Vai al contenuto

Nek

Da Wikipedia.

C'l artìcul chè 'l è scrit in Miranduléś Emiliàn


«
Dal primo mic check non ti piaccio sono un redNek, non bestemmiare dai, stà zèt, flow interstellare, star Nek, lascia che io sia il tuo brivido più grande dentro le mutande, non andare via, accorciamo le distanze dentro le mie stanze, se non mi conosci chiedi a tua madre perché io ti conosco, sono tuo padre, se non mi conosci chiedi a tua sorella perché io la conosco, canta i miei brani a capella, tu vuoi sapere chi è il king, Sassuolo come Palm Springs, tieniti i tuoi onion rings, che hai che pagar le birre, tu vuoi sapere chi è il king, Cocoricò e bling bling, tua zia non sta a Forlì, ce la guzziamo noi qui, î'v capî adès chi 'l è 'l king?»
(IT)(EN)(EGL)(Sassuolo/Palm Springs, 2016)
«
Da 'l prim mic check a n t piàś minga a sòṅ un redNek, briśa biastmàr dai-mò, stà zèt, flow fra 'l stéli, star Nek, lasa ch'a sia 'l tò śgriśōr più grand in dal mudànd, mia andàr via, scurtém al distànsi dènt'r a 'l mè cambri, s'ta n m cgnós minga dmanda a tò màdar parchè a t cgnós mè, a sòṅ tò pàdar, s'ta n m cgnós minga dmanda a tò surèla parchè a la cgnós mè, la canta i mè braṅ a capèla, tè 't vō savēr chi 'l è 'l king, Sasōl cuma Palm Springs, tîn't i tò onion rings, ch'at gh'à da pagàr al biri, tè 't vō savēr chi 'l è 'l king, Cocoricò e bling bling, tò sîna la n stà minga a Furlè, a s la gusém nuàtar chè, î'v capî adès chi 'l è 'l king?»
(MUD)
Nek méntar 'l è drē a cantàr a Assago


Filippo Neviani, cgnusû méj cn'al nóm 'd art ad Nek (Sasōl, 6 ad Śnar dal 1972), 'l è 'n cantànt e sunadōr emigliàṅ. In dla sò caréra 'l à vindû da piò ad déś migliòṅ ad disc in tut al mónd.

Biugrafìa

Nek al taca na caréra ad cantànt da par lò in dal 1991 quànd al vins al fèstival ad Castruchèra c'n al braṅ Io ti vorrei (Mè a t vrév). Al prim àlbum, inciś par la Fonit Cetra in dal 1992, al s intìtula Nek e al gh'à di ciàr arciàm a la mùśica country e a Sting. In dal 1993 al mónta in sal palc ad Sanremo cun la canta In te ch'la s piàsa tèrsa fra qvéli dal prupòsti nóvi. L'eśibisiòṅ la fà sù 'n pandemòni: la cansòṅ l'è batśàda cuma 'n manifèst cóntar 'l abòrt e la fà crés'r al rabiadùri dal feminìsti, dgl'aburtìsta e 'd sèrt pulìtic ad sinìstra. 'L àlbum umònim al gh'à dèntar nóṿ braṅ ma sōl siē i èṅ di inèdit.

In dal 1994 al fà gnir fóra al sò tèrs àlbum Calore umano dimóndi più madūr di precedènt. A 'l fèstival itagliàṅ al s piàsa a 'l secónd pòst cun Angeli nel ghetto.

'L àlbum seguènt dal 1997 'l è Lei, gli amici e tutto il resto (Lē, gl'amìg e tut al rèst). La sò ristàmpa la gh'à dèntar la cansòṅ ad sucès, diretamènt da Sanremo, Laura non c'è (Laura la n gh'è minga) un braṅ incìś anc in di atri léngui cuma 'l ingléś, al spagnōl,[1] e 'l francéś. Nek al s fà cgnósar in Itàglia (più ad 600.000 còpi vindùdi), in Europa e in dal mónd (3 migliòṅ ad còpi in tut). I àtar dū sìngui dal disc i èṅ Dimmi cos'è (Dì-'m cuś'l è) e Sei grande (At sē grand).

«
Laura dov'è? mi manca sai, magari c'è un altro accanto a lei. Giuro non ci ho pensato mai che succedesse proprio a noi, lei si muove dentro a un altro abbraccio su di un corpo che non è più il mio, io così non c'è la faccio.»
(IT)(Laura non c'è, 1997)
«
In du è-la la Laura? la m manca 't al sà, a gh'è 'l caś ch'a gh sia 'n àtar davśèṅ a lē. A t giùr ch'a n gh'ò mai pinsâ ch'a psis sucédar pròpia a nuàtar, lē la ś móṿ dèntar a 'n àtar abràs in sima a 'n còrp ch'a n è piò al mio, mè acsè a n gh la fag piò.»
(MUD)
Nek in cuncèrt a Valladolid in dal 2009

In due, al disc nóṿ, al vîṅ publicâ 'l an dòp. La versiòṅ spagnōla la s ciama Entre tú y yo. Anc c'l àlbum chè, fat in vint-i-òt dè e basta, al vénd dimóndi. Nek al canta Se io non avessi te (S'a n gh'is minga tè) a 'l Festivalbar e quést chè 'l è òṅ di quàtar sìngui insém a Sto con te (A stag tèg), Se una regola c'è (S'a gh'è na règla) e Con un ma con un se (C'n un ma c'n un se).

