Laura Pausini

Da Wikipedia.
C'l artìcul chè 'l è scrit in Miranduléś Emiliàn
La Pausini tòlta śò a Barcelóna in dal 2009
La Laura da 'l viṿ a Bercy in d'l Avrìl dal 2012
La rumagnōla in dal 2007 a Viaréś


«
Si has visto, has visto. Yo la tengo como todas.»
(ES)
«
S'a î vdû, a î vdû. Mè a gh l'ò cuma tuti.»
(MUD)


La Laura Pausini (Fënza, 16 ad Maǵ dal 1974, a s lèś [ˈlaura pauˈziːni] in itagliàn) l'è na cantànta rumagnōla famóśa in tut al mónd, specialmènt in dal marcâ spagnōl e in qvéi dl'Amèrica latìna. L'è stada la sōla artìsta itagliàna a vìns'r un Grammy Award e 'l è sucès in dal 2006 par 'l àlbum Escucha. La canta in itagliàn, in spagnōl, in purtughéś, in francéś e in ingléś. Dòp 'n inìsi in dua i sò disc i dascurìv'n ad prubléma di śōvan, a partìr da 'l àlbum La mia risposta dal 1998 i crìtic i tàc'n a badśàr-la cuma n'artìsta più madùra. La Pausini l'è carsùda a Slaròl in pruìnsa 'd Ravéna.

La s è fata cgnós'r in dal 1993 vinsénd al Fèstival ad Sanremo in dla sesiòṅ “Nuità” c'n al braṅ La solitudine. In séguit l'à cantâ di àtar pès ad sucès cuma Non c'è, Strani amori, Le cose che vivi, Un'emergenza d'amore, La mia risposta, Il mio sbaglio più grande, E ritorno da te, Surrender, Resta in ascolto, Vivimi, Io canto, Invece no e Benvenuto. L'à fat di duét cun di artìsta cuma Ray Charles, Gilberto Gil, Johnny Hallyday, Tiziano Ferro, Andrea Bocelli, Charles Aznavour, Ivano Fossati, la Gianna Nannini e la Kylie Minogue.

La Warner Music Italia l'à mis négar su biànc ch'l'à vindû da piò ad quarànta-sinc migliòṅ ad disc méntar la FIMI e la Rai i rìv'n anc óltar, stimànd da piò ad stanta migliòṅ ad còpi in tut al mónd fra CD, DVD e sìngui. In dal 2006 l'à ciapâ al tìtul ad cumendadōra dla Repùblica Itagliàna e in dal 2013 al tìtul 'd ambasadōra dl'Emìglia-Rumàgna in dal mónd.

L'è spusàda cun al sò prudutōr e chitarìsta Paolo Carta e sèg la gh'à na putìna, la Paola.

Discugrafìa

Culegamènt estéran