Mina

Da Wikipedia.

C'l artìcul chè 'l è scrit in Miranduléś Emiliàn

La Mina tòlta śò in dal 1972
La cantànta in di an Ssanta


«
Se vuoi andare ti capisco, se mi lasci ti tradisco, sì, ma se dormo sul tuo petto di amarti io non smetto, no. Tu stupendo sei in amore, sensuale sul mio cuore, sì, se poi strappo un tuo lamento è importante questo mio momento perché io ti chiedo ancora il tuo corpo ancora, le tue braccia ancora, di abbracciarmi ancora, di amarmi ancora, di pigliarmi ancora, farmi morire ancora perché ti amo ancora.»
(IT)(Ancora ancora ancora, 1978)
«
S'at vō andàr a t capìs, s'ta m las a t tradìs, sè, ma s'a dòrum su 'l tò pèt 'd amàr-'t a n śmét minga, nò. Stupénd at sē in amōr, sensuàł su 'l mè cōr, sè, se pò a sćiànc un tò lamènt 'l è impurtànt cal mumènt chè mio parchè mè a t admànd incóra al tò còrp incóra, i tò bras incóra, ad brasàr-'m incóra, 'd amàr-'m incóra, ad tōr-'m incóra, far-um murìr incóra parchè a t vój bèṅ incóra.»
(MUD)


La Mina Anna Mazzini, cgnusùda méj c'n al nóm d'art ad Mina (Bust Arsìsi, 25 ad Mars dal 1940) l'è na cantànta, atōra, cundutōra televiśìva e prudutōra itagliàna naturaliśàda śvisra. Al sò scutmàj, invintâ par la giurnalìsta Natalia Aspesi, 'l è La tigra ad Cremóna parchè i suo i daśvgnìvan da la sità dla basa lumbàrda e lē la gh'è andàda a vìv'r a tri an.

Cunsideràda una dal più grandi cantànti 'd sèmpar, la gh'à na vóś granda da 'l punt ad vista dl'estensiòṅ ma anc na tècnica e 'n tìmbar ch'i s cgnósan subìt. In dla sò caréra, tacàda a la fiṅ di an Sinquànta, l'à cantâ da piò ad mila-sincsènt braṅ e vindû da piò ad sènt-sinquànta migliòṅ ad disc, faghénd da piò ad stanta àlbum in studi e muciànd sù dimóndi prèmi e dū partecipasiòṅ a 'l Fèstival ad Sanremo. Fra 'l sò canti più impurtànti a 'rcurdém Acqua e sale (fata insém a Adriano Celentano), Amor mio, Ancora ancora ancora, La banda, Brava, Il cielo in una stanza, È l'uomo per me, E poi..., E se domani, L'importante è finire, Insieme, Le mille bolle blu, Nessuno, Non gioco più, Parole parole, Se telefonando, Tintarella di luna, Una zebra a pois e Zum zum zum ólt'r a na sfilaràda 'd cover 'd artìsta 'd tut al mónd.

Da 'l 1978 la cantànta l'à decìs 'd a n far-as più védar par pò andàr a vìv'r in Śvisra.

Culegamènt estéran