Presumed Guilty
|
C'l artìcul chè 'l è scrit in
Miranduléś |
 Guilty Until Proven Innocent
| ||
| Presumed Guilty | ||
 Brendan Fraser in na figùra dal film | ||
| Cardû culpévul 1991 | ||
|---|---|---|
| Regìa: Paul Wendkos | ||
| Scritōr: Cynthia Whitcomb | ||
| Atōr: Martin Sheen • Brendan Fraser • Bill Dalzell Caroline Kava • James Handy • Rebecca Schull Renée Estevez • Mark Metcalf • Bingo O'Malley | ||
| Müsica: Charles Bernstein | ||
| Léngua: Ingléś | ||
| Dürä dal film: 93 minüt | ||
| Nasiōṅ: Stat Unî | ||
Presumed Guilty (Cardû culpévul), cgnusû in Itàglia anc cuma “Nel nome di mio figlio” e in di Stat Unî cuma “Guilty Until Proven Innocent” ch'l arbàlta 'l sèns dla giustìsia (Culpévul in fiṅ tant ch'l'inusénsa la n è mia pruvàda), 'l è 'n film dramàtic americàṅ dal 1991 ad Paul Wendkos girâ par la televiśiòṅ. 'L è stâ scrit par la Cynthia Whitcomb e al cònta di fat trat da na stòria véra, qvéla 'd Robert K. McLaughlin, un ragàs ch'l à vdû la sò vita ruinàda da i giùdas dal stat dal Minneśòta par 'n umisìdi ch'al n iva minga fat[1].
Cla pelìcula chè l'è la prima par 'l atōr Brendan Fraser.
Sunt
A tri óri dòp meśanòt al śōvan Bobby McLaughlin (Brendan Fraser) al tórna a cà da i sò genitōr adutìṿ, Harold Hohne (Martin Sheen) e la Mary (Caroline Kava), dòp ch'l iva sarnî 'd andàr via par sò cònt par na questiòṅ ad spinèi, śuntém-ag pò ch'l à śmis 'd andàr a scōla, ch'al bév a còl, ch'al s imbariàga, ch'a gh piàś mnar al maṅ e ch'a vint an al n gh'à minga 'n lavōr sèri. P'r Harold chi lò al n è pròpria un bèl eśèmpi p'r i sò fradèi più pìcui Tim, Jeff (John Ponzio) e la Carol (Renée Estevez), na ragàsa ch'la pòrta 'l sò cugnóm. Dòp na litgàda sèg sò màdar la gh ślunga na quèrta par punsàr in sal divàṅ.
Sèmpar cla nòt lè, durànt na rapìna in di camp ad Marine Park, un pustàs in du a s vénd dla dròga, 'n óm al pèrd la vita p'r un cōlp ad sćiòp da casa e 'n àtar ragàs vitma dla rapìna, Jimmy O'Neill (Tristan Tait), al cònta pò a 'l cumisàri Ron D'Angelo (Mark Metcalf) ch'l à vdû in ghigna 'l sasèṅ e ch'al sarév bòṅ 'd arcgnós'r-al s'l al vdis incóra. Quànd al véd la foto a 'l computer 'd un sèrt Billy Ferro (Zachary Mott) al diś ch'l è lò séns àtar e 'l sò jutànt al prév èsar pròpria Bobby parchè in pasâ i éran finî dènt'r insém parchè i éran stâ bcâ ciùc. Al ragàs al finìs acsè in parśòṅ e i giùdas i gh dànan 'n avucàt 'd ufìsi, la Beverly Rosen (Rebecca Schull), parchè chi àtar i cóstan tròp. La màchina dla véra la gh dà ragiòṅ ma a la cōrt a n gh in ciàva gnint, in tut al manéri l'è abàsta par parsuàdar sò pàdar che lò 'l è inusènt e Harold al gh admànda pardòṅ p'r avér dubitâ 'd lò.
Bobby al s bèca quìnd'ś an parchè gl'amìg ch'i éran sèg la nòt 'd 'l umisìdi i éran tut di imbariagòs e i giùdas i n gh crédan minga, Ferro al n cunfèsa briśa e pò anc l'avucàta l'è una ch'la n vâl un fîg séc. Harold adès al gh'à da catàr dal próvi nóvi par vèr'r incóra 'l caś o sinò a n gh'è gnint da far. Cun 'l ingàn al gh la cava a lèśar la schéda che la pulisìa la gh'à 'd Ferro e al s rénd cònt ch'al nóm dal sò cumpâr ch'a gh'è scrit insìma al n è minga qvél ad sò fiōl ma òṅ ch'al gh sumìlia sōl, dònca cal dè là 'l cumisàri 'l iva fat véd'r a Jimmy ma foto ch'a n gh intràva gnint. Harold al dmanda ajùt a 'n sergìnt sò amìg, Gerry Duffy (James Handy).
Culegamènt estéran
Nòti
- ↑ Cundanâ par śbali, 'n óm al ciàpa 'n riśarcimènt 'd un migliòṅ e nóṿ ad dòlar ma par na vita nurmàla a prév èsar tròp tard Los Angeles Times, 5 ad Nuvémbar dal 1989