Paul Stanley

Da Wikipedia.
C'l artìcul chè 'l è scrit in Miranduléś Emiliàn
Paul a Helsinki in dal 2008
Paul (prim da dèstra) e i Kiss in na fóto dal '76


Stanley Harvey Eisen, cgnusû méj cuma Paul Stanley (New York, 20 ad Śnar dal 1952, a s lèś /pɔl ˈstænli/ in ingléś dònca pòl stánli a la mudnéśa) 'l è 'n cantànt, chitarìsta e pitōr americàṅ, cgnusû prinsipalmènt p'r ès'r òṅ di mémbar fundadōr dal grup hard rock di Kiss in du al gh'è sèmpar stâ da 'l inìsi esénd-'n al leader insém a 'l basìsta Gene Simmons méntar lò al sòna la chitàra rìtmica.

Al sò scutmàj 'l è The Star Child (La stéla putèṅ) par via dal custùm e dla mascra ch'al s éra sarnî p'r al sò persunàǵ. 'L à scrit, da par lò o insém a di àtar, bòna part di sucès dal grup cuma Rock and Roll All Nite, I Was Made for Lovin' You, Love Gun, Detroit Rock City, Black Diamond, I Stole Your Love, Sure Know Something, Forever, God Of Thunder, Creatures Of The Night e Lick It Up.

La rivìsta 'd mùśica Hit Parader la 'l mét a 'l 18śum pòst in dla lista di sènt cantànt “metal” ad tut i tèmp.

Biugrafìa

Uriginàri dna famìja ebrèja 'd Manhattan, da śōvan Paul al sòna in soquànt grup dal pòst cuma i Rainbow e i Uncle Joe prima 'd pasàr c'n i Wicked Lester ad Gene Simmons. In dal 1971 al regìstra sèg 'n àlbum che però al n vadrà mai la luś (soquànt di sò pès i s pōlan sintìr in tut al manéri in dla racòlta The Box Set dal 2001).

Dū an dòp Stanley e Gene i dànan vita a 'n grup nóṿ ad paca, i Kiss, ciamànd sèg al baterìsta Peter Criss e 'l chitarìsta sulìsta Ace Frehley. Insém i pùblican un disc 'd hard rock pēś in dal 1974, 'l umònim Kiss, e pò 'n àtar àtar tant dûr ch'al piàś dimóndi in Giapòṅ, Hotter Than Hell.

Cun 'l àlbum da 'l viṿ Alive! a riva 'l sucès p'r al grup ch'al gh dà sèmpar dèntar dimóndi durànt i cuncèrt ch'i cuntìnuan anc adès dòp quarànt'an e pasa 'd caréra.

In dal 1999 al lavóra a teàtar faghénd al Fantàśma dl'Òpra in d'l umònim musical.

Dòp un prim disc da par lò in dal 1978, da 'l tìtul Paul Stanley (pîṅ ad balàdi cuma Tonight You Belong to Me, Take Me Away (Together as One) e Hold Me, Touch Me (Think of Me When We're Apart)), in dal 2006 al dà a la luś Live to Win fat cun la culaburasiòṅ 'd Andreas Carlsson e 'd Desmond Child.

Paul 'l à patî dū uperasiòṅ a i galòṅ, la prima in d'l Utóbar dal 2004 e n'atra dū méś dòp par dal cumplicasiòṅ. In dal sò canti in gèn'r al ténd a druàr un regìstar élt, ma 'l à pruâ anc al falsét (in di braṅ Just a Boy e The Oath trat da 'l concept album Music from "The Elder" dal 1981) o 'l tôṅ bas (in dl'éra “disco” cum in dal canti Shandi e I Was Made for Lovin' You).

Al cantànt 'l è stâ spuśâ par nóṿ an cun la Pamela Bowen, avénd un fiōl sèg ciamâ Evan Shane Stanley, e pò in dal 2005 al s è ligâ a l’Erin Sutton, màdar di sò tri fiōi nâ durànt al matrimòni: Colin Michael Stanley, la Sarah Brianna e l’Emily Grace.

Discugrafìa

Al sò truc
La sò ghigna dabòṅ
Stanley tòlt śò a 'l Hellfest dal 2013

da par lò

  • 1978 - Paul Stanley
  • 2006 - Live to Win

c'n i Kiss

  • 1974 - Kiss
  • 1974 - Hotter Than Hell
  • 1975 - Dressed to Kill
  • 1975 - Alive!
  • 1976 - Destroyer
  • 1976 - Rock and Roll Over
  • 1977 - Love Gun
  • 1977 - Alive II
  • 1978 - Paul Stanley
  • 1979 - Dynasty
  • 1980 - Unmasked
  • 1981 - Music From "The Elder"
  • 1982 - Creatures of the Night
  • 1983 - Lick It Up
  • 1984 - Animalize
  • 1985 - Asylum
  • 1987 - Crazy Nights
  • 1989 - Hot in the Shade
  • 1992 - Revenge
  • 1997 - Carnival of Souls: The Final Sessions
  • 1998 - Psycho Circus
  • 2009 - Sonic Boom
  • 2012 - Monster

Culegamènt estéran