Creepshow 2
|
C'l artìcul chè 'l è scrit in
Miranduléś |
 Creepshow 2 | ||
 La Page Hannah in na figùra dal film | ||
| Spetàcul da śgriśōr 2 1987 | ||
|---|---|---|
| Regìa: Michael Gornick | ||
| Scritōr: Stephen King • George A. Romero | ||
| Atōr: Dominick John • Tom Savini • Philip Dore George Kennedy • Daniel Beer • Holt McCallany Page Hannah • Frank Salsedo • Paul Satterfield Dorothy Lamour • Lois Chiles • Richard Parks Stephen King • Jeremy Green • Tom Wright | ||
| Müsica: Les Reed • Rick Wakeman | ||
| Léngua: Ingléś | ||
| Dürä dal film: 89 minüt | ||
| Nasiōṅ: Stat Unî | ||
Creepshow 2 (Spetàcul da śgriśōr 2) 'l è 'n film ad scarésa a epiśòdi dal 1987 ad Michael Gornick trat da 'n sugèt ad Stephen King. 'L è al séguit dal film Creepshow dal 1982 ad George A. Romero che chè al firma la senegiadùra.
'L à fat sù quatòrdas migliòṅ ad dòlar esénd-an custâ sōl tri e mèś. In dal 2006 al gh'à abû un séguit minga uficiàł, Creepshow 3.
Sunt
[mudéfica la surzéia]Billy (Dominick John), un baghét cun la pasiòṅ di fumét ad scarésa, na vòlta cumprâ 'l nùmar nóṿ dal giurnalèṅ Creepshow, lung la via p'r andàr a cà al s véd rivàr cóntar quàtar bui ch'i al vōlan piciàr. Dòp èsar scapâ via al i pòrta in un parc bandunâ in dua 'l iva samnâ dla scménsa dna piànta magnaóm che pò la i magna tut òṅ dòp c'l àtar.
Prim epiśòdi: Vèć cap Cô 'd Légn
[mudéfica la surzéia]Davànti a 'l negòsi ad Ray Spruce (George Kennedy) e ad sò mujér Martha (Dorothy Lamour) a gh'è na statṿa ad légn 'd un cap indiàṅ. Un dè soquànt delinquènt i rìvan lè e i gh pòrtan via di quèi 'd valōr. La statṿa la tōś vita e la i và a pascàr òṅ a òṅ par giustàr al ròbi e tōr indrē qvél ch'i ìvan rubâ. La matìna dòp al cap indiàṅ al s cata sèmp'r in dal sòlit pòst ma 'sta vòlta in maṅ al gh'à i cupét di bandî.
Secónd epiśòdi: La śatra
[mudéfica la surzéia]Quàtar studènt piutòst purcùs, Deke (Paul Satterfield), la Laverne (Jeremy Green), Randy (Daniel Beer) e la Rachel (Page Hannah), i decìd'n ad pasàr na giurnàda a 'l lâg e anc s'a fà fréd i vaṅ in dl'àqua listés par nudàr. Vdénd na śatra sénsa ninsòṅ insìma, i gh mòntan sù e pò i faṅ a mènt che tut 'd intór'n a gh'è na paparùcia ch'a pâr na guma 'd òli misć a petròli. La Rachel la gh finìs in mèś e la gh'à la manéra ad pruàr in sla sò pèla che cal lìquid lè 'l è viṿ e ch'al gh'à anc fam parchè al la magna dasfànd-la dòp avér-la intraplàda dèntar. P'r i quàtar a n gh'è mia scamp.
Tèrs epiśòdi: 'L óm ch'al dmandàva 'n pasàǵ
[mudéfica la surzéia]Na dóna 'd afâr ch'la s ciàma Annie Lansing (Lois Chiles) la gh'à 'l visi 'd purtàr-'s a lèt di óm pagànd-i anc s'l'è bèla spuśàda e dònca a sarév méj ch'l'armagnìs a cà a far al sufrìt invéci 'd andàr in gir a far la malnéta. Na nòt, méntar l'è drē a turnàr a cà, la mét sóta òṅ ch'al dmandàva 'n pasàǵ in màchina (Tom Wright) e la 'l cópa sénsa vlēr. Par paùra che sò marè al pòsa vgnir a savēr ch'la gh mét i còran, lē la tira drit sénsa farmàr-as. Par la dóna a taca acsè na nòt pîna 'd arbgàt parchè la gh'à sèmp'r in di òć la ghigna dal mòrt.