Al sèst àlbum 'l è dal 2000 e al s ciàma La vita è (La vita l'è) e al gh'à dènt'r al sìngul Ci sei tu (Ta gh sē tè). Dū an dòp 'l è 'l tùr'n ad Le cose da difendere (Al ròbi da diféndar) e lè Filippo al canta Sei solo tu (At sē sōl tè) insém cun la Laura Pausini.

Al 2003 'l è 'l an ad The Best of Nek - L'anno zero (Al méj 'd Nek - 'l an śèr), na racòlta cun daśdòt braṅ dèntar e 'l nóvi Almeno stavolta e L'anno zero. I èṅ 250.000 al còpi vindùdi in Itàglia.

Al 13 ad Maǵ dal 2005 Nek al fà catàr in di negósi Una parte di me (Na part ad mè), in séguit al fà in manéra ad partecipàr a 'l Live 8 in du al canta Almeno stavolta, Se io non avessi te e 'l nóṿ sìngul Lascia che io sia (Lasa ch'a sia) ch'al vins al Festivalbar e ch'al gh'à dimóndi sucès in Spaggna c'n al tìtul Para ti seria. I àtar dū sìngui tirâ fóra da cal disc lè i èṅ Contromano (Cóntarmàṅ) e L'inquietudine.

In dal 2006 al fà vgnir fóra Nella stanza 26 (In dla stansa 26) cantànd Si viaggiare (Sè viaśàr), na cover ad Lucio Battisti misa dènt'r a 'l tribùt Innocenti evasioni 2006, un lavōr ch'al véd la partecipasiòṅ ad Luciano Ligabue, ad Samuele Bersani, dla Giorgia e 'd Max Pezzali.

Da 'l 2 ad Setémbar dal 2006 Nek 'l è spuśâ cun la Patrizia Vacondio e sèg al gh'à na fiōla, la Beatrice Maria, nada quat'r an dòp.

A séguit dal taramòt dla basa mudnéśa dal Maǵ dal 2012, Nek al decìd ad dar 'n ajùt tulénd part a 'n cuncèrt par catàr sù di fónd, insém a di àtar artìsta dla regiòṅ Emìglia Rumàgna cuma i Nomadi, Francesco Guccini, la Laura Pausini, Luciano Ligabue, Gianni Morandi e i Modena City Ramblers.

In dal 2013 a cata la luś 'l àlbum Filippo Neviani méntar dū an dòp 'l è 'l tur'n ad Prima di parlare, disc ch'al gh'à dènt'r al pès cantâ a Sanremo, e rivâ secónd, Fatti avanti amore. In dal 2016 al cantànt sasuléś al tōś part cuma giùdas a la traśmisiòṅ Amici di Maria De Filippi, pò 'l pùblica 'l sìngul Uno di questi giorni e 'n braṅ rap su la sò paśna Facebook ciamâ Sassuolo/Palm Springs, vìddeo vdû da piò ad tri migliòṅ ad vòlti in gnanc vint-quàt'r óri[2], in vista dal sò tredicéśum disc prevìst par 'l Aṿtòṅ.

Discugrafìa

Àlbum

  • 1992 - Nek
  • 1993 - In te
  • 1994 - Calore umano
  • 1997 - Lei, gli amici e tutto il resto
  • 1998 - In due
  • 2000 - La vita è
  • 2002 - Le cose da difendere
  • 2003 - The Best of Nek - L'anno zero
  • 2005 - Una parte di me
  • 2006 - Nella stanza 26
  • 2009 - Un'altra direzione
  • 2013 - Filippo Neviani
  • 2015 - Prima di parlare

Àlbum in spagnōl

  • 1997 - Nek
  • 1998 - Entre tú y yo
  • 2000 - La vida es
  • 2002 - Las cosas que defenderé
  • 2003 - Lo mejor de Nek - El año cero
  • 2005 - Una parte de mí
  • 2006 - Esencial
  • 2006 - En el cuarto 26
  • 2009 - Nuevas direcciones

Culegamènt Estéran

Nòti

  1. ↑ (ES) Laura no está
  2. ↑ Nek in versiòṅ rapper TRC, 27 ad Maǵ dal 2016
Estratto da "https://eml.wikipedia.org/w/index.php?title=Nek&oldid=156975"