L'odio esplode a Dallas
|
C'l artìcul chè 'l è scrit in
Miranduléś |
 The Intruder
| ||
| L'odio esplode a Dallas | ||
 William Shatner in na figùra dal film | ||
| 'L òdi 'l scòpia a Dallas 1962 | ||
|---|---|---|
| Regìa: Roger Corman | ||
| Scritōr: Charles Beaumont • Charles Beaumont | ||
| Atōr: William Shatner • Frank Maxwell • Leo Gordon Charles Barnes • Robert Emhardt • Jeanne Cooper Beverly Lunsford • Charles Beaumont • Bo Dodd | ||
| Müsica: Herman Stein | ||
| Léngua: Ingléś | ||
| Dürä dal film: 84 minüt | ||
| Nasiōṅ: Stat Unî | ||
L'odio esplode a Dallas (’L òdi 'l scòpia a Dallas) 'l è 'n film in biànc e négar dal 1962 ad Roger Corman trat da 'n rumànś dal 1959 ad Charles Beaumont.
La pelìcula l'è stada giràda in dal gir ad tri stmani e mèś in dal sud-èst dal Missouri e l'è ambintàda in na sitadìna imaginària ciamàda Caxton ch'in Itàglia i distributōr i aṅ cambiâ, giusà parchè, in Dallas. Prima ch'al film al finìs la gint dal pòst l'à dâ adòs a 'l regìsta p'r al fat ch'la i fava figuràr cuma di rasìsta.
Sunt
In dal cōrs di prim an Ssanta, Adam Cramer (William Shatner) al riva da fóra in un paiśèṅ ad Dixie Land ciamâ Caxton e 'l taca a dmandàr in gir se la gint l'è 'd acòrd ad parmét'r a i négar 'd andàr a scōla c'n i sò fiōi biànc dòp ch'al guèran federàł 'l à fat pasàr na léǵ cóntar la segregrasiòṅ rasiàla. Tut i gh rispóndan che i n èṅ briśa cuntènt ma a n gh s pōl far gnint parchè l'è la léǵ, dura lex sed lex.
Adam 'l è 'n furastēr vistî bèṅ e ch'al sà dascórar ma 'l è anc un rasìsta e 'n pupulìsta ch'al lavóra par n'urganiśasiòṅ ciamàda “Patrick Henry Society”. Al taca acsè a far muntàr l'arlìa dla gint cónt'r i négar ch'i vōlan tōr lōr al putēr cum a sucéd bèla a Chicago e a New York dasfrutànd dal léǵ pagàdi c'n i bèsi di ebrèj e fati da di cumunìsta patintâ e ch'a n gh'è mia demucrasìa s'a n s tîṅ minga adrē a qvél ch'a vōl al pòpul e i sitadèṅ dal sud i n vōlan mia di dirìt cumpàgn fra biànc e négar. Durànt un cumìsi al dmanda a la gint s'i vōlan par caś di mèdag négar a curàr i sò fiōi e al gh diś che se lōr i n s arvòltan minga cun la scōla ch'l'à parmìs a déś ragàs négar 'd iscrìv'r-as dòp qvéi ad Washington i diràṅ ch'a gh stava bèṅ acsè vist ch'i n aṅ dit gnint. Adam al diś ch'l al fà parchè lò 'l è 'n americàṅ ch'a gh tîṅ a 'l sò paéś, na pàtria libra, biànca e americàna.
Cramer al pòrta subìt da la sò banda Verne Shipman (Robert Emhardt), 'n óm pîṅ ad bèsi cun soquànt sit ad tèra, e al s mét cun l’Ella McDaniel (Beverly Lunsford), fiōla dal diretōr dal giurnàl dal pòst, Tom (Frank Maxwell). Chi lò al capìs che l'integrasiòṅ 'l è 'n quèl giùst e ch'a gh'è da far-'g i cònt ma chi àtar biànc i n la pénsan minga cumpàgn a lò e i tàc'n a dar adòs a i négar. Qvéi dal Ku Klux Klan i pàs'n i màchina in di lōr quartēr e i gh brùśan na cróś davànti a la sò céśa, pò i gh tìran na bómba dèntar masànd un prevòstar.
Tom, andànd in a risć ad pèrd'r al lavōr e la sò famìja, al dmanda a la famìja 'd Joey Greene (Charles Barnes) ad mandàr listés sò fiōl a scōla parchè a n s pōl pròpria minga dar-ag sù. Par cal mutìṿ lè al li ciàpa da chi àtar biànc dal paéś ch'i n gh pardónan briśa 'l tradimènt dla sò rasa. Tom al finìs a 'l uśdàł pardénd 'n òć p'r al bòti méntar Adam al diś a l’Ella che s'la vōl salvàr sò pàdar la gh'à da strulgàr na trapla par Joey dgénd che cal négar lè 'l à pruâ a viulentàr-la a scōla.