Sweet thing
|
C'l artìcul chè 'l è scrit in
Miranduléś |
 Sweet thing
| ||
| Sweet thing | ||
 Dalmon e l'Amalia Stifter in na figùra dal film | ||
| Quèl dōls 1999 | ||
|---|---|---|
| Regìa: Mark David | ||
| Scritōr: Mark David • Mark Spacek | ||
| Atōr: Jeremy Fox • Amalia Stifter • Stephen Bruton Ev Lunning • Lana Dieterich • Michael Dalmon Seamus Callahan • Maurice Ripke • K. Todd Lytle | ||
| Müsica: Mark David • William Tabanou | ||
| Léngua: Ingléś | ||
| Dürä dal film: 115 minüt | ||
| Nasiōṅ: Stat Unî | ||
Sweet thing (Quèl dōls) 'l è 'n film dramàtic americàṅ dal 1999 ad Mark David ch'al 'l à anc scrit insém a Mark Spacek. 'L è stâ girâ c'n un budget ad ssanta-mila sòlar a 'l incìrca.
A 'l inìsi al nóm dal giùdas prutagunìsta dla pelìcula al gh'iva da èsar Tom Fields ma pò al regìsta al 'l à cambiâ in Ray parchè a gh 'n éra òṅ dabòṅ ch'al s ciamàva acsè.
In dla culòna sunóra dal film i s càtan di pès di The Cult (The Phoenix) e ad Johnny Cash (Ring of Fire).
Sunt
Ray Fields (Ev Lunning) 'l è 'n giùdas uriginàri dal Mississippi ch'l è in cursa p'r un séǵ a 'l cungrès di Stat Unî p'r al partî republicàṅ. 'L è spuśâ cun la Vivian (Lana Dieterich), na dóna imbariagòsa, e al gh'à 'n ragàs artìsta ch'al viṿ sèg cuma 'n fiōl, Sean (Jeremy Fox), da quànd sò pàdar, qvél véra, 'l è finî in parśòṅ e pò 'l è mòrt in un sćiòp. Un dè al śōvan, méntar 'l è drē a lèś'r un lìbar su Vincent van Gogh, al cgnós in bibliutéca na ragàsa ciamàda Hannah (Amalia Stifter) ch'la móstra d'l interès p'r al sò òpri e ch'la dvènta pò sò amìga e anc quèl da piò.
Sean al dà 'n sò quàd'r a na móstra e quànd i suo i rìvan par véd'r al sò diségn par pôc i n gh armàgnan séc parchè la sò òpra la móstra 'n óm nûd ch'l insfìlsa 'n bras in dal cûl dna vaca stiliśàda. Ray al gh'à paùra ch'la sò campàgna eleturàla la pòsa patìr-an dònca al dà 'l incàr'g a 'l sò culaburadōr, al sgnōr Weiss (Michael Dalmon), ad mét'r i quèi a pòst anc parchè a riva na reporter (LaDon Drummond) ch'la vōl intervistàr Sean e far un servìsi par la televiśiòṅ. Anc a 'n sèrt Ian Cambell Frasier (Tony Hewett), galerìsta, a gh piàś la sò art e al vrév védar di àtar sò quàd'r insém a 'l sò sòci, al sgnōr Green (Kelvin Girdy).
Al senadōr Larry Larson (Bob Richardson), cumpàgn ad partî ad Ray, al gh diś ch'la gint l'à tacâ a spataglàr su 'l fat che Sean al sia 'n fnòć, sōl parchè 'l è 'n pôc ingiangulâ c'n al dóni, e 'l è 'n quèl ch'a n và mia bèṅ, pròpria par gnint, al và in a risć ad bruśàr-as. Na sira, méntar Sean e l’Hannah i s divertìs'n a 'l „Club Inferno“, a s fà avànti un sèrt Davie (Stephen Bruton), vèć amìg dla ragàsa o par dir méj al sò óm. Difàti lì lē la n la cònta minga giùsta esénd che Weiss al la paga par gusàr cun Sean, p'r èsar la sò muróśa e par tgnir-'l impgnâ a far incòsa a part di quàdar.