri rafinê dal dè 'd incō i gh'l'àn cavèda 'd catèr che 'l personâǵ 'l era mort dôp edla mèśa etê e ch'al gh'ìva n'artrît cun dal mêl in dla schìna.

Vōś lighèdi

Bibliugrafìa

  • (EN) J. Mack (ed.), Masks: the art of expression, The British Museum Press, Londra, 1994.
  • (EN) S. Walker, S. et M. Bierbrier, Ancient faces: mummy portraits, The British Museum Press, Londra, 1997.
  • (EN) Nigel Strudwick, Masterpieces of Ancient Egypt, British Museum Publications, Londra, 2006.
  • (IT) "La storia del mondo in 100 oggetti", dal Neil MacGregor, ed. Adelphi, Milàṅ, 2012.

Colegamèint estèren

Noti e referèinsi

  1. "La storia del mondo in 100 oggetti" ed. Adelphi 2012, al lìber tradòt da 'l ingléś a 'l riguêrd.