Federico Gaio
|
C'l artìcul chè 'l è scrit in
Miranduléś |
Federico Gaio, (Fënza, 5 ad Mars dal 1992, a s lèś [fede'ri:ko 'gajo] in Itagliàn) 'l è 'n tenìsta rumagnōl nâ in dla stésa sità 'd Andrea Gaudenzi. Al dróa 'l bras dèst'r e al tira 'l arvèrs cun na maṅ sōla.
In dla sò caréra, in dua 'l à vins sèt tìtui Futures e pardû àtar tant in finàl, 'l è rivâ a ès'r al nùmar 158 dal mónd al 1 'd Agóst dal 2016. 'L à anc śugâ na finàl Challenger a Curtìna in dal 2014 pardénd-la cun Filip Krajinović.
Caréra
Federico al taca a śugàr i sò prim turnèo in dal sircùit Futures in dal 2008 par pò vìns'r i sò prim dū tìtui in Kazakhstan tri an dòp.
_(28211175465).jpg)
In dal 2013 al pasa a 'l sircùit Challenger pruànd a qualificàr-'s a 'l inìsi d'l an. Al gh la cava a San Marèṅ ma pò al pèrd in tri sét in di utàṿ cóntar Filippo Volandri.
In dal 2014 al bat Elias Ymer in un Futures in Iśraēl. In dal Challenger ad Bérgum al cata subìt Simone Bolelli e al gh pèrd par 3-6 4-6. In Agóst al riva in finàl in dal Challenger ad Curtìna ma al la pèrd p'r un pēl c'n al sèrb Filip Krajinović par 6-2 6-7 5-7.
In dal Favràr dal 2015 al próa 'l qualificasiòṅ in d'l ATP ad Śagàbria ma al và fóra subìt. In Maǵ al ciàpa na carta salvàdga par śugàr al Master Mila 'd Róma ma cun 'l argintèṅ Leonardo Mayer a n gh'è gnint da far: 3-6 4-6 al puntéǵ. In Śugn al bat par 6-1 6-3 Mate Delić a Milàṅ ma pò al céd a Benoît Paire par 6-2 4-6 6-7, anc chè al gh'arév da magnàr-'s al maṅ. Anc a Padva al pèrd in vulàda, 6-3 3-6 5-7 da Albert Montañés in semifinàl. In Nuvémb'r al bat Ričardas Berankis in dal Challenger 'd Eckental, pò al cata Michail Južnyj e al céd sèg par 1-6 2-6.
In dal 2016 in Mars al riva in semifinàl in un Challenger mesicàṅ pardénd da Marcelo Arevalo pò in Luj al vins invéci a San Banadét dal Trònt, baténd in finàl al francéś Constant Lestienne par 6-2 1-6 6-3, e a Bjèla dand la paga a i braśigliàṅ João Souza in semifinàl par 2-6 7-6 6-4 e Thomaz Bellucci in finàl par 7-6 6-2.