A Wong Foo, grazie di tutto! Julie Newmar

Da Wikipedia.

C'l artìcul chè 'l è scrit in Miranduléś Emiliàn

To Wong Foo, Thanks
for Everything! Julie Newmar
A Wong Foo, grazie di tutto! Julie Newmar

Leguizamo, Snipes e Swayze in na figùra dal film
A Wong Foo, gràsie 'd tut! Julie Newmar
1995
Regìa: Beeban Kidron
Scritōr: Douglas Carter Beane
Atōr: Patrick SwayzeWesley SnipesChris Penn
John LeguizamoStockard ChanningRuPaul
Robin WilliamsNaomi CampbellJason London
Blythe DannerJulie NewmarMelinda Dillon
Müsica: Rachel Portman
Léngua: IngléśFrancéśItagliàṅ
Dürä dal film: 114 minüt
Nasiōṅ: Stat Unî


«
L'aparénsa l'è tut.»
(Tagline dal film)


A Wong Foo, grazie di tutto! Julie Newmar (A Wong Foo, gràsie 'd tut! Julie Newmar) l'è na cumèdia americàna dal 1995 ch'l'è stada bòna ad purtàr a cà da piò ad quarànta-sèt migliòṅ ad dòlar.

In dla culòna sunóra i s càtan di braṅ cantâ da la Patti LaBelle, da la Cyndi Lauper, da i The Commodores, da la Crystal Waters, da la Chaka Khan e àt'r incóra.

Sunt

La Vida Boheme (Patrick Swayze) e la Noxeema Jackson (Wesley Snipes) i èṅ dū drag queen ch' i s śibìsan in soquànt lucài par fnòć ad New York. Un dè i vìns'n un viàś p'r Hollywood par tōr part a l'elesiòṅ dla “Miss Drag Queen d'l an”. Dòp avér cgnusû in un risturànt la Chi-Chi Rodriguez (John Leguizamo), un travestî ispànic, i decìdan ad dar indrē i sò bijét d'l aparéć par tōr a nuléǵ na cadillac vècia dal 1967 par psēr purtàr sèg anca lē, acsè la gh'av'rà la manéra 'd imparàr a dvintar na drag queen cum a s dév.

Al tri chéchi i partìs'n acsè par la Califòrgna cun sèg na foto firmàda da la Julie Newmar che lōr i aṅ purtâ via da 'n bar. Durànt al viàś a gh in sucéd ad tut i culōr. Prima la Vida Boheme la s litga cun sò màdar, pò la gh'à da patìr un tentatìṿ ad viulénsa da part dal sierìf Dollard (Chris Penn), un rasìsta ch'al n s pōl mia cumpatìr i gay. Quànd però al sènt cuś la gh'à in dal mudàndi, al gh rèsta acsè mâl ch'un marùc dla Vida Boheme 'l al mét fóra cumbatimènt. Cardénd-al mòrt, al tri amìghi i scàpan via subìt ma soquànt tèmp dòp la màchina la sa śbraga davśèṅ a 'l paiśèṅ ad Snydersville lasànd-li a pē. In lōr ajùt a riva lè un ragasōl ch'al s ciàma Bobby Ray (Jason London) ch'al li pòrta in d'l albêrg dla Carol Ann (Stockard Channing), spuśàda cun un marè viulènt, Virgil (Arliss Howard).

Spetànd la riparasiòṅ dla cadillac, al tri drag queen i gh'àṅ da 'rmàgnar lè, cun gl'abitànt campagnōi ch'i gh dànan cóntar, a n avénd mai vdû di tisi dal gènar.

Culegamènt estéran