Paganini horror
|
C'l artìcul chè 'l è scrit in
Miranduléś |
 Paganini Horror
| ||
 La Daria Nicolodi in na figùra dal film | ||
| Paganini Scarésa 1989 | ||
|---|---|---|
| Regìa: Luigi Cozzi | ||
| Scritōr: Raimondo Del Balzo Luigi Cozzi • Daria Nicolodi | ||
| Atōr: Donald Pleasence • Jasmine Maimone Daria Nicolodi • Giada Cozzi • Elena Pompei Luana Ravegnini • Pascal Persiano Michel Klippstein • Roberto Giannini Maria Cristina Mastrangeli • Pietro Genuardi | ||
| Müsica: Vince Tempera | ||
| Léngua: Itagliàṅ | ||
| Dürä dal film: 90 minüt | ||
| Nasiōṅ: Itàglia | ||
Paganini Horror (Paganini Scarésa) 'l è 'n film ad scarésa dal 1989 ad Luigi Cozzi.
Sunt
La Kate (Jasmine Maimone), na cantànta daśmindgàda da tut, la tōś dal sò amìg Daniel (Pascal Persiano), un spartî inèdit ch'l éra stâ scrit a sò tèmp da Niccolò Paganini, al famōś cumpuśidōr e sunadōr ad viulèṅ genuéś. Vlénd far cuma Michael Jackson cun Thriller, chi lē la decìd ad giràr un vìddeo ad scarésa in dla cà in du 'l éra visû al muśicìsta lìgur, ciamàda la Cà dal sòl, ch'la s cata a Venèsia. La s pòrta sèg i cumpunènt dal sò grup ad fémni, la prudutōra Lavinia (Maria Cristina Mastrangeli) e al regìsta.
La padróna dla vila, Silvia (Daria Nicolodi), la gh cònta la stòria ad Paganini ch'l arév vindû la sò anma a 'l Diàvul p'r al sucès. Inóltar chi lò al s éra fat un viulèṅ ùnic a 'l mónd druànd cuma còrdi al budèli ad sò mujér Antonia. Sunànd cal spartî lè, al cumpuśidōr 'l éra bòṅ ad dascórar diretamènt cun al demòni. Quànd al grup al taca a sunàr la canta, la maledisiòṅ ad Paganini la và a cumpimènt e la Rita (Luana Ravegnini) e Daniel stés i càtan la mòrt. Chi àtar i vrévan scapàr via da 'd là ma i n pōlan minga far-al parchè la cà 'l è anvlupàda ad fóra par na baréra màgica.
In cal méntar in dla sità lagunàra a riva al misteriōś Mr. Pickett (Donald Pleasence), òṅ ch'al cgnós cuma 'l sò bisàchi la mùśica ad Paganini.