The Backwoods - Prigionieri nel bosco
|
C'l artìcul chè 'l è scrit in
Miranduléś |
 Bosque de sombras
| ||
| The Backwoods - Prigionieri nel bosco | ||
 La Virginie Ledoyen in na figùra dal film | ||
| Pòst minga śvilupâ - Parśunēr in dal bòsc 2006 | ||
|---|---|---|
| Regìa: Koldo Serra | ||
| Scritōr: Koldo Serra • Jon Sagalá | ||
| Atōr: Gary Oldman • Virginie Ledoyen • Jon Ariño Aitana Sánchez-Gijón • Lluís Homar • Yaiza Esteve Paddy Considine • Álex Angulo • Kandido Uranga | ||
| Müsica: Fernando Velázquez | ||
| Léngua: Ingléś • Spagnōl | ||
| Dürä dal film: 97 minüt | ||
| Nasiōṅ: Spaggna • Régn Unî | ||
The Backwoods - Prigionieri nel bosco (Pòst minga śvilupâ - Parśunēr in dal bòsc) 'l è 'n thriller dal 2006 ad Koldo Serra ch'al 'l à scrit insém a Jon Sagalá. 'L è stâ girâ in di Paéś Basc e in dla Navàrra c'n un budget stimâ ad tri migliòṅ e siē 'd euro.
In dla culòna sunóra dal film i s càtan dū pès ad Leonard Cohen: There is a war e Lover, lover, lover.
Sunt
In dal 1978 dū còpi 'd amìg i decìd'n ad partìr in màchina da l'Inghiltèra par pasàr insém al vacànsi in na tranquìla e spardùda cà in di bòsc dal nòrd dla Spaggna. Una dal còpi, qvéla furmàda da Norman (Paddy Considine) e da la Lucy (Virginie Ledoyen), i èṅ in criśi da quànd lē l'à pardû 'l putèṅ ch'la spetàva. Da cal mumènt lè la dóna la n in vōl piò savēr ad far sès ma Norman al spéra che pasàr dal tèmp in 'n àt'r ambînt al la pòsa jùtar (beâ ch'i gh créd). Chi àtar dū, al casadōr Paul (Gary Oldman) e l’Isabel (Aitana Sánchez-Gijón), invéci i gùsan ch'l'è na belésa.
Al dè dòp, durànd na batùda 'd casa, i dū óm i bèc'n un ciùś in mèś a i bòsc. A n catànd piò la strada par turnàr a cà, Paul al decìd ad vèrar 'l us par védar se lè a gh'è 'n qualchidòṅ ch'a pòsa dir-ag la via ma qvél ch'al cata l'è invéci na putìna muśnènta e spavintàda cun dal maṅ malfurmàdi, la Nerea (Yaiza Esteve), ch'la magna in di scudlòt p'r al bèsti e ch'l'armàgn sémp'r a 'l scûr. 'L óm al decìd ad tōr-la sèg par far-'g un bagn, dar-ag da magnàr e purtàr-la da la pulisìa anc se chi lē la n pâr minga tant un chilo e la mòrśga anc da la paùra cuma na bèstia salvàdga.
Fat al bagn e bvû dal lat la putìna l'è prònta p'r èsar cunsgnàda a la guàrdia sivìl ma purtròp, durànd al viàś, la màchina c'n i quàt'r insìma la sa stablìs cónt'r un trònc dna piànta, dònca al grup al gh'à da turnàr indrē. La màtina dòp i rìvan lè quàt'r óm dal pòst ch'i bùs'n e i dmànd'n a Paul se par caś 'l is vdû na putìna. 'L ingléś al capìs incòsa e 'l decìd 'd andàr sèg a pascàr-la par paràr via 'l suspèt ch'la sia invéci in cà ma prima 'l diś a Norman ad purtàr-la a pē da la pulisìa tgnénd-la in bras.