The Lodger - Il pensionante
|
C'l artìcul chè 'l è scrit in
Miranduléś |
 The Lodger
| ||
| The Lodger - Il pensionante | ||
 La Davis, West e Molina in na figùra dal film | ||
| Al pensiunànt 2009 | ||
|---|---|---|
| Regìa: David Ondaatje | ||
| Scritōr: Marie Belloc Lowndes • David Ondaatje | ||
| Atōr: Alfred Molina • Shane West • Simon Baker Hope Davis • Donal Logue • Rachael Leigh Cook | ||
| Müsica: John Frizzell | ||
| Léngua: Ingléś | ||
| Dürä dal film: 95 minüt | ||
| Nasiōṅ: Stat Unî | ||
The Lodger - Il pensionante (Al pensiunànt) 'l è 'n thriller dal 2009 ad David Ondaatje ch'al 'l à anc prudót insém a Michael Mailer.
Al film al tōś ispirasiòṅ da 'l rumànś “The Lodger” dla Marie Belloc Lowndes druâ anc in dal film Il pensionante dal 1927 'd Alfred Hitchcock.
Sunt
I Bunting i èṅ na famìja in buléta ch'la stà in a West Hollywood davśèṅ a Los Angeles. Al marè al s ciàma Joe (Donal Logue) e insém a sò mujér Ellen (Hope Davis) 'l à mis in afìt la dependance dla sò vila par ciàpar un quàlc bèsi ma ninsòn a s fà avànti. I dū i gh'aṅ anc un putèṅ pìcul da tiràr sù, Timmy (J.P. Foster Jr.). Un dè a s fà viṿ un scritōr, Malcolm Slaight (Simon Baker), ch'al la tōś subìs sénsa dmandàr gnanc quànt la custìs, 'l è abàsta che ninsòṅ al vaga a fiacàr-al. Piutòst qvél ch'a gh dà da far i èṅ tut chi quàd'r ad cal dóni ch'i al tìnan 'd òć in dla cambra a sò dita. L’Ellen, ch'la tōś dal madśìni parchè la n è minga tant a pòst, la gh in dmanda mila dòlar a 'l méś, cun anc la clasiòṅ.
In chi dè lè in sità un sasèṅ seriàł al masa a scurtlàdi dū putàni pascàdi in dla Sunset Boulevard. La sò manéra ad cupàr l'arcòrda dimóndi qvéla ad Jack al Squartadōr ma anc qvéla 'd un masadōr mandâ a mòrt soquànt tèmp prima, un tisi ciamâ Alonso Rodriguez, dònca a s pōl dar ch'a gh sia stâ 'n śbali ad parsòna. Al caś al finìs in dal maṅ dal detective Chandler Manning (Alfred Molina), 'n óm ch'al gh'à di prubléma cun sò mujér Margaret (Mel Harris) e cun sò fiōla Amanda (Rachael Leigh Cook) ch'a gh dà la cólpa dla depresiòṅ ad sò màdar ch'adès l'è a 'l uśdàł misa mâł dòp ès'r-as tajàdi 'l véni. Insém a Chandler a gh lavóra Street Wilkenson (Shane West), un pulisiòt śōvan a 'l sò prim incàrag impurtànt.