Quel pomeriggio di un giorno da cani

Da Wikipedia.

C'l artìcul chè 'l è scrit in Miranduléś Emiliàn

Dog Day Afternoon
Quel pomeriggio di un giorno da cani

Al Pacino in na figùra dal film
Cal dòpmèśdè 'd un dè da caṅ
1975
Regìa: Sidney Lumet
Scritōr: P.F. Kluge
Thomas Moore • Frank Pierson
Atōr: Al PacinoJohn CazaleJames Broderick
Charles DurningSully BoyarChris Sarandon
Sandra KazanMarcia Jean KurtzAmy Levitt
Penelope AllenJohn MarriottGary Springer
Estelle OmensCarol KaneBeulah Garrick
Müsica: Elton John
Léngua: Ingléś
Dürä dal film: 124 minüt
Nasiōṅ: Stat Unî


«
La rapìna la gh'iva da duràr dèś minùt. Òt óri dòp, l'éra incóra la dirèta dla televiśiòṅ più tgnuda a drē. E 'l è véra incòsa.»
(Tagline dal film)


Quel pomeriggio di un giorno da cani (Cal dòpmèśdè 'd un dè da caṅ) 'l è 'n film dramàtic dal 1975 ad Sidney Lumet ch'al tōś ispirasiòṅ da 'n fat sucès dabòṅ al 22 'd Agóst dal 1972 a New York, na rapìna tintàda da tri rapinadōr, pò dū, a Brooklyn quànd Sonny Wojtowicz, insém a 'l sò cumpâr Salvatore Naturile, i aṅ tgnû in ustàǵ i dipendènt dna banca.

Al film, custâ un migliòṅ e òt ad dòlar, al 'n à pò fat sù sinquànta e 'l à vins al Prèmi Òscar dal 1976 par la senegiadùra mijóra ad Frank Pierson, cun atri sinc nomination. Pacino al s è vist purtàr via invéci 'l Òscar da Jack Nicholson par la sò part ad prutagunìsta in Qualcuno volò sul nido del cuculo.

Al tìtul itagliàṅ dal film 'l è stâ tradót mâl parchè Dog Day a vōl dir Cald da carpàr e i caṅ chè i n gh'èntran gnint.

Sunt

Tri rapinadōr, in un dòpmèśdè 'd un cald da carpàr, i mét'n in at al sò cólp: i vànan dènt'r a na banca prima ch'la sarìs e i tînan sòdi al persunàl par far-as dar tut i bèsi, ma 'l più śóvan, Stevie (Gary Springer), al s caga sóta e al i mòla lè parchè al n s la sènt briśa. Chi àtar dū, Sonny Wortzik (Al Pacino) e Salvatore Naturile dit Sal (John Cazale), invéci i cuntìnuan da par lōr.

Quànd 'l è al mumènt ad védar cuś a gh'è in dla casafòrt, a salta fóra na surpréśa minga tant bèla: i gh'èṅ armàś sōi soquànt miàr ad dòlar. La caséra la gh diś che pôc tèmp prima 'l éra pasâ da 'd lè al purtavalōr par far sù al bancunòti. Mantgnénd la calma, i dū i faṅ sù incòsa ma, pròpria quànd i èṅ drē a 'ndàr fóra, i védan quéi dla pulisìa lè 'd intóran ch'i i tînan 'd òć.

Sonny al decìd ad tōr in ustàǵ tut i dipendènt par tacàr pò a tratàr da par lò cun al fòrsi d'l órdan e al dascór persunalmènt cun Eugene Moretti (Charles Durning) dla pulisìa dal munisìpi. In cal méntar quéi dla televiśiòṅ i rìvan lè par tōr śò incòsa da 'l viṿ e anc dimóndi gint la s mùcia lè da na banda, tulénd la sò part, e lò al stramna śò par tèra di bluchét ad bèsi par lōr dòp èsar gnû fóra par ciapàr dal pizzi da magnàr.

Quànd al capìs che scapàr via 'l è impusìbil, Sonny al dmanda a Moretti 'n aparéć par vulàr a 'l èstar insém a Sal, ma na squàdra specialiśàda la s insfìlsa dèntar par ciapàr-i. Sonny al spara 'n cólp parànd-i via.

Sonny a cà al gh'à na mujér, Angie (Susan Peretz) e dū fiōi ma anc 'n amànt chichèṅ, Leon (Chris Sarandon), "spuśâ" 'l an prima. Chi lò al gh'à biśógn ad dumìla dòlar par pagàr-as l'uperasiòṅ par dvintàr dóna ma al n gh i à minga. Moretti al capìs acsè al mutìṿ dla rapìna e al próa a cunvìnsar Leon a dascórar sèg a 'l telèfun ma chi lò al diś ad nò parchè a gh strica 'l cûl cardénd acsè ad vgnir incriminâ anca lò.

Culegamènt estéran