Pippa Bacca
|
C'l artìcul chè 'l è scrit in
Miranduléś |
La Pippa Bacca (Milàṅ, 9 ad Dicémbar dal 1974 - Gebze, 31 ad Mars dal 2008) l'è stada n'artìsta itagliàna, mòrta masàda a 33 an in Turchìa.
Biugrafìa
La Giuseppina Pasqualino di Marineo (Pippa Bacca l'è al sò nóm d'art), prima ad tacàr a dar-'s a l'art, la gh'à abû di parènt famóś. L'éra difàti l'anvōda ad Piero Manzoni, artìsta a sò vòlta (l'òpra Mèrda 'd artìsta al l'à fata lò, in tut i sèns) e parènt a la lunga 'd Alessandro Manzoni.
Dal 1997 in avànti la taca a specialiśàr-as in dl'art fata in dal mumènt, in un pòst, insém a di àtar o da par lē (Performance art in ingléś, Arte performativa in itagliàṅ).
Al fil cundutōr dal sò art l'è la trasfurmasiòṅ di śavài in àtar śavài, in gènar druànd semplicemènt na fòrbśa. Tant par réndar l'idéa, al fòto dal gint ch'la gh'iva dat un pasàǵ i vènan tajàdi e pò misi incóra insém par far gnir fóra un mèś ad traspòrt o 'l uncinét druâ par far di lavōr a maja cun al fórmi ad cas o atri ròbi spurcaciòni.
La sò òpra Surgical mutations (Mutasiòṅ dal cirùsic) l'è fata da un muć ad fój ad bòsc tajàdi in manéra da far-i dvintàr di àtar vegetài in dla fórma.
Pippa Bacca l'è stada masàda durànt al sò ùltim lavōr Spose in Viaggio (Spóśi in viàś). L'artìsta milanéśa la vliva giràr ùndas paēś, teàtar ad cunflìt armâ, faghénd 'l autostòp cun adòs un vistî da spóśa, par dar al sò apòǵ a la paś e la fidùcia in d'l àtar.
La destinasiòṅ finàla la sarév stada Gerusalemme dòp avér tucâ Milàṅ (punt ad partènsa, 'l 8 ad Mars dal 2008, fèsta dla dóna), Śluvègna, Cruàsia, Bòśgna, Bulgarìa, Turchìa, Sìria, Lìban, Giurdàgna, Iśraél e Palestìna. Partìda cun l'amìga Silvia Moro, Pippa la riva a Ìstanbul al 20 ad Mars e la s sepàra da la sò cumpàra, cun l'idéa ad catàr-'s pò incóra a Beirut.
Purtròp al 31 ad Mars a Gebze Pippa Bacca la vèṅ viulentàda e pò strangulàda[1] da 'n óm ch'al gh'iva dat un pasàǵ. Chi lò al vèṅ pò ciapâ dagnóra subìt parchè 'l iva tòlt al sò telefunèṅ. Murat Karatash, quést 'l è al sò nóm, al vèṅ in séguit cundanâ a 'l ergàstul in dal Śugn dal 2009.
Al còrp sénsa vita ad Pippa al vèṅ catâ 'l 11 'd Avrìl dal 2008 e tut i giurnài turc i 'n dascóran, faghénd anc di tìtui in itagliàṅ "perdonaci Pippa" o "siamo molto addolorati". Anc al Cap dal Guéran Recep Tayyip Erdoğan al ś diś "dimóndi trist" par quél ch'l éra sucès.
In ucaśiòṅ di sò funerài, tgnû a spéśi dal cumùṅ ad Milàn al 19 'd Avrìl dal 2008, 'l asesōr a la cultùra dal munisìpi Vittorio Sgarbi al diś ch'al gh'à idéa ad dedicàr na móstra di sò òpri a 'l Padigliòṅ d'Art 'd Adès. A dìr-ag ciào i gh'ér'n al sìndig Letizia Moratti, la minìstra Barbara Pollastrini e 'l cònsul turc Vefik Fenmen.
Òpri
- Le stanze di verzura (2006)
- Adamo ed Eva
- Surgical mutations (2004)
- Il ventre dell'architetto (2003)
- Non calpestate l'Africa (2003)
Culegamènt estéran
Nòti
- ↑ L' ho violentata e strangolata corriere.it, 12 'd Avrìl dal 2008