Cassandra crossing

Da Wikipedia.
Jump to navigation Jump to search
C'l artìcul chè 'l è scrit in Miranduléś Emiliàn
Video-x-generic.svg Cassandra crossing
Cassandra crossing.png
Martin Sheen e l'Ava Gardner in na figùra dal film
Al pasàǵ dla Casàndra
1976
Regia: George Pan Cosmatos
Scritùr: George Pan Cosmatos
Robert Katz • Tom Mankiewicz
Atùr: Richard HarrisSophia LorenAnn Turkel
Ava GardnerBurt LancasterIngrid Thulin
Orenthal James SimpsonJohn Phillip Law
Lionel StanderAlida ValliRay Lovelock
Martin SheenLee StrasbergLou Castel
Müsica: Jerry Goldsmith
Lengua: ItagliàṅIngléśTedéscŚvedéś
Dürä dal film: 111 minüt
Nasiòṅ: Régn UnîItàgliaGermàgna


«
Un trêṅ impestâ al cur a tuta par l'Europa vèrs na mòrt sicùra a Cassandra Crossing.»
(Tagline dal film)


Cassandra crossing (Al pasàǵ dla Casàndra) 'l è 'n film catastròfic dal 1976 ad George Pan Cosmatos trat da 'n rumànś ad Robert Katz e ambintâ insìma a 'n trêṅ ch'al viàśa par l'Europa. Al film 'l è prudót par Carlo Ponti, marè dla Sophia Loren che chè l'è prutagunìsta insém a Richard Harris.

Al pònt druâ p'r al ripréśi 'l è al Viaduc de Garabit, in di mònt sentrài francéś.

Sunt

Tri terurìsta śvedéś i gh la càvan a 'ndàr dèntar cun la fòrsa a di laburatòri dl'Urganiśasiòṅ Mundiàla dla Salùt a Ginévra par mét'r-ag dal bómbi ma i vînan farmâ da na guàrdia ch'la in masa òṅ prima ad ciamàr la sicurésa. Chi àtar dū i scàpan via e i finìsan in un laburatòri in dua i s fànan di esperimènt su di vìrus nóṿ. I partìsan dal sćiuptàdi ch'i śbràgan di vēdar e òṅ di lōr dū, prima ad tajàr la còrda, al s bèca acsè un brut mâl. A fadìga chi lò al gh la cava a tōr un trêṅ dirèt a Stucólma i du i viàśan anc al dutōr Jonathan Chamberlain (Richard Harris) e la sò vècia mujér Jennifer Rispoli (Sophia Loren), la Nicole Dressler (Ava Gardner), mujér 'd un venditōr 'd armi tedésc, e al sò amànt più śóvan Robby Navarro (Martin Sheen), ch'al fà di bèsi vindénd dla dròga. In sal trêṅ a gh'è anc un prēt (Orenthal James Simpson) che però 'l è invéci 'n pulisiòt ch'al gh dà la casa.

Al terurìsta al mōr in pôchi óri, al fà sōl in tèmp a pasàr al sò mâl a chi àtar viaśadōr. A Ginévra la Dr. Elena Stradner (Ingrid Thulin) la próa in cal méntar a catàr na cura ma al culunèl americàṅ Stephen Mackenzie (Burt Lancaster) al s dà da far par mét'r-i in quaranténa, sarànd-i tut dèntar a i vagòṅ a la stasiòṅ ad Nurimbèrga. Ma quél ch'al gh'à in mènt, par métar a taśér incòsa, 'l è spavintōś: far andàr al trêṅ in Pulògna pasànd p'r al pònt scasâ e dastrùt ad Cassandra crossing, in manéra da far-i murìr tut quànd al trêṅ al gh pasarà insìma.

A taca acsè na guèra fra i viaśadōr, ch'i vrévan farmàr al trêṅ anc parchè in cal méntar a s è vgnû a savēr che 'l usìgen al cumbàt bèṅ cla pèsta lè, e la pulisìa.

A la fiṅ, anc par via dal sacrifìsi d'l ebrèi Herman Kaplan (Lee Strasberg), ch'al s fà saltàr p'r ària par scavśàr in dū al trêṅ, quéi dla prima clas i scàmpan méntar chi àtar i finìsan śò da 'l pònt catànd tut la mòrt, spaplànd-as e bruśànd viṿ.

Culegamènt estéran