L'amico d'infanzia
|
C'l artìcul chè 'l è scrit in
Miranduléś |
 L'amico d'infanzia
| ||
 Jason Robards III in na figùra dal film | ||
| 'L amìg ad quànd a séra baghét 1994 | ||
|---|---|---|
| Regìa: Pupi Avati | ||
| Scritōr: Pupi Avati | ||
| Atōr: Jason Robards III • Jim Ortlieb • Joe Ryan Amy Galper • Jim Mullins • Robert Swan Coralina Cataldi-Tassoni • Lee R. Sellars | ||
| Müsica: Stefano Caprioli • Richard Wagner | ||
| Léngua: Ingléś | ||
| Dürä dal film: 100 minüt | ||
| Nasiōṅ: Itàglia • Stat Unî | ||
L'amico d'infanzia (’L amìg ad quànd a séra baghét) 'l è 'n film thriller dal 1994 ad Pupi Avati ch'al 'l à anc scrit.
Sunt
Duncan Mackay 'l è 'l preśentadōr da dimóndi an dal talk show “XXVth hour” dal canàł "Chicago 5" ad Chicago, un prugràma 'd sucès in du al fà dal dmandi dirèti e dascòmdi a di persunàǵ pùblic. Quànd chi lò al vîṅ catâ mòrt in na cambra 'd albêrg, la sò traśmisiòṅ la pasa a Arnold Gardner (Jason Robards III), óm ad quarànt'an uriginàri dl'Indiàna ch'al lavóra lè parchè 'l iva spuśâ la fiōla dal pruprietàri dla televiśiòṅ, la Norma Cooper (Amy Galper), anc s'adès al matrimòni l'è andâ a gambi a l'élta, cun dū fiōi da tiràr sù.
C'n al sò stîl sćèt e catìṿ gl'ascōlt i vàn'n incóra méj 'd prima ma in cal méntar un sò amìg ad quànd 'l éra pìcul, Eddie Chuck Greenberg (Jim Ortlieb), al s fà viṿ cun dal telefunàdi e dal létri parchè Arnold al s è daśmindgâ 'd lò anc s'l iva prumìs ad tōr-al sèg s'l is catâ 'l sucès. Véduv da tri an dna dóna custréta a vìvar su na scrana a rudèli, c'n un cànc'r a 'l stómag ch'a n gh'è gnint da far, adès Eddie 'l è invidióś e al vōl vindicàr-'s ad lò anc p'r un brut fat sucès quànd i dū i éran di śuvnòt. Insém i ìvan viulentâ na ragàsa dal sò culéǵ ma a pagàr 'l éra stâ sōl Eddie, ch'l è stâ anc custrét a spuśàr-la, perchè c'l àt'r al gh'iva la furtùna 'd avér un pàdar giùdas.
Tirànd avànti cun dla murfìna, Eddie al taca a cupàr dla gint par far véd'r a Arnold ch'al fà dabòṅ e ch'al gh'à da cagàr-la s'al fus in di bras a Dio.