Finley

C'l artìcul chè 'l è scrit in Miranduléś

Al cantànt Marco Pedretti dit Pedro tòlt śò a Milàṅ in dal 2007

«

Sarà il tempo a dire che stai benissimo così, certi sbagli fanno crescere, non fanno male, pochi giorni e tutto tornerà normale, ma non svaniranno mai, resteranno sempre i tuoi, ricordi di un anno, momenti che ti lasciano un sorriso.»

(IT)(Ricordi, 2008)

«

A sarà al tèmp a dir ch'at stà dimóndi bèṅ acsè, sért śbali i faṅ crésar, i n faṅ minga mâl, pôc dè e a turnarà a pòst incòsa, ma i n spariràṅ mai, i armagn'ràṅ sémp'r i tuo, arcòrd 'd 'n an, mumènt ch'i t làs'n un surìś.»

(MUD)

I Finley i èṅ un grup rock itagliàṅ, furmâ a Legnàṅ in dal 2002. I mémbar dal grup i èṅ Pedro (vóś), Ka (chitàra), Dani (baterìa) e Ivan (bas). In dla lōr caréra i aṅ fat vgnir fóra sinc àlbum in studi e vindû da piò ad tarśènt-mila còpi in tut.

Biugrafìa

Al grup al nas in dal 2002 quànd soquànt studènt dal licèo Galileo Galilei ad Legnàṅ i s mét'n insém sarnénd al nóm ad batàja ad Junkies (Drugâ pódag). Dòp avér fat vgnir fóra un EP (Simply a demo) i càmbian nóm in Finley tulénd in prèst al cugnóm 'd un śugadōr ad basket, Michael Finley.

Cun al braṅ Make up your own mind i s faṅ cgnósar par Claudio Cecchetto, prudutōr ad Jovanotti, di 883 e tant àtar, ch'l i tōś sèg e ch'al gh fà vèr'r i cuncèrt ad Max Pezzali e incìdar al lōr prim sìngul. Al 31 ad Mars dal 2006 i fànan vgnir fóra al sò prim àlbum Tutto è possibile (Tut 'l è pusìbil), cun al stès nóm dla sò prima canta, par qvéi dla EMI/Capitol Records.

In dal 2007 'l è al tùran 'd Adrenalina (Drinalìna) ch'al gh parmét ad sunàr anc a 'l èstar. In dal 2008 i vàn'n a Sanremo cun al pès Ricordi e i finìsan quìnt. In dal 2010 i faṅ catàr in di negòsi al disc Fuori! (Fóra!) e pò in dal 2012 àtar dū, Fuoco e fiamme (Fōg e vampi) e Sempre solo noi (Sèmpar sōl nuàtar).

Discugrafìa

Àlbum in studi

2006 - Tutto è possibile
2007 - Adrenalina
2010 - Fuori!
2012 - Fuoco e fiamme
2012 - Sempre solo noi

EP e Arstàmpi

2006 - Tutto è possibile Special Edition
2008 - Adrenalina 2
2009 - Band at work - EP

Culegamènt estéran

(IT) Al sit uficiàl