Whore (puttana)
|
C'l artìcul chè 'l è scrit in
Miranduléś |
 Whore
| ||
| Whore (puttana) | ||
 La Theresa Russell in na figùra dal film | ||
| Whore (putàna) 1991 | ||
|---|---|---|
| Regìa: Ken Russell | ||
| Scritōr: David Hines Ken Russell • Deborah Dalton | ||
| Atōr: Theresa Russell • Elizabeth Morehead Daniel Quinn • Benjamin Mouton • Danny Trejo Antonio Fargas • Sanjay Chandani • Ginger Lynn Jason Saucier • Barbara Mallory • Daniel Beer | ||
| Müsica: Michael Gibbs | ||
| Léngua: Ingléś | ||
| Dürä dal film: 85 minüt | ||
| Nasiōṅ: Régn Unî • Stat Unî | ||
Whore (puttana) (putàna) 'l è 'n film dramàtic dal 1991 ad Ken Russell. Al regìsta ingléś al 'l à girâ par rispónd'r a 'l film Pretty Woman d'l an prima parchè al cuntàva i fat dla prustitusiòṅ in na manéra edulcuràda. Lò invéci al tōś ispirasiòṅ da di fat sucès dabòṅ cuma cuntâ da di scrit 'd un tasìsta ad Lóndra ch'l iva tòlt śò qvél ch'la gh cuntàva na putàna che lò al scarusàva in gir par la sità.
A i butghèṅ di cìnema 'l à muciâ sù un migliòṅ ad dòlar. In dal film la gh'à na part, qvéla dla putàna scurtlàda, anc n'atōra ad film pòran, la Ginger Lynn Allen.
Sunt
La Liz (Theresa Russell) l'è na putàna ch'la lavóra in gir p'r al stradi ad Los Angeles. Quànd a s férma un camiunsèṅ par cargàr-la sù, lē la 'l manda via cuntànd a i spedadōr che na vòlta l'éra muntàda sù su 'n furgunsèṅ e là la gh'iva catâ soquànt óm ch'i l'ìvan viulentàda lasànd-la in fiṅ 'd vita. Par furtùna 'l éra pasâ da 'd lè òṅ ch'al l'à jutàda purtànd-la a 'l uśdàł e pagànd-'g al curi.
La dóna, ólt'r a pascàr di cliènt, l'è drē anc a scapàr via da 'l sò papòṅ, Blake (Benjamin Mouton), 'n óm vistî sèmpar bèṅ ch'l è dimóndi catìṿ sèg. La gh fà far tut qvél ch'al vōl lò e al gh pòrta via i bèsi ch'la mùcia sù.
Durànt na pàuśa par bévar quèl in dun strip club, la Liz la cònta cum 'l è ch'la s è ardùta a far cla vita lè. Spuśàda da śōvna cun 'n óm viulènt e imbariagòs e c'n un fiōl pìcul, un dè, a n psénd-an piò ad purtàr pasînsia, l'iva decìś ad dar-'g un taj, mulànd al marè mént'r al punsàva e purtànd-as sèg al putèṅ. Dòp avér catâ lavōr faghénd la camaréra, a gh'è sucès na nòt 'd andàr a lèt c'n òṅ ch'al gh'iva śibî di bèsi pinsànd ad far sù quèl da piò dal sò stipéndi bas. Da cal mumènt lè la dóna la s éra misa a far la rója p'r al stradi, tut da par lē, in fiṅ tant che l'è finìda a lauràr par Blake.
Un dè la Liz la cgnós Rasta (Antonio Fargas), un ragàs négar sénsa cà ch'al scampa faghénd 'l artìsta da strada girànd insìma a di vēdar śbragâ.