Coop Consumatori Nordest
|
C'l artìcul chè 'l è scrit in
Arzân |
Coop Consumatori Nordest ( o, pió a la cûrta, Coop Nordest) l'é òna dal 9 grôsi coperatîvi ed cunsóm dal sistēma Coop, e cme têla la fà pêrt ed l' ANCC ( Associazione Nazionale Cooperative di Consumo) ed la Lēga dal Coperatîvi e al cunsōrsi coperatîv Coop Italia.
Insèm al coperatîvi Coop Adriatica e Coop Estense e al coperatîvi mzâni Coop Casarsa, Coop Eridana, Coop Reno e Coop Veneto (e pió a soquânti coperatîvi céchi in Emélia-Rumâgna, Trivènet, Mêrchi e Abrós) la fà pêrt al Distrèt Adriâtich.
Un pô de stôria
Introdusiòun
La Coop Consumatori Nordest l'é nêda int al 1995 a Rèz, atravêrs l'uniòun in Coop Nordemilia ed Coop Consumatori Friuli-Venezia Giulia e al câmbi ed ragiòun socêla, gnû dôp, da Coop Nordemilia a Coop Consumatori Nordest. Sté dō coperatîvi, tóti dō ed grandèsa tr' al mzân e al grând, în al rişultê ed divêrsi uniòun tra coperatîvi céchi ind i relatîv teritôri.
Nâsita e şvilóp ed Coop Nordemilia
Al cōr principêl ed Coop Nordemilia l'é stêda la Coop Reggio, ch' la s'é costituîda int al 1971 da l'uniòun dal tantésimi coperatîvi cèchi ch' a gh'ēren ind la pruvîncia ed Rèz, per urganişêr al sistēma ed la coperasiòun a livèl pruvincêl, cme l'ēra sucès ânca in divêrsi pruvînci ed l' Emélia-Rumâgna. D'arcurdêr che al muvimèint coperatîv arzân l'é sèimper stê a la vanguêrdia ed la mudernişasiòun: int al 1963 (préma che nasés Coop Reggio) a Rèz l'ēra stê inaugurê Coop 1, al prém grôs supermarchê ed tót al sistēma Coop, cun 'na larghèsa ed 1.400 m2.
Ind l' aşvèina pruvîncia ed Pèrma, sèimper per unîr al coperativi céchi preşèinti, a metê d' j ân e-sânta a 's é costituî l' l'Unione Parmense delle Cooperative di Consumo (Upcc), ch' al fêva la scōrta per mèz dal cunsōrsi coperatîv arzân, e dôp al lavurêva sèimper di pió cun Cop Rèz.
Int al 1974 Coop Reggio e Upcc a 's unésen acsé l' é nasûda la Coop Nordemilia, che dôp l'à tirê dèinter soquânti coperativi dal piaşintèin ( tra còsti la Cop ed Fiurinsôla) e CopMântva, a só vôlta nasûda int al 1971 da l' uniòun ed divêrsi coperatîvi dal Mantvân.
Dôp soquânt ân ed sistemasiòun în cumincêdi divêrsi ativitê, tra còsti al "Giurnêdi di zôven consumadōr" e divêrsi campâgni cûntra la şagerasiòun di vlèin e al zûnti int al magnêr. Int al 1989 l'à avêrt al prém Ipercoop, al Centro Torri ed Pèrma, ch' l' é stê ûn di prém in tóta Itâlia.
L'é cumincê un lavōr de şlergamèint int al Vènet: int al 1990 per mèz ed 'na socetê cuntrolêda lé stê tirê dèinter l' Unicoop veneto, ch' l' êra nêda vêrs la metê d' j ân Otânta da l'uniòun ed divêrsi coperatîvi dal Venét Orientêl, mó ch' la gh' avîva 'na delichêda situasiòun cunômica; ind l'istès ân è stê tirê dèinter ânca 'na Cop ed Montichiari (BS). Int val 1992 l'à avêrt 'n'êter Ipercòp, al Virgilio ed Mântva e, a l'ân dôp, l'à avêrt ânca L'Ariosto ed Rèz.
