Albert Ramos Viñolas
|
C'l artìcul chè 'l è scrit in
Miranduléś |
.jpg)
Albert Ramos Viñolas (Barcelóna, 17 ad Śnar dal 1988) 'l è 'n tenìsta spagnōl prufesiunìsta da 'l 2007. Al 21 ad Maǵ dal 2012 'l è rivâ a ès'r al nùmar trént'òt dal mónd in singulàr. In dla sò caréra, in dua al s è mis in bisàca sèt tìtui Challenger, 'l à śugâ na finàl ATP in dal 2012 in sla tèra batùda ad Caśablànca ma al 'l'à pardùda cóntar Pablo Andújar.
'L è élt un mét'r e utànt'òt e al pésa utànta chilo. Al dróa 'l bras sinìst'r e al tira 'l arvèrs a dū maṅ. 'L à tacâ a śugàr a tènis a sinc an e i sò scutmàj spagnōl i èṅ "La Mugre" (La Crica) o "El Mugrero" (Al Rusc) par via dal sò śōg ch'al n fà minga mâł da bucìnar ch'al spéta sōl i śbali d'l aversàri.
Caréra
In dal 2010, tacànd da 'l qualificasiòṅ, Albert Ramos Viñolas al riva in di utàṿ in dal turnèo ad cà sua ad Barcelóna ma al pèrd da Ernests Gulbis par 1-6 3-6. In Agóst al vins al Challenger ad San Sebastiàṅ cónt'r al francéś Benoît Paire e al fà àtar tant in Setémbar a Sivìglia cóntar Pere Riba Madrid, àtar tenìsta catalàṅ.
La stagiòṅ 2011 p'r Albert la partìs a Santiàgo in Cîl e al pèrd a 'l secónd tùran da Fabio Fognini dòp avér batû Leonardo Mayer. A Buenos Aires al riva in di utàṿ (3-6 5-7 da Tommy Robredo). A 'l Roland Garros al riva par la prima vòlta a 'l secónd tùr'n in un Gran Slam ma al céd in tri sét a Robin Söderling. In Luj a Ambûrg al bat Adrian Mannarino ma al pèrd da c'l àtar francéś, Gaël Monfils, par 4-6 2-6.
In dal 2012 al spagnōl al fà i quàrt a Doha (2-6 1-6 da Jo-Wilfried Tsonga) e la semifinàl a San Paolo (4-6 6-7 da Nicolás Almagro). In Mars a Indian Wells al bat Richard Gasquet prima ad lasàr strada a Pablo Andújar a 'l tèrs tùran e pò al fà cumpàgn anc a Miami. In Avrìl al śōga la sò prima finàl ATP a Caśablànca ma al pèrd incóra da Pablo Andújar par 1-6 6-7. C'n al mursiàṅ Ramos al s tōś l'arvìnsida a Ambûrg, pò al bat anc Lukáš Rosol prima ad céd'r a Marin Čilić in di quàrt.
In dal 2013 Ramos al riva in di utàṿ a Miami in dua al lasa strada in tri sét a Jürgen Melzer. A Barcelóna 'l è bòṅ ad bàt'r al giapunéś Kei Nishikori, nùmar quìndas dal mónd, par 6-4 7-6 ma in di quàrt al pèrd da Rafael Nadal par 3-6 0-6. In Luj al pèrd da Thomas Fabbiano par 4-6 2-6 in dal Challenger ad Tôd ma a Båstad al manda a cà Tommy Robredo prima 'd céd'r in tri sét a Carlos Berlocq. A Ambûrg al ciàpa na patnàda da Fabio Fognini a 'l secónd tùran (1-6 3-6), prima ad nóṿ scunfìti ad fila in dal sircùit ATP.
In dal 2014, pasànd p'r al qualificasiòṅ, al bat Sam Querrey a Sydney ma subìt dòp al s piga a Radek Štěpánek. A Barcelóna al pèrd incóra da Rafael Nadal ma almànc 'sta vòlta chè 'l al fà sudàr da piò (6-7 4-6). A Mònag 'd Bavéra al céd a 'l secónd tùran da Andreas Seppi par 3-6 4-6. In dal Challenger ad Caltaniséta al và fóra subìt cun Potito Starace pò però al vins qvél ad Milàṅ in finàl cun Pere Riba Madrid. In Setémbar Albert al vins anc a Génuva baténd Mate Delić e al s tira 'n pôc sù in clasìfica. In Maròc al pèrd da Matteo Viola in dal Challenger ad Meknes pò in Utóbar al fà cumpàgn cun Fabio Fognini a 'l prim tùran par 4-6 2-6.
In dal 2015 al bat Viktor Troicki e Julien Benneteau a Indian Wells, pò al s la śōga cun Novak Đoković ma al céd sèg par 5-7 3-6. A Barcelóna a riva 'n àtar scunfìta cun Pablo Andújar ch'l al bat subìt par 6-4 6-1 e 'l manciàṅ al cuntìnua anc a 'l Roland Garros in dua al vins par 6-2 6-4 7-6. A San Banadét dal Trônt, sircùit Challenger, al vins al tìtul baténd in finàl al lìgur Alessandro Giannessi. A Ambûrg al pèrd in tri sét da Fabio Fognini pò al céd anc a Marco Cecchinato in semifinàl a Génuva, àtar Challenger. In Utóbar a Shanghai (Master Mila in sal cimènt), da qualificâ, al bat al nùmar dū dal mónd Roger Federer par 7-6 2-6 6-3.