Râfia

Da Wikipedia.
C'l artìcul chè 'l è scrit in Carpśàn Emiliàn
Na matasèina arvujèda 'd fibri 'd râfia

La râfia l' è na fibra vegetèla mìa fina, druèda in dla produsiòun 'd cordi, 'd sèst ed pedàni e 'd soquànti bórsi in dal pòst ed la juta. La râfia la s chèva da na varietè 'd palmi 'd l' Africa trupichèla dal gèner Raphia, e in di ùltem tèimp la vin tratèda e anca tinta, dvintènd acsè lìsa, alśéra e reśistèinta, adàta anca a èser lavurèda a 'l uncinèt in dû a s pól cunfesionèr dal bórsi, di capē, di tapē u dal tuaièti, di sòtabicér u di èt'r acesóri per la cà.

Na fibra 'd râfia la pól èser lunga fin a 'n mèt'r e mèś, cun na sutilèsa iregulèra e mai uguèla. Al dè 'd incō l' indùstria la prepèra anca di ruchèt arvujè 'd râfia sintètica, ch' la gh' à 'n aspèt uguèl, mo invéci la lunghèsa cuntìnua e la regularitè 'dal spesōr.

Vôś lighèdi

Culegamèint estèren