Le hostess
|
C'l artìcul chè 'l è scrit in
Miranduléś |
 Die Stewardessen
| ||
| Le hostess | ||
 Wilczewski e la Traeger in na figùra dal film | ||
| Gl'hostess 1971 | ||
|---|---|---|
| Regìa: Erwin C. Dietrich | ||
| Scritōr: Erwin C. Dietrich | ||
| Atōr: Evelyne Traeger • Ingrid Steeger • Rico Peter Detlev Heyse • Kathrin Heberle • Margrit Siegel Raphael Britten • Bernd Wilczewski • Ursula Marty | ||
| Müsica: Walter Baumgartner | ||
| Léngua: Tedésc • Ingléś | ||
| Dürä dal film: 71 minüt | ||
| Nasiōṅ: Śvisra | ||
Le hostess (Gl'hostess) l'è na cumèdia eròtica śvisra dal 1971 'd Erwin C. Dietrich, giràda firmànd-as Michael Thomas, ch'al 'l à anc scrita druànd al pseudònim ad Manfred Gregor.
L'è stada giràda a Cupenàghen, a Róma, a Śurîg e a Mònag 'd Bavéra.
Sunt
Durànt un vōl par Śurîg in Śvisra l'hostess Jenny (Margrit Siegel), na purcùsa śvedéśa ch'la pésca di óm cun di bèsi, la buta 'l òć su 'n vèć ad nóm Peter in viàś par New York ch'al vénd dal bucìni p'r al golf, la fà sès sèg in 'n hutèl e pò la và a spas c'n un ragasōl ch'l'à cgnusû in pisìna.
Méntar la Jenny la gh próa anc c'n al co-pilòta Robert, che però 'l è fnòć, cl'atra hostess, la Frances (Ursula Marty), la śmónta śò a Róma c'n al cmandànt David (Raphael Britten). Dòp na nòt ad sès i decìd'n ad spuśàr-as e la Frances, ślungànd-ag na ciàṿ, la dà 'l incàr'g a la sò culéga Evelyn (Evelyne Traeger) 'd andàr a tōr na sò camìśa da nòt ch'l'à lasâ a cà 'd un sèrt Sven Madsen (Bernd Wilczewski) a Cupenàghen, sità in du la gh'à da 'ndàr durànt al sò tùran. Quànd la riva là la cata Sven a lèt ch'al gh diś 'd andàr a far na dócia ma 'l bagn 'l è ucupâ da Olaf ch'l è drē a far di śughlèṅ malnét cun na biónda ciamàda Ingrid (Ingrid Steeger). Dòp èsar-'s fat Sven l'hostess la s fà 'n gir anc cun Olaf, e la camìśa da nòt?
Durànt la féra d'l Oktoberfest a Mònag 'd Bavéra l’Anne (Kathrin Heberle), culéga dla Frances, la cgnós un cuntestadōr cumunìsta sfegatâ e cavlòṅ, Sascha. La burghéśa la pasa la giurnàda sèg pagànd-ag tut i divertimènt, da 'l schisamènt c'n al martèl a 'l muntàgni rusi e pò anc la séna, cla cajòna, e sōl p'r andàr pò a ciulàr in na cumùna e fumàr soquànt canòṅ in mèś a di pòster 'd Ernesto Che Guevara e ad Mao Zedong.
A la fiṅ a s capìs ch'l è sōl un film ma 'n spetadōr (Andreas Mannkopff) 'l arcgnós fóra da 'l cìnema l'Ingrid Steeger, l'atōra ch'la fava la part dl’Ingrid in dla pelìcula, ch'la l'invìda in dal sò apartamènt par na gusadìna. Ah nò, al s 'l è sōl imaginâ, a fumàr-as sèrti ròbi al sarvèl al tira pò di brut schèrs. 'L óm pò al cumènta: «A 'l saìva che cla stòria chè l'éra tuta na fargadùra».