Valérie - Diario di una ninfomane
|
C'l artìcul chè 'l è scrit in
Miranduléś |
 Diario de una ninfómana
| ||
| Valérie - Diario di una ninfomane | ||
 La Belén Fabra in na figùra dal film | ||
| Valérie - Diàri dna ninfòmana 2008 | ||
|---|---|---|
| Regìa: Christian Molina | ||
| Scritōr: Cuca Canals • Valérie Tasso | ||
| Atōr: Belén Fabra • Leonardo Sbaraglia Llum Barrera • Geraldine Chaplin • Ángela Molina Pedro Gutiérrez • José Chaves • Javier Coromina Jorge-Yamam Serrano • Judith Diakhate | ||
| Müsica: Roque Baños • Mariano Marín | ||
| Léngua: Spagnōl • Francéś | ||
| Dürä dal film: 101 minüt | ||
| Nasiōṅ: Spaggna | ||
Valérie - Diario di una ninfomane (Valérie - Diàri dna ninfòmana) 'l è 'n film eròtic spagnōl dal 2008 ad Christian Molina ch'al tōś ispirasiòṅ da 'n rumànś auto-biugràfic dla Valérie Tasso c'n al stés nóm.
Sunt
La Valérie Tasso (Belén Fabra) l'è na śuvnòta francéśa laureàda ch'la pénsa a 'l sès ad cuntìnuv da quànd, a quind'ś an, la 'l à fat par la prima vòlta c'n un sò cumpàgn ad scōla, Edouard (Bastian Ckateau). Da cal mumènt lè l'à capî 'd èsar pròpria na rója parchè la gh'à vója 'd far-as dar da tut, e dimóndi vòlti, anc da chi óm ch'i n gh piàśan gnanc. La taca acsè a far sès cun 'l àrab Hassan (Pedro Gutiérrez) e cun Alex (David Vert), ch'l è 'l as ad brìscula in dal gusàr. Quànd però chi lò al gh diś ciàr e tónd ch'al gh'à da dar-'g un taj, parchè 'l gh'à bèla la muróśa, la Valérie la patìs tròp e la và a far-as ciulàr da 'n óm vist a la farmàda dal bus (Santi Monreal).
La dóna la dascór dal sò prubléma 'd ninfumanìa cun sò nunóna Marie (Geraldine Chaplin) che, prima 'd murìr, la gh cunsìlia 'd far la sò vita e 'd butàr śò i sò pinsēr su 'n fój in manéra 'd avēr ciàr cuś la vōl. A vint-i-òt an la Valérie la s inamóra 'd Jaime (Leonardo Sbaraglia), 'n óm cgnusû pascànd lavōr a Barcelóna, e i dū i vànan subìt a vìv'r insém. C'n al pasàr dal tèmp però chi lò al taca a 'vēr di scat 'd arlìa sèg parchè 'l è dimóndi gelóś e 'l fà fadìga a cuntrulàr-as, al gh l'à anc cun Harry (Javier Coromina), un stilìsta itagliàṅ fnòć ch'al l'iva tòlta a lauràr sèg.
Stufa dal sò buśìi e dal sò caràtar, la Valérie la 'l mòla e la và a star da na sò amìga, la Sonia (Llum Barrera). Avénd biśógn ad bèsi e 'd masć da purtàr-'s a lèt, la Valérie la sarnìs 'd andàr a far la putàna in dal caśèṅ dla Cristina (Ángela Molina) e la dvènta amìga dla sò culéga braśigliàna Cindy (Judith Diakhate). La Valérie la s inamóra pò 'd un sò cliènt fis, al calabréś Giovanni (Antonio Garrido), ma la fà sès anc cun di àt'r óm cuma 'l sivigliéś Pedro (Yanik Parra) o 'l daśgrasiâ Íñigo (Jorge-Yamam Serrano). Quànd la véd che Giovanni al l'à pasàda a 'n sò amìg sénsa far-as di prubléma, e dòp la mòrt dla Cindy ch'l'à preferî butàr-as śò par la fnèstra piutòst che cuntinuàr cla vita lè, la Valérie la decìd ad lasàr al mónd dla prustitusiòṅ.