Creepshow
|
C'l artìcul chè 'l è scrit in
Miranduléś |
 Creepshow
| ||
| Creepshow | ||
 E.G. Marshall in na figùra dal film | ||
| Spetàcul da śgriśōr 1982 | ||
|---|---|---|
| Regìa: George A. Romero | ||
| Scritōr: Stephen King | ||
| Atōr: Adrienne Barbeau • Joe King • Ed Harris E.G. Marshall • Hal Holbrook • Ted Danson Leslie Nielsen • Fritz Weaver • Viveca Lindfors Stephen King • Gaylen Ross • Jon Lormer | ||
| Müsica: John Harrison | ||
| Léngua: Ingléś | ||
| Dürä dal film: 120 minüt | ||
| Nasiōṅ: Stat Unî | ||
Creepshow (Spetàcul da śgriśōr) 'l è 'n film ad scarésa a epiśòdi dal 1982 ad George A. Romero trat da 'n sugèt ad Stephen King a partìr da di fumét ad scarésa dla EC Comics publicâ in di Stat Unî in di an Quarànta e Sinquànta. 'L à fat sù da piò ad vint-i-òṅ migliòṅ ad dòlar esénd-an custâ sōl òt.
Al gh'à abû dū séguit: Creepshow 2 dal 1987 e Creepshow 3 dal 2006.
Sunt
Stan (Tom Atkins), pàd'r ad famìja, al bèca sò fiōl pìcul Billy (Joe King) lèśar di giurnalèṅ ad scarésa dla sèrie Creepshow. Dòp ès'r-as litgâ sèg al i buta via in dal rusc e pò al và a punsàr in sal divàṅ cardénd 'd ès'r a pòst. Billy al dmanda a i persunàǵ dal fumét ad vindicàr-al e, magicamènt, lì lōr i tōśan vita muciànd-as pò 'd intór'n a la cà.
Prim epiśòdi: La fèsta dal papà
Nathan Grantham (Jon Lormer), cupâ soquànt an prima par sò fiōla Bedelia (Viveca Lindfors), al tórna da 'l mónd di mòrt al dè dla fèsta dal papà pròpria quànd lē e chi àtar parènt i mét'n insém p'r arcurdàr-al. Nathan al s fà giustìsia e pò al magna la tórta.
Secónd epiśòdi: La mòrt da par lò ad Jordy Verrill
Un minciòṅ 'd un cuntadèṅ, Jordy Verrill (Stephen King), al cata na sira un meteurìt pìcul ch'l è cascâ śò in dal sò sit. A 'l inìsi lì lò 'l è tut cuntènt cardénd ad psēr-ag far di bèsi ma pò a sucéd che Jordy al taca a dvintàr 'n àrbul pîṅ ad fój e 'l ùnic quèl ch'al pōl far 'l è qvél ad sparàr-'s in bóca.
Tèrs epiśòdi: Marèa élta
Richard Vickers (Leslie Nielsen), un marè ch'al n è minga tant a pòst, al decìd ad far-'g-la pagàr a sò mujér Becky (Gaylen Ross) parchè la gh mét i còran c'n al sò amànt Harry Wentworth (Ted Danson). Par vindicàr-as al i saplìs in dla spiàgia in fiṅ a 'l còl spétand pò ch'la marèa la faga 'l sò efèt andgànd-i. Ma cla nòt lè 'l óm al n pōl minga gudēr-as tròp la sò traplàda parchè chi àtar dū i tórnan da lò cuma di śómbi mój pódag e i al custrìnśan a far na fiṅ cumpàgna a la lōr.
Quàrt epiśòdi: La casa
Al prufesōr Henry Northrup (Hal Holbrook) al vèṅ in pusès dna vècia casa lugàda in dal sótscàla dl'Università da piò ad sènt an in dua a gh'è dènt'r un móstar ch'al magna la gint. Prima ad casàr-la via lò al vrév druàr la bistiàsa par far fóra cla petégla imbariagòsa ad sò mujér, la Wilma (Adrienne Barbeau), ch'la gh stà sèmp'r adòs. Dòp avér-'g-la cavàda al fà par butàr via incòsa śò in dal lâg ma in dal far-al la casa la s vèra ciapànd incòst a di scòj.
Quìnt epiśòdi: I t tràś'n adòs
Upson Pratt (E.G. Marshall) 'l è 'n vèć tarulî pîṅ ad bèsi ch'al gh'à la manìa dal pulî. Par cal mutìṿ chè al s è ardùt a vìv'r in 'n apartamènt asètic e cun di guànt sèmp'r adòs. Al n s cumpatìs pròpria briśa gl'insèt e quànd al véd 'n scarafàś cùrar in dla sò cuśìna al và fóra 'd tèsta. Ma tacàr na guèra cun cal bestiulìni lè a pōl èsar periculóś s'i èṅ di migliòṅ.