The Glove

Da Wikipedia.
C'l artìcul chè 'l è scrit in Miranduléś Emiliàn


«
I laid with you for hours remembering your taste and when the morning came it splattered us in light, I think I left you sleeping there, I think I left you sleeping, mouth to mouth - I asked you to stay, mouth to mouth - but you're slipping away, down seven stairs and first on the left, arch your back and hold your breath, a million fat girls and a million fat men couldn't put me back together again, your body grows so beautiful with every move you make, your body grows so beautiful with every bite I take.»
(EN)(Mouth to Mouth, 1983)
«
A sòṅ stâ culgâ tèg par dgl'óri arcurdànd al tò savōr e quànd a s è fat dè al s à insprucâ 'd luś, a créd 'd avēr-at lasâ là a durmìr, a créd 'd avēr-at lasâ durmìr, bóca a bóca - a t ò dmandâ 'd armàgnar, bóca a bóca - ma 't sē drē a śliciàr via, śò par sèt scali pò la prima a sinìstra, piga la schina e tîṅ al fiâ, un migliòṅ ad ragàsi grasi e 'n migliòṅ 'd ragàs gras i n sarévan minga bòṅ ad mét'r-um incóra insém, al tò còrp al dvènta acsè bèl c'n al mòsi basta ch'a sia ch'at fà, al tò còrp al dvènta acsè bèl cun tut i murśgòt ch'a ciàp.»
(MUD)
Robert Smith
Steven Severin


The Glove (Al Guànt) 'l è 'n supergrup muśicàl ingléś nâ cuma side-project dal leader di The Cure Robert Smith e dal basìsta di Siouxsie and the Banshees Steven Severin, cun la balarìna Jeanette Landray a la vóś.

Al nóm dal duo 'l è stâ sarnî pinsànd a 'l guànt gigànt vulànt ch'a s vdiva in dal film di The Beatles Yellow Submarine. Insém i aṅ fat vgnir fóra un disc in dal 1983, Blue Sunshine, e dū sìngui, Like an Animal e Punish Me With Kisses.

Biugrafìa

Smith e Severin i aṅ mis in pē cal prugèt chè in un mumènt difìcil dla sò caréra. Al cantànt ad Blackpool 'l éra in criśi c'n i Cure par via dal dròghi ch'al tulìva e parchè al s quistiunàva sèmpar cun Simon Gallup durànt i cuncèrt dal tour ad Pornography e 'l basìsta 'l iva mulâ 'l grup parchè al gh 'n iva 'l bali pîni. Robert in cal méntar 'l iva tacâ a sunàr da 'l viṿ anc p'r i Siouxsie and the Banshees a 'l pòst dal chitarìsta John McGeoch ch'l iva bandunâ la Siouxsie parchè al n stava minga bèṅ.

In séguit, méntar la Siouxsie Sioux e Budgie i éran via da 'l Inghiltèra par registràr da par lōr 'l àlbum Feast druànd al nóm ad The Creatures, Smith e Severin i aṅ tacâ a sunàr insém di pès cun la balarìna Jeanette Landray a la vóś parchè Robert al n psiva minga cantàr parchè ligâ a i The Cure, dònca sōl i pès Mr. Alphabet Says e Perfect Murder i pòrtan la sò vóś. In dal 1983 a véd acsè la luś Blue Sunshine, disc registrâ in dódas stmani, lavōr ispirâ a 'n film ad scarésa in du la gint ch'la tulìva d'l LSD ciamâ Blue Sunshine i dvintàvan di sasèṅ psicòtig déś an dòp.

Dòp avēr registrâ insém anc na canta vgnuda pò fóra p'r i Cure, Lament, i dū sunadōr i èṅ turnâ a lauràr p'r i sò grup 'd riferimènt cun Smith ch'l à tacâ a far vgnir fóra soquànt sìngui pop-eletrònic insém a Lol Tolhurst, cuma Let's Go To Bed e The Walk ch'i s dastacàvan dimóndi da 'l vilimènt 'd Pornography, méntar Severin 'l è turnâ a lauràr c'n i Siouxsie and the Banshees a tèmp pîṅ.

In dal 2006 l'è vgnuda fóra n'edisiòṅ rimasteriśàda 'd Blue Sunshine c'n un disc bonus in du a gh'è 'l canti sunàdi par Robert Smith.

Mémbar

  • Robert Smith (vóś, chitàra, bas e tastéri)
  • Simon Gallup (bas e tastéri)
  • Jeanette Landray (vóś)
  • Andy Anderson (baterìa)
  • Martin McCarrick, Ginny Hewes e Anne Stephenson (arc)

Discugrafìa

Àlbum

Sìngui

  • 1983 - Like an Animal (Wonderland/Polydor)
  • 1983 - Punish Me with Kisses (Wonderland/Polydor)

Culegamènt estéran