Peter Criss

C'l artìcul chè 'l è scrit in Miranduléś

George Peter John Criscuola, cgnusû méj cuma Peter Criss (New York, 20 ad Dicémbar dal 1947) 'l è 'n cantànt e baterìsta americàṅ cun di urìgini itagliàni, cgnusû prinsipalmènt p'r ès'r òṅ di mémbar fundadōr dal grup hard rock di Kiss. Al sò scutmàj 'l è Óm-Gat par via dal custùm e dla mascra ch'al s éra sarnî p'r al sò persunàǵ. Da 'l 2014 al sò nóm al fà part dla Rock and Roll Hall of Fame.

Dòp 'n inìsi da sunadōr jazz, Criss al s unìs a i Kiss, grup nâ da 'l séndri di Wicked Lester, lśénd n'insersiòṅ su la rivìsta Rolling Stone, cambiànd anc al sò cugnóm in Criss.

Dòp avēr publicâ un disc sulìsta umònim in dal 1978 (pîṅ ad lènt cuma Don't You Let Me Down, Easy Thing e I Can't Stop the Rain) e avēr sunâ in un pès sōl in Dynasty, la sò Dirty Living, Peter 'l à mulâ 'l grup p'r un prugèt da par lò faghénd vgnir fóra dū disc a 'l inìsi di an Utànta e pò 'n àt'r in dal 2007, One for All. In dal mèś 'l è turnâ a sunàr p'r i Kiss da 'l 1996 a 'l 2001 (tulénd part acsè a 'l disc dla reunion Psycho Circus) e da 'l 2003 a 'l 2004 (KISS Symphony: Alive IV).

Cun la sò vóś ragajóśa 'l à purtâ a 'l sucès 'l sìngul Beth, al sò pès più famóś. Àtar braṅ cantâ da lò c'n i Kiss i èṅ Strange Ways, al lènt Hard Luck Woman e Black Diamond.