Nâsita e şvilóp ed Coop Friuli-Venezia Giulia
Al cōr ed la Coop Consumatori Friuli-Venezia Giulia l'é stêda la Cop ed cunsóm ed Borgomeduna, ch' l' à avêrt al prém supermarchê a Maniago int al 1980 e ind i quât'r ân dôp a n'à avêrt êter 5. La Coop Consumatori Friuli-Venezia Giulia l'é nêda int al 1985 ind l' unîr a la Cop Bergomeduna êtri coperatîvi, tra còsti la Cop ed Buttrio, soquânti Cop 'd Udine, ed Monfalcòun e 'd Gorésia. A s' é rivê acsé a 'n' uniòun ch' la cuntêva 24 negôsi e cîrca 120.000 sôsi. Ânca Coop Consumatori Friuli-Venezia Giulia la lancê divêrsi campâgni per i consumadōr e la ducasiòun a i cunsóm.
L' uniòun cun Coop Nordemilia an n'é mìa nasûda per quistiòun ed deblésa, mó per purtêr al mâsem e dêr valōr a l'uşânsa coperatîva ed i ân indrē.
Nâsita e şvilóp ed Coop Nordest
Int al 1954 acsé a 's é rivê a l'uniòun tra Coop Nordemilia e Coop Consumatori Friuli-Venezia Giulia, ch' é stê fât la Coop Consumatori Nordest. Ind al nōva coperatîva é stê tirê dèinter ânca la socetê Alimentari e Bricò, ch ' l' ēra controlêda da Cop Nordemélia e ch'la tgnîva a drē i negôsi ed la vècia Unicoop Veneto.
La nōva socetê l'é rivêda a 300.000 sôsi e 81 negôsi, mó a l'inési a gh'é stê da dificoltê d'adatamèint e di câl ed rèişa, d'ed là a ritêrd per fêr al piân de şvilóp. Int al 1999 a se gh'lé cavêda a arnuvêr al sistēma comercêl, ch' l' é finî tr'al 2001 e al 2002.
În gnû acsé avêrt diêter Ipercòp: La Favorita ed Mântva, pó int 2003 Isonzo ed Gradisca Isonzo (GO), ch' l'é stê al prém Ipercòp dal Friuli e int al 2005 as é fât al trîş int al Mantvân cun l'avêrta dal Cèinter Comercêl Po ed Suşêra, int al 2006 a s'é avêrt al Meduna ed Pordenòun e int al 2007 al Gotico a Piaşèinsa.
L'é interesânt l'é arcurdê êter trî prugèt de şvilóp: int al 1996 é stê fât la Trento Sviluppo srl, cuntrolêda a la pêra da Coop Nordest e dal SAIT ed Trento, un cunsōrsi ch' al fêva pêrt dal Confcooperative cun un şparpagnamèint ch' al rivêva dapertót, préma ed tót cun al nòm Famiglia Cooperativa. La mîra ed Trento Sviluppo l'é còl 'd avèir in mân di grôs supermarchê (superstore) in Trintèin. Al prém l'é stê avêrt a Trento int al 2002 e al secònd a Rovereto int al 2004. Tóti dō a gh'àn avû un grôs sucès.
A la fîn ed j ân Novânta è gnû l'idèja 'd invistîr int i ipermarchêt in Croâsia: è stê fât 'na socetê ed dirét, la Hipermarketi Coop d.o.o, che int al 2002 l'à avêrt al só prém Ipercòp a Zagabria, al King Cross Jankomir, ch' l' é stê al prém pûnt ed vèndita fōra dal teritôri italiân. Al secònd l'é stê avêrt a Zagabria sèimper int al 2002, int al 2003 l'à avêrt un ipermarchê a Osijek in Slavonia e int al 2004 l'à avêrt al Kastela de Spalato. La mîra l'é de dvintêr al prém ind al setōr ipermarchê in Croâsia. Int al 2009 i quatêr Ipercoop ed la Croâsia a vînen vindû, per quistiòun cunômichi, a Spar Austria. Ind l'acôrd ed vèndita a gh'é al pasâg da Hipermarketi Coop ed la Coop a Spar Hrvatska ed la Spar Austria ed la gestiòun ed j ipermarchê ed Jankomir e Stupnik ed Zagabria, Kastela de Spalato e Osijek ed la sitê cun l'istès nom, in pió la vèndita di dirèt per fêr 'n êter ipermatchê sèimper a Zagabria. A gh'é ânca l'impègn che j ipermarchê a tgnirân l'isègna Ipercoop e vènder i prodòt marchê Coop fîn al 2010. Per la gestiòun di stâbil comercêl dóve a gh'é dèinter i trî ipermarchê ed Jankomir-Zagabria, Spalato e Osijek a vîn fâta 'na socetê per vènder o cumprêr cà e apartamèint. La socetê la srà dal 50% ed la Coop Nordest e 50% ed Euromarkt, socetê specialişêda ind la gestiòun di stâbil ed Spar Austria, cun la mîra 'd arnuvêr e dêr valōr a i stâbil. Spar Hrvatska la 'sé ânca impgnêda a tgnîr a lavurêr tót i dipendèint ed j ipermarchê ed tgnîr ânca tót j impieghê ed Hipermarketi Coop ed Zagabria mèinter ed j êter impieghê a gnirân tôt a lavurêr ind la socetê ch' la dêv tgnîr a drē i stâbil comercêl.
