Shock (film)
|
C'l artìcul chè 'l è scrit in
Miranduléś |
 Shock
| ||
.png) La Daria Nicolodi in na figùra dal film | ||
| id. 1977 | ||
|---|---|---|
| Regìa: Mario Bava | ||
| Scritōr: Gianfranco Barberi Alessandro Parenzo • Lamberto Bava Dardano Sacchetti • Hillary Waugh | ||
| Atōr: Daria Nicolodi • David Colin Jr. John Steiner • Ivan Rassimov • Nicola Salerno | ||
| Müsica: I Libra | ||
| Léngua: Itagliàṅ | ||
| Dürä dal film: 95 minüt | ||
| Nasiōṅ: Itàglia | ||
Shock (id.) 'l è 'n film ad scarésa psiculògic itagliàṅ dal 1977 ad Mario Bava cun soquànti séni giràdi par sò fiōl Lamberto tgnénd adrē a i sò storyboard.
A 'l inìsi par la part dla prutagunìsta dla pelìcula, giràda in sinc stmani e ispiràda a 'n rumànś dl'Hillary Waugh, a s éra pinsâ ad tōr la Mimsy Farmer.
Sunt
Al pilòta 'd aparéć Bruno Baldini (John Steiner), a fòrsa 'd insìstar, al cunvìns sò mujēr Dora (Daria Nicolodi) a 'ndàr a star insém a Marco (David Colin Jr.), al putèṅ 'd sèt an che lē l'à abû da 'l sò prim marè Carlo (Nicola Salerno), in dla vila 'd campàgna ad pruprietà dla dóna, lasàda p'r al tràuma patî a séguit dal suicìdi in mâr ad sò marè, drugâ pódag.
Un dè al putèṅ al diś sèri a sò màdar ch'al gh'à da masàr-la. La dóna la taca a 'vēr un cedimènt psiculògic anc parchè al baghét al gh fà di schèrs brut ad cuntìnuv méntar Bruno 'l è a 'l èstar par lavōr. Inóltar, a 'rmàgnar lè, a la Dora i tàc'n a vgnir-'g in mènt di brut arcòrd che lē l'iva rimòs, anc andànd in cura da 'n psicòlug, al dutōr Aldo Spidini (Ivan Rassimov).
La dóna la taca a pinsàr che Marco al sia in cuntàt c'n al spìrit ad sò pàdar e ch'a gh sia quèl ad véra a s capìs quànd lò al dà di purcùs a i sò genitōr ch'i gusàv'n in sal divàṅ méntar lò al n i psiva minga véd'r esénd in dla sò cambra. In séguit al baghét al fà 'n diségn ad sò màdar ch'la taja la góla a Carlo e la Dora, vdénd-al, la s persuad 'd èsar stada lē dabòṅ a masàr-al.
Na sira, sinténd di stus vgnir da la cantìna, la Dora la và śò a védar e la cata Bruno c'n un pigòṅ ch'l è drē a tiràr śò un mur. Un segrét tarménd 'l è drē a turnàr in mènt a la dóna.