L'ultimo spettacolo (film 1971)

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg The Last Picture Show
L'ultimo spettacolo
Ultimo spettacolo (film 1971).png
Timothy Bottoms in na figùra dal film
’L ùltim spetàcul
1971
Regìa: Peter Bogdanovich
Scritōr: Larry McMurtry • Peter Bogdanovich
Atōr: Timothy BottomsJeff BridgesBarc Doyle
Ben JohnsonCybill ShepherdClu Gulager
Randy QuaidCloris LeachmanBill Thurman
Eileen BrennanLoyd CatlettSam Bottoms
Sharon UllrickEllen BurstynGary Brockette
Müsica: Tony Bennett • The Leon Miller Band
Lefty Frizzell • Eddie Fisher • Frankie Laine
Léngua: Ingléś
Dürä dal film: 122 minüt
Nasiōṅ: Stat Unî


«
La stòria 'd un sógn grand in un paiśèṅ pìcul.»
(Tagline dal film)


L'ultimo spettacolo (’L ùltim spetàcul) 'l è 'n film dramàtic dal 1971 ad Peter Bogdanovich trat da 'l rumànś umònim ad Larry McMurtry e girâ in biànc e négar tgnénd cònt di sugerimènt 'd Orson Welles. 'L è ambintâ in dl'Amèrica di an Sinquànta in un paiśèṅ dal Tèxas.

La pelìcula, vinsidōra 'd dū Prèmi Òscar par gl'atōr minga prutagunìsta Ben Johnson e la Cloris Leachman, l'è stada sarnìda da 'l National Film Registry p'r èsar tgnuda dacàt in dla Bibliutéca dal Cungrès di Stat Unî e la gh'à abû 'n séguit daśnóṿ an dòp da 'l tìtul Texasville.

Sunt

Sonny Crawford (Timothy Bottoms) e Duane Jackson (Jeff Bridges) i èṅ dū śōvan ch'i vìv'n in un paiśèṅ dal Tèxas, amìg da i tèmp dla scōla. Al prim al s véd cun la Charlene Duggs (Sharon Ullrick) e 'l è un scarsòṅ a śugàr a fùtbol americàṅ mént'r al secónd al fà 'l uperàj e 'l è 'l muróś dla Jacy Farrow (Cybill Shepherd). Sò màdar Lois (Ellen Burstyn) la vrév che lē la s mitìs c'n un ragàs cun di bèsi e minga c'n un buletàri cumpàgn. In paéś i divertimènt i èṅ pôc, un bigliàrd, un bar cun la camaréra Genevieve (Eileen Brennan) e 'n cìnema, tut ad pruprietà ad Sam dit „al Lèòṅ“ (Ben Johnson).

P'r al fèsti 'd Nadâł Sonny al mòla la sò muróśa, ch'la n gh la dava mai, e al s cumpàgna cun na dóna dimóndi più granda 'd lò, la Ruth (Cloris Leachman), mujēr dal sò insgnànt ad ginàstica Popper (Bill Thurman) ch'al n la tucàva mai parchè gay. In cal méntar la Jacy, insém a 'l sò amìg Lester Marlow (Randy Quaid), la và a na fèsta in pisìna a cà 'd Bobby Sheen (Gary Brockette), un ragàs pîṅ 'd bèsi ch'al gh'à la vila libra parchè i suo i èṅ a Miami par lavōr. Dòp avēr fat al bagn tut nûd la Jacy la s śibìs a Bobby che però al la para via dgénd-'g ad turnàr quànd la n sarà più vìrgin.

In paéś, cla nòt lè, al grup di amìg ad Duane al decìd ad pagàr na gusàda a Billy (Sam Bottoms), un ragasōl mut e ritardâ ch'al pòrta sèmp'r un brét in cô, cun cla budlòna dla Jimmie Sue (Helena Humann) ma, quànd chi lò al śbòra subìt, la dóna la gh mòla 'n śmataflòṅ ch'al gh fà sagvinàr al naś.

Par San Silvéstar Sonny e Duane i fànan na scapàda in Mèsic ma, quànd i tórnan, i gh dìśan che Sam 'l è mòrt. La Jacy l'invìda Duane a far sès in mutèl, pò la 'l mòla par mét'r-as cun Bobby che però al la dascàrga in quàt'r e quàt'r òt parchè al vōl spuśàr n'atra. La ragàsa, vilìda e cun la paùra 'd armàgnar puta, la fà prima sès cun 'l amànt ad sò màdar Abilene (Clu Gulager) pò la taca a far la sivéta cun Sonny, esénd ch'al sò èx muróś 'l è andâ a star via par lavōr. Sonny al gh astà ma la Jacy la sèra la stòria subìt, andànd a studiàr a Dallas. Mulàda da Sonny par na ragàsa śōvna, e sénsa spiegasiòṅ, la Ruth la patìs un dulōr tarménd.

Adès ch'i śōvan i aṅ pardû interès p'r i film, anc par via dla televiśiòṅ e di spòrt, al cìnema dal paéś 'l è custrét a saràr parchè a n gh và più ninsòṅ e pò a n gh'è più Sam a purtàr-'l avànti. Billy 'l è mòrt mis sóta da 'n furgòṅ, Duane 'l è drē a partìr par la guèra in Curèa. Adès ch'a n gh'è armàś più gnint in dal sò paéś, Sonny al vrév mulàr incòsa anc lò ma pò al tórna indrē e 'l và a sunàr a 'l us dla Ruth par védar s'la 'l tōś sèg incóra.

Culegamènt estéran