Sharon Fichman

Da Wikipedia.

C'l artìcul chè 'l è scrit in Miranduléś Emiliàn


La Fichman tòlta śò in dal 2013
'N arvèrs dla canadéśa


La Sharon Fichman (Turònt, 3 ad Dicémbar dal 1990) l'è na tenìsta ebrèia canadéśa prufesiunìsta da 'l 2009 ch'in dla sò caréra l'à mis in bisàca òt tìtui ITF. La gh'à anc la sitadinànsa 'd Iśraēl. La dróa al bras dèstar e la tira 'l arvèrs a dū maṅ. L'è élta un mét'r e ssanta-tri e la péśa sinquànta-sèt chilo.

L'è rivàda a èsar la nùmar utànta-sèt dal mónd al 31 ad Mars dal 2014. I sò genitōr i èṅ tut dū di inśgnēr.

Caréra

La Fichman la taca a pistàr i camp ITF in dal 2005 e a la fiṅ d'l an la śōga subìt dū finàli, vinsénd-an una. 'L an dòp la próa a far al salt in dal mónd WTA ma la n pasa minga 'l qualificasiòṅ a Amelia Island, Montreal e Quebec City. A 'l inìsi dal 2007 la pèrd dū finàli ITF e pò la pèrd da la Dominika Cibulková in dal qualificasiòṅ dal Premier ad Turònt.

La canadéśa la śōga in dal Favràr dal 2008 'l ITF da stantasìnc-mila dòlar ad Midland in dua la ciàpa la paga da la Melanie South in di quàrt par 0-6 4-6. In Śugn la fà méj a Waterloo pardénd in finàl. In Luj, cun na carta salvàdga in bisàca, la tōś part par la prima vòlta in dla sò vita a 'l tablòṅ prinsìpał 'd un turnèo WTA a Turònt ma la céd subìt a la Jill Craybas par 4-6 3-6, stés quèl anc a la fiṅ d'l an quànd qvéi ad Quebec City i l'invìdan par śugàr dirèt ma lē la và fóra a 'l prim tùran cun la Bethanie Mattek-Sands par 3-6 3-6.

In dal Śnar dal 2009 la śōga àtar dū finàli ITF da vintsìnc-mila dòlar e la in pòrta a cà una e pò n'atr'incóra in Avrìl a Osprey. In Maǵ la pasa 'l qualificasiòṅ a Esturìl ma pò la céd in tri sét a la rusa Marija Kirilenko. In Istâ la patìs tri scunfìti da gl'itagliàni Alberta Brianti a Wimbledon, Tathiana Garbin a Bùdapest e Nastassja Burnett a Palèrum. In Setémbar a Bièla la riva in finàl in 'n impurtànt ITF da sènt-mila dòlar ma la pèrd da la Petra Martić par 5-7 4-6. La finìs la stagiòṅ a la puśisiòṅ 132 dal ranking.

In dal 2010 la n s qualìfica minga a Auckland, Hobart e Melbourne, mént'r in Culómbia la pèrd subìt a Cali (7-5 4-6 6-7 da la Klára Koukalová) e a Bugutà (3-6 6-3 4-6 da l'Angelique Kerber). A Acapûlc invéci la s insfìlsa in di quàrt stendénd prima la Sorana Cîrstea par 6-2 6-0 pò baténd anc l'ucràina Marija Korytceva par 6-2 6-3. In dal rèst dla stagiòṅ però la màcia sù pôc, sōl dū quàrt ITF.

La taca al 2011 vinsénd 'l ITF ad Plantation baténd la Camila Giorgi in semifinàl par 3-6 6-3 6-3 e l'Alexandra Cadanțu in finàl par 6-3 7-6. A Bugutà la riva in di utàṿ pasànd p'r al qualificasiòṅ (6-4 5-7 2-6 da la padròna 'd cà, la Catalina Castaño) pò in Luj la vins 'n àt'r ITF a Waterloo e acsè la finìs 'l an a 'l 166śum pòst.

La prima part dal sò 2012 'l è 'n diśàstar. La s fà védar sōl in d'l ITF ad Caśèrta in Maǵ in dua la riva in semifinàl. In Luj invéci la vins incóra a cà sua a Waterloo baténd la Julia Glushko par 6-3 6-2 e pò in Agóst la và in Rumanìa par mét'r-as in bisàca anc al tìtul d'l ITF ad Mamàja. A s véd pròpria ch'adès la canadéśa la gh dà dèntar parchè fra Setémbar e Utóbar la fà tri finàli ITF ad fila anc se pò la i pèrd tuti. Turnàda in Cànada, l'incróśa par dū vòlti la sò bistiàsa négra, l'Eugenie Bouchard, pardénd-ag sèg in di ITF ad Saguenay e Turònt ma faghénd listés quàrt e finàl. 'L ùltim turnèo ITF ch'la śōga in dal 2012 'l è 'l ITF ad Phoenix in Nuvémbar. Chè la Sharon la céd a la Madison Keys in semifinàl par 1-6 3-6.

La Fichman la taca la stagiòṅ 2013 vinsénd subìt 'l ITF ad Pòrt Santa Luśìa (6-3 6-2 a la Tadeja Majerič). A Bugutà la pasa 'l qualificasiòṅ par pò pèrdar da la Francesca Schiavone par 6-4 4-6 4-6. In Maǵ la pèrd da l'Yvonne Meusburger la finàla d'l ITF ad Wiesbaden in Germâgna mént'r in Śugn, in sl'èrba, la céd in semifinàl a Nottingham a la Petra Martić. In Luj la bat la Kimiko Date-Krumm e la Barbora Záhlavová-Strýcová in d'l ITF ad Vancouver ma minga la Johanna Konta in finàl. In Agóst la dasfrùta na carta salvàdga par śugàr al Premier ad Turònt. A 'l prim tùran la fà fóra cl'atra carta salvàdga canadéśa, la Stéphanie Dubois, ma pò a 'l secónd tùran l'incróśa la Jelena Janković e la gh céd par 4-6 6-7.

In dal 2014 la pasa 'l qualificasiòṅ a Auckland e pò la bat anc la Sorana Cîrstea par 6-1 6-4 prima ad lasàr-'g al péni cun la Garbiñe Muguruza Blanco in tri sét. La fà cumpàgn anc a Acapûlc in Favràr in dua la gh'à la méj cun l'Yvonne Meusburger prima ad cédar a la francéśa Caroline Garcia par 2-6 5-7. A Indian Wells la patìs na lesiòṅ da la Sara Errani ch'la la manda a cà, incóra a 'l secónd tùran, c'n al puntéǵ ad 1-6 1-6. A Miami invéci la n pasa briśa 'l qualificasiòṅ farmànd-as in dū sét quànd la bèca la Coco Vandeweghe.

Culegamènt estéran