Big Fish - Le storie di una vita incredibile

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg Big Fish
Big Fish - Le storie di una vita incredibile
Big Fish - Le storie di una vita incredibile.png
La Jessica Lange in na figùra dal film
Pés bèl grôs - Al stòri dna vita ch'a n sa gh créd
2003
Regìa: Tim Burton
Scritōr: Daniel Wallace • John August
Atōr: Ewan McGregorHelena Bonham Carter
Albert FinneyBilly CrudupJessica Lange
Alison LohmanDanny DeVitoMissi Pyle
Marion CotillardMatthew McGroryAda Tai
Arlene TaiDavid DenmanSteve Buscemi
Robert GuillaumeLoudon Wainwright III
Müsica: Danny Elfman
Léngua: IngléśCantunéś
Dürä dal film: 125 minüt
Nasiōṅ: Stat Unî


«
A gh'è dal bali ch'i èṅ più véri dal reàł.»
(Tagline dal film)


Big Fish - Le storie di una vita incredibile (Pés bèl grôs - Al stòri dna vita ch'a n sa gh créd) l'è na cumèdia dramàtica americàna dal 2003 ad Tim Burton, candidàda a i Prèmi Òscar p'r al mùśichi ad Danny Elfman.

Custâ stanta migliòṅ ad dòlar, al film al gh l'à cavàda a pasàr i sènt-vint-a-tri ad guadàgn.

Sunt

A la fèsta 'd nòsi fra la Josephine (Marion Cotillard) e Will Bloom (Billy Crudup), sò pàdar Edward (Albert Finney) al cònta a tut i òspit ch'al dè in du 'l éra nâ 'l putèṅ, lò 'l iva pascâ na bucàcia bèla grôsa druànd cuma lésca la fēd dal sò matrimòni cun sò mujēr, la Sandra (Jessica Lange). Esénd che Will 'l à scultâ dal stòri dal gènar par tuta la vita, 'l è stuf ad sintìr ad cuntìnuv dal bali dal gènar ch'al gh'à 'l bali pîni. I dū i s quistiònan e Will al taja i pònt sèg.

Tri an dòp, avénd savû che sò pàd'r al gh'à 'l cànc'r e 'l è mis mâł, Will al tórna da i suo in Alabàma par pasàr dal tèmp sèg e par pruàr a cgnós'r-al mèj ch'l è un quèl ch'al 'l à sèmpar fat patìr dimóndi parchè a fòrsa ad sintìr dal buśìi da part sua al n à mai abû 'l ucaśiòṅ ad savēr cum al sia fat dèntar dabòṅ.

Fra 'l stòri ch'a n sa gh créd 'd Edward a gh'è quèla ch'al gh'à abû la manéra 'd védar cum al sarév mòrt in 'n òć ad vēdar dna stria (Helena Bonham Carter), 'd un gigànt ciamâ Karl (Matthew McGrory) ch'al magnàva tut al bèsti dal sò paéś, dal vilàǵ spardû 'd Spectre che lò al s è cumprâ in séguit, dla sò amicìsia c'n al scritōr làdar Ashton Norther Winslow (Steve Buscemi) e dla fiōla dal sìndig 'd Spectre, la Jenny (Helena Bonham Carter), dal sò lavōr in dal cîrc 'd Amos Calloway (Danny DeVito), un lóv manâr in segrét, p'r avēr dal nutìsi dla Sandra ch'l iva vdû da lò durànt un spetàcul e dna sò misiòṅ ad guèra in uriènt in du 'l à cgnusû 'l śmèli siaméśi Ping (Ada Tai) e Jing (Arlene Tai).

Quànd Edward al vîṅ purtâ a 'l uśdał parchè a n gh'è più gnint da far, un dascōrs dal dutōr Bennett (Robert Guillaume) al vèra i òć a sò fiōl. A n è mia ch'al stòri 'd sò pàd'r i èṅ dal tut dal bali, sōl di racònt véra 'n po' giustâ par far-i dvintàr più bèi e gustóś. In punt ad mòrt 'l è Will ch'al cònta a Edward cum al murà, anc se lò al n gh'à mai dit cuś a gh'éra in d'l òć dla stria, andgànd in un fiùm dòp avēr salutâ tut i persunàǵ dla sò vita, dvintànd pò 'n pés gat gigànt. Edward al gh fà ségn ad sè, pò al sèra i òć par sèmpar.

Culegamènt estéran