In fònda a j inési dal têrs milèni a s'é stabilî 'n acôrd cun êtri coperatîvi, osaèja Coop Lombardia, Coop Liguria e Coop Adriatica per arvîr 'd j ipermarchê in Sicélia: int al 2004 è stê costituî la socetê Ipercoop Sicilia S.p.A. cun centrêla Palermo, e int al mâg 2007 l'à avêrt al prém di 7 Ipercòp, pervést in tóta la Sicélia, a Ragusa.
I sôsi
Al 31 dicèmber 2006 i sôsi ēren 500.003
I sôsi în urganişê in 57 Sesiòun teritoriêli.
I sôsi titolêr ed librét Prestito Sociale êren 106.696
Coop Consumatori Nordest int al 2006 l'à fât al 75% dal vènditi a i sō sôsi.
Coop Consumatori Nordest la gh'à 'na só edisiòun ed la rivésta Conumatori (druvêda, cun edisiòun lochêli, ânca dal j êtri grôsi Coop dal distrèt Adriatico e dal Nord-Ovest a só vôlta divîşa in dō sòt edisiòun: Emilia/Lombardia e Friuli Venezia-Giulia. La rivésta la vîn spidîda a grâtis a tót i sôsi.
La rēda ed vèndita
Coop Consumatori Nordest la tîn a drê diretamèint a 83 pûnt vèndita, divîş tra minimarchê, supermarchê e superstore cun l'insègna Coop (75) e ipermarchê cun l'insègna Ipercoop (8).
Coop Consumatori Nordest l'an drôva mìa la divisiòun dal canêl supermarchê ed Coop Italia, ch' la pervèd per eşèimpi l'insègna InCoop pr' al metradûri céchi.
Còsta l'é al particulêr ed la rêda ed vèndita:
- Friuli-Venezia Giulia
1 Pruvîncia dóve a gh'è preşèint ânca Coop Lombardia
2 Pruvîncia dóve a gh'è preşèint ânca Coop Adriatica
D'ed là ed rêda tgnûda dirètamèint bişògna zuntêr còla ed Trento Sviluppo, 'n' imprèisa tra Coop Consumatori Nordest e al SAIT ed Trento, cun dû superstore in pruvîncia ed Trento Al nōvi inaugurasiòun a srân préma ed tót ed supermarchê e Ipercoop: in Emélia lé prevésta la ristruturasiòun di supermarchê, in Friuli se stémen divêrs prugèt, tra cuisché soquânt supermarchê ind la zôna ed Trieste. In in pió pervést 7 nōv ipermarchê.
Ativitê spurtîvi
La Coop Consumatori Nordest la gh'à ânca dō socetê spurtîvi: la Polisportiva Coop Consumatori Nordest ed Pèrma e la squêdra ed bâschet Polisportiva Coop Consumatori Nordest ed Trieste.
La Polisportiva l'é stêda fundêda int al 1964 cun al nòm Cannisti Coop-U.P.C.C da ôt pescadōr. Cun l'ingrès 'd êter setōr, tra quisché al zôgh dal balòun e la palavōlo, l'ân dôp la câmbia in Gruppo Sportivo Coop-U.P.C.C., int al 1975 la dvèinta Polisportiva Coop Nordemilia e pó Polisportiva Coop Consumatori Nordest. Dôp as fân dal nōv sesiòin spurtîvi, cme còla ed la palanûd, ch ' la lavōra insèm cun ch'l'êtra socetê ed palanûd, la Rari Nantes Parma.
Colegamèint estêren
Materiêl pr'andêregh in fònda
(manca):
- Giulio Sapelli - Coop : il futuro dell'impresa cooperativa - Torino : Einaudi, 2006
- Enea Mazzoli, Vincenzo Tassinari - Coop Italia. - Roma : Liocorno, 1997
Nôta: cla pâgina ché l'é stêda fâta cun la tradusiòun ed Coop Consumatori Nordest trâta da it.wikipedia.org.
Guêrda la stôria ed la pâgina uriginêla per cgnòser l'elèinch 'd j autōr.