La donna che visse due volte

Da Wikipedia.
C'l artìcul chè 'l è scrit in Miranduléś Emiliàn
Video-x-generic.svg Vertigo
La donna che visse due volte
Donna che visse 2 volte.png
La Kim Novak in na figùra dal film
La dóna ch'l'iva visû dū vòlti
1958
Regia: Alfred Hitchcock
Scritùr: Pierre Boileau • Thomas Narcejac
Alec Coppel • Samuel A. Taylor
Atùr: James StewartKim NovakBarbara Bel Geddes
Tom HelmoreHenry JonesRaymond BaileyEllen Corby
Müsica: Bernard Herrmann
Dürä dal film: 128 minüt
Lengua: Ingléś


«
L'è cuma s'a stis parcurénd un curidōr lung tut quaciâ ad spèć e soquànt di sò cunsèṅ i èṅ incóra là e quànd a riv a la fiṅ dal curidōr a n gh'è àtar che buj e mè a sò che, insfilsànd-um dèntar, a vag a murìr.»
(Fraś dal film ad James Steward)


La donna che visse due volte (La dóna ch'l'iva visû dū vòlti) 'l è 'n film dramàtic dal 1958 'd Alfred Hitchcock trat da 'l rumànś francéś D'entre les morts (In di mòrt) ad Pierre Boileau e Thomas Narcejac.

Sunt

'L avucàt e pulisiòt John Ferguson (James Stewart), ciamâ Scottie da i sò amìg, al gh'à di prubléma a purtàr avànti al sò lavōr parchè al patìs da spés di tarabaciòṅ quànd al s cata in élt. Un dè, durànt 'n inseguimènt in si téǵ di gratacēi ad San Francisco, 'l iva vdû śliciàr śò e spaplàr-'s a tèra un sò culéga in dal tintatìṿ ad dar-'g ajùt parchè lò 'l éra drē a pingulàr in dl'ària mént'r al s tgniva stric a na grundàra.

Lasâ a cà da la pulisìa, Scottie al s véd cun un sò vèć cumpàgn ad scóla ch'l à fat caréra in di catēr navài, Gavin Elster (Tom Helmore), ch'al gh dà 'l incàrag ad tgnir 'd òć sò mujér Madeleine (Kim Novak) ch'la gh'à di distùrub in tèsta parchè la créd 'd èsar sò nunóna Carlotta Valdés, una che a vint-siē an la s éra tòlt la vita dòp èsar stata lasàda da sò marè e dòp ch'i gh ìvan purtâ via anc sò fiōla. Adès la Madeleine la gh'à i stés an ad qvala lè.

John al taca a tgnir-'g adrē e un dè, dòp che lē l'iva purtâ di fiōr in sla tómba ad sò nóna, al la véd ch'la s butà śò in di àqui dal Golden Gate. Tiràda fóra da 'd là, dòp avér-la sugàda in dal sò apartamènt, lò al gh prumét ad jutàr-la a guarìr anc parchè 'l à pardû la tèsta par lē.

Un dè però la Madeleine la próa a masàr-'s incóra, butànd-as sò p'r un campanìl, e 'sta vòlta la gh la cava anc parchè Scottie al n è minga bòṅ ad cùr'r-'g adrē e ad tgnir-la sòdi par via di sò tarabaciòṅ. Pîṅ ad séns ad cólpa in di sò cunfrònt e ardùt cum un śdas al cata cunfòrt in dla sò amìga Midge (Barbara Bel Geddes) ch'la gh vōl bèṅ dabòṅ ma lò invéci al n è minga inamurâ 'd lē.

Vgnû fóra da 'l uśdàl psichiàtric dòp 'n an, Scott al cgnós na cumésa in un negòsi, la Judy Barton, ch'la pâr pròpria la Madeleine anc se lē l'è móra invéci che biónda. 'L avucàt al taca a 'ndàr fóra sèg e al la cunvìns a vistìr-as cuma la mòrta ma anc a patnàr-as e tinś'r-as i cavìi cuma lē. La Judy la fà tut qvél ch'al gh diś lò, malluntéra e sōl p'r al sò amōr.

Culegamènt estéran