Thomas Fabbiano
|
C'l artìcul chè 'l è scrit in
Miranduléś |
_(14603740411).jpg)
Thomas Fabbiano, (San Śórś Jònic, 26 ad Maǵ dal 1989, a s lèś ['tomas fab'bjano] in Itagliàn) 'l è 'n tenìsta pugléś. Al dróa 'l bras dèst'r e al tira 'l arvèrs a dū maṅ. 'L è élt 173 cm e 'l péśa 70 chilo. Al s è stablî a Róma.
In dla sò caréra, in dua 'l à vins nóṿ tìtui Futures e òṅ ad qvéi Challenger, 'l è rivâ a ès'r al nùmar 142 dal mónd 'l 11 ad Śnar dal 2016.
Caréra
[mudéfica la surzéia]Fabbiano in dal 2007 al vins al turnèo ad dópi dal Róland Garros di śōvan pò 'l an dòp al s qualìfica p'r al turnèo Master Mila 'd Róma in dua 'l pèrd a 'l prim tùran da Nicolas Mahut par 7-6 4-6 5-7.
In dal Śugn dal 2010 al śóga 'l Challenger ad Réś in dua 'l riva in di quàrt (6-3 4-6 4-6 da Pablo Andújar). La stmana dòp 'l incróśa Simone Bolelli a Turèṅ e al gh pèrd a 'l prim tùran par 4-6 4-6. In Setémb'r al s qualìfica p'r al turnèo 250 ad Metz ma Philipp Kohlschreiber 'l al bat subìt par 6-4 6-3. In dal 2011 al riva in di quàrt a Gènua pardénd da 'l argintèṅ Horacio Zeballos.
In dal 2012 al fà sù i quàrt a Nàpuli, a Róma, a Granby, a Gènua e a Lermontov in sinc turnèo Challenger. 'L an dòp al bat Albert Ramos Viñolas a Tôd par pò rivàr in semifinàl in dua 'l céd a Santiago Giraldo par 6-7 3-6. In Luj a San Banadét dal Trònt 'l è bòṅ ad bàtar Andreas Haider-Maurer ma minga 'l purtughéś João Sousa in semifinàl. A gh và méj la stmana dòp a Recanât quànd al vins al sò prim tìtul Challenger dla caréra cónt'r al francéś David Guez batû par 6-0 6-3. A gl'US Open al s qualìfica p'r al tablòṅ prinsipàł baténd anc Miša Zverev ma pò al cata subìt Milos Raonic ch'l al bat par 6-3 7-6 6-3. Al sèra 'l an a la puśisiòṅ 180 dal mónd.
.jpg)
In dal 2014 a Guadalûp al vins na bèla partìda cun Benjamin Becker, pò al riva in semifinàl in dua al gh'à da lasàr strada a Steve Johnson par 6-7 4-6. In Śugn al bat Taro Daniel e Janez Semrajč a Mèstar, pò al i ciàpa da Paolo Lorenzi in di quàrt par 1-6 3-6 finénd la stagiòṅ da nùmar 256 dal ranking.
In dal 2015, dòp ès'r-as mis in bisàca tri tìtui Features ad fila, al riva in semifinàl in dal Challenger ad Nàpuli pò in Maǵ al s qualìfica a Róma ma 'l cata subìt Richard Gasquet ch'l al bat par 6-1 7-6. In Agóst al tōś part a 'l Challenger ad Cordenons. Dòp avér batû Federico Gaio par 6-2 6-2 al pèrd da Paolo Lorenzi par 6-7 6-4 1-4 bandòṅ.
In dal 2016, baténd al lusemburghéś Gilles Muller par 6-4 7-5, al riva in di quàrt in dla turnèo ad Chennai in dua 'l pèrd da Benoît Paire par 4-6 5-7.