Maledetta ambizione
|
C'l artìcul chè 'l è scrit in
Miranduléś |
 The Temp
| ||
| Maledetta ambizione | ||
 Hutton e la Faye Dunaway in na figùra dal film | ||
| Ambisiòṅ maladìda 1993 | ||
|---|---|---|
| Regìa: Tom Holland | ||
| Scritōr: Kevin Falls • Tom Engleman | ||
| Atōr: Timothy Hutton • Lara Flynn Boyle Dwight Schultz • Faye Dunaway • Oliver Platt Steven Weber • Scott Coffey • Colleen Flynn | ||
| Müsica: Frédéric Talgorn | ||
| Léngua: Ingléś | ||
| Dürä dal film: 99 minüt | ||
| Nasiōṅ: Stat Unî | ||
Maledetta ambizione (Ambisiòṅ maladìda) 'l è 'n thriller americàṅ dal 1993 ad Tom Holland scrit da Tom Engelman e da Kevin Falls. Custâ quìndas migliòṅ ad dòlar, al 'n à purtâ a cà sōl siē e quàtar.
Soquànti parti dal film i èṅ stadi giràdi in dal South Park Blocks ad Portland.
Sunt
Peter Derns (Timothy Hutton) 'l è 'n dirigìnt dna dita ch'la fà di dōls ciàmada "Mrs. Appleby's Cookies" (I biscòt dla sgnóra Appleby). Al tórna a lauràr dòp avér pasâ dal tèmp in na clìnica parchè 'l éra dvintâ paranòic. Al prim dè al vèṅ a savér ch'la sò aśiénda l'è pasàda a di àtar padròṅ e chi nóṿ i s èn mis a lasàr a cà dla gint. La sò capa Charlene (Faye Dunaway) la 'l mét sóta subìt par far-ag far na relasiòṅ su di prudót nóṿ, prima ad mèśdè dal dè dòp. Quànd al sò asistènt Lance (Scott Coffey) al s in và p'r un pôc ad tèmp, Peter al s la véd bruta ma par sò furtùna a gh'è la Kris Bolin (Lara Flynn Boyle), na nóva dipendènta cun un cuntràt pruviśòri, ch'la gh dà 'l ajùt ch'a gh vōl.
Chi lē la taca da spés a 'ndàr a pranś sèg cuntànd-'g anc ch'l'è spuśàda e ch'la gh'à 'n fiōl. Cun la sò bravitù la spéra 'd èsar tòlta fisa in dla dita cuma segretària ad Derns. 'D atra part lò al s rènd cònt ch'al n pōl pròpria briśa far a méno ad lē ch'la strùlica sèmpar di quèi brilànt e pò l'è anc na bèla ragasōla, na bunàsa.
Quànd Lance al tórna in ufìsi al s fà mâl subìt c'n al machinèṅ ch'al sćiànca i ducumènt ad carta, pardénd la maṅ dèstra. 'L è custrèt acsè a licensiàr-as, lasànd camp lìbar a la Kris. Ma 'l è sōl 'l inìsi ad fat ad sangṿ ch'i patìsan di rivài par la caréra ad Peter. Hartsell (Oliver Platt) al mōr in autostràda dòp èsar stâ punt da n'aśióla méntar Jasser (Dwight Schultz) al vîṅ catâ impicâ in dal sò ufìsi.
Peter al taca a crédar ch'a gh sia in mèś la Kris ma al fà fadìga a purtàr avànti al sò pinsēr parchè 'l éra stâ dimés da pôc da la clìnica. 'L è 'n fat però che cal mòrti là i al cùć'n in élt in dal lavōr, miténd-al in prima fila par na prumusiòṅ. Chi lò al taca dònca a śluntanàr-as da lē, a livèl sentimentàl e prufesiunàl, pruànd a turnàr in cal méntar da sò mujér Sharon (Maura Tierney).