La gabbianella e il gatto
|
C'l artìcol chè 'l è scrit in
Carpśàn |
 La gabbianella e il gatto | ||
| La gabbianella e il gatto | ||
 La banda di gàt ed lung ala sponda dal canèl dal port. | ||
| La gabianèla e 'l gàt 1998 | ||
|---|---|---|
| Scritōr: Luis Sepúlveda | ||
| Regìa: | ||
| Senegiadùra: Umberto Marino | ||
| Personâǵ: Śorba • Fortunèda • Diderot Segretàri • Colonèl • Bucìn • Rośa di Vèint Kengah • Igor • Bubulèina • Al Grand Sòreg | ||
| Dupiadōr originêl: Carlo Verdone • Sofia Baratta Veronica Puccio • Leda Battisti • Domitilla D'Amico Antonio Albanese • Luca Biagini • Valerio Ruggeri Paolo Lombardi • Gabriele Patriarca • Paola Tedesco Massimo Lodolo • Alida Milana • Ivana Spagna Fabrizio Vidale • Melba Ruffo | ||
| Mùśica: David Rhodes | ||
| Durèda dal cartòun: 76 minût | ||
| Lengua: Itagliàṅ | ||
| Nasiòun/Paēś: Itàglia | ||
La gabbianella e il gatto (a dìr "La gabianèla e 'l gàt") 'l è 'n cartòun animê dal 1998 prodòt dala Columbia Pictures in Itàglia, dirèt da Enzo D'Alò e tolt fóra dala fòla ed Luis Sepúlveda "Historia de una gaviota y del gato que le enseñó a volar".
Sunt edla fóla
[mudéfica la surzéia]Na banda 'd amìg gàt, Śorba, al Colonèl, al Segretàri, Diderot e Bucìn i s caten sèinper śò in strèda per tgnìr a bèda a na maramàja ed pundgàsi stremnèdi in dal fùgni 'd Ambùrg. Chel pòundghi lè, cmandèdi da 'l Grand Sòreg, i gh'àn sèimpr in amèint 'd impinìr el só scorti ed furmàj ma, più che èter, i vrèven tōr al cmand edla sitê.
Al Gran Sòreg al ghe cmanda a dal pundgàsi cun dimòndi avtoritê, cura di detài e di grand altolà. In ùna dal tanti batài tra 'l pundgàsi e i noster gàt, Śorba 'l armàgn frî a na sampa e a gh'tòca 'd scapèr vìa 'd cursa ed dardòun. In dal turnèr a cà, Śorba al pasa acsè per chèś a travèrs a 'l tràs ed na gatèina dimòndi blèina, la Bubulèina, ch'la gh'taca a piaśér, gnan a dìrel.
Ùna 'd cal siri lè, gnanc luntàn da 'l port, na bèrca a mutōr la ciàpa còuntr'a na petroléra ch'a gh'vin un śbrègh ind un fiànc e soquànt petròli al se stremna ed lung al mèr. Al dè dòp, i gabiàn in serca ed pès cum i fan sèinper, i s tùfen in dl'aqua per ciapèren soquànt, mo la gabiàna Kengah, ch'l'è lè lè per mèter śò al só prim ōv, la s inbàt pròpia in dla pòsa 'd petròli e dòunca la và anc in arìsć ed murìr avelenèda lè da mèś a l'àqua melnèta. Furtùna la vōl che la Kengah, in na quèlc manéra, la gh'la chèva ed vulèr infìn a riva e caschèr acsè sèinsa fiê pròpia in dal curtìl ed Śorba.
Bleah, la pusa dimòndi ed catìv udōr, cla gabiàna chè! Mo chelē, la Kengah, la gh'dìś subìt, a Śorba, ch'a n'gh'è minga tanti quistiòun da stèr a drē. Lē l'è in fin 'd vìta, la gh'lasa lè al só ōv, mo però lò, Śorba, al gh'à da prumètregh ch'l insgnarà a vulèr ala gabianèla cichìna ch'a gh'gnarà fóra ded lè. La Kengaha la gh'ìva ragiòun, a descòrer dla fin edla só vìta, perchè se anc al grùp di gàt i s fèvn in quàter per tóregh vìa al petròli dagli èli, mo però lē la vultèva i pē a 'l ùs ded lè a pòc, dòp 'd avér mìs śò al só prim ōv.
I gàt i stàn a 'l śōg, e dòunca i s infórmen, ed quant a durarà mài la còva ed 'n ōv ed gabiàṅ... Vèint dè, a gh'è da fèregh la còva in sìma, ch'a gh'è scrit acsè e anc dimòndi cèr in dl'ensiclopedìa dal gàt Diderot. Na promèsa la và mantgnùda e, anc s'an s era mài vist prìma un gàt ch'al faga la còva, Śorba al gh's adàta, luntàn dai só gir 'd amìg e interèsi ed chièter dè.
Anc la gata Bubulèina la và a catèr Śorba, per capìr che fin 'l àpia fat un gàt acsè tant interesànt, mo però lò al s vergògna anc un pô, ed stèr lè in dla còva edl ōv... Pròpia in cal mèinter lè, a se sćiànca 'l gùs edl ōv e la gabianèla finalmèint la nàs.
"Mama, mama, a gh'ò fam!", la gh'diś la gabianlèina a Śorba, "Mama, mama, a gh'ò fàam!!" La 'l à tolt per só mèdra. Adèsa Śorba al gh'à da capìr cuśa dèr da magnèr ala Fortunèda, che acsè lò al la ciàma subìt. I crocantèin i nn egh pièśen brìśa, i magnèr edla só umàna gnanca. El moschi però sè... Dòunca a gh'darèm dal moschi, da magnèr!
E vìa che, in dal curtìl ed Śorba, tut i gàt i vólen ciapèr dal moschi da dèri da magnèr ala Fortunèda.
Tut cal dafèr chè e chi śmanèś acsè tant estràn dintórn a n'uślèina i dàn in dl'òć a 'l pundgàsi dal fùgni, ch'i dgìven sèinper a' l Grand Sòreg el nuvitê e chel nóvi stranberìi ch'a gh'era gnû ai gàt, damànd cuacèr 'n ōv per vèint dè, crèser n'uślèina, ciapèr dal moschi per dèrghi da magnèr, ch'a n's era mài vist prìma di lavōr acsè!
Se i gat i s dàn da fèr acsè tant per n'uślèina per cìca ch'la sìa, a vōl dìr che chelē la dév èser un quèl ed dimòndi presiōś, acsè a descòr al Grand Sòreg. A biśgnarà tōrghla vìa, in na manéra o in cl'ètra, e l'uślèina la prà dvintèr 'n ostàǵ in del man dal pundgàsi per sotamèter la banda di gàt e psér acsè tōr al cmand ed tùta la sitê.
I protagonìsta
[mudéfica la surzéia]- Kengah
- Śorba
- Bubulèina
- Gran Sòreg
Colegamèint estéren
[mudéfica la surzéia]- (EN) La schéda dal film in sìm'a 'l MYmovies.
- (IT) La schéda dal film in sìm'a 'l IMDb.