Black Christmas - Un Natale rosso sangue (film 1974)

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg Black Christmas
Black Christmas - Un Natale rosso sangue
Black Christmas - Un Natale rosso sangue (film 1974).png
La Lynne Griffin e 'l gat Claude in na figùra dal film
Nadâł négar - Un Nadâł rós cuma 'l sangṿ
1974
Regia: Bob Clark
Scritùr: Roy Moore
Atùr: Olivia HusseyJohn SaxonKeir Dullea
Margot KidderMarian WaldmanAndrea Martin
Müsica: Carl Zittrer
Lengua: Ingléś
Dürä dal film: 98 minüt
Nasiòṅ: Cànada


«
Prima 'd Freddy Krueger, prima 'd Jason, 'l ùnic, inimitàbil... Nadâł négar.»
(Tagline dal film)


Black Christmas - Un Natale rosso sangue (Nadâł négar - Un Nadâł rós cuma 'l sangṿ) 'l è 'n film ad scarésa canadéś dal 1974 ad Bob Clark, al regìsta ad Porky's, cunsiderâ un caplavōr dal gènar.

Al gh'à abû 'n arfacimènt in dal 2006, Black Christmas - Un Natale rosso sangue, ad Glen Morgan. 'L è stâ girâ a fra 'l 25 ad Mars e 'l 11 ad Maǵ spendénd 686.000 dòlar canadéś a 'l incìrca e muciànd-an sù da piò ad quàtar migliòṅ. Par la part dla sgnōra Mac a s éra pinsâ a la Bette Davis mént'r al rōl ad Peter 'l éra stâ śibî a 'l inìsi a Malcolm McDowell che però 'l à dit ad nò.

In di Stat Unî 'l è vgnû pò fóra c'n al tìtul ad „Silent Night, Evil Night“.

Sunt

'L è drē a davśinàr-'s al Nadâł e 'd nòt 'n óm al s insfìlsa in dal tasèl mòrt dna in du i vìvan dal studènti 'd un culéǵ par fémni. A tgnir-'g adrē a gh pènsa la sgnōra Mac (Marian Waldman), una ch'la gh dà dèntar c'n i cichét e ch'la lóga dal butìgli dapartùt. La Jessica Bradford (Olivia Hussey) la ricév na ciamàda a 'l telèfun da 'n piciâ in dla tèsta ch'al gh dà dla rója nimàla, pò la curnéta la pasa a na śbucàda sò para, la Barbara Coard (Margot Kidder), ch'la gh diś ad dar al cas a sò surèla o sinò ad mét'r-al in dal cûl a sò nóna che tant la pinsarà ch'a sia sōl na supòsta. 'L óm al n la tōś minga tant bèṅ e al mét śò dgénd-ag ch'al la cuparà.

La Claire Harrison (Lynne Griffin) la n è mia 'd acòrd c'n al cumpurtamènt dla sò amìga e la và acsè in dla sò cambra par far sù 'l valìś e turnàr a cà. Rivàda sù la sènt al gat Claude śgnulàr, la và a véd'r in d'l armàri e la cata 'l manìac ch'al la masa anvlupànd-'g un sachét ad plàstica, ad qvéi druâ par quaciàr i vistî, in cô, pò al la pògia insìma a scrana a dòndul in dal tasèl.

Al dè dòp al pàdar dla vitma (James Edmond) al riva lè par purtàr-la a cà p'r al vacànsi, al gh'iva apuntamènt sèg, ma al n la véd briśa e al s mét in pinsēr anc se la sgnōra Mac la gh diś ch'l'è fàcil ch'la sia andàda a far dal còmpri. In cal méntar la Jessica la và a catàr al sò muróś, Peter Smythe (Keir Dullea), un studènt ch'al sòna 'l piàṅ, par dir-ag ch'la spèta 'n putèṅ ma ch'la vōl aburtìr, a n gh'è stòri.

Mént'r al sgnōr Harrison al và a pascàr sò fiōla in di parc, la sgnōra Mac la mōr cupàda in dal tasèl cun 'n unsèṅ ch'al gh'iva tirâ cónt'r al sasèṅ. Al sergînt Nash (Doug McGrath) al n dà minga a mènt a la denunsìa di genitōr dla Claire e dal sò amìghi Barbara e Phyllis Carlson (Andrea Martin) cardénd ch'la sia da na quàlc banda a gusàr ma invéci 'l sò muróś Chris Hayden (Art Hindle) al n sà gnint. Peter, ch'al gh'à intensiòṅ ad dar-'g un taj c'n al cunservatòri, al dmanda a la Jessica ad spuśàr-al ma lē l'è 'd 'n àt'r avìś. Pò a gh'è 'l prubléma d'l abòrt: Peter al gh l'à sèg parchè la in dascór cuma s'a fus un quèl cuma tajàr-as via gl'ungi di e al và via dgénd-ag: «Ta t in pintirà, a t al giùr».

Quànd in dal parc a vèṅ catâ 'l còrp dna ragasōla, al tenènt Kenneth Fuller (John Saxon) al s dà finalmènt na mòsa e al mét sóta cuntròl al telèfun dla Jessica sprand acsè ad bcar al spurcaciòṅ ch'al la minàsa. Méntar fóra i putèṅ i cànt'n Adeste fideles a la Jess, al manìac al fà fóra la Barbara méntar la pònsa a lèt.

Culegamènt